Marcos 13:1-37
13 Samtang nagawas hi Jesus ha templo, usa han iya mga disipulo an nagsiring ha iya: “Magturutdo, kitaa ini nga mga bato ngan mga istraktura!”
2 Kondi nagsiring hi Jesus: “Inin dagku nga istraktura ba an imo ginkikita? Waray gud usa nga bato nga magpapabilin ha bawbaw han usa nga bato nga diri marurumpag.”
3 Ngan samtang nalingkod hiya ha Bukid han mga Olibo nga nakikita an templo, hira Pedro, Santiago, Juan, ngan Andres nagpakiana ha iya:
4 “Sumati kami, San-o ini mahitatabo, ngan ano an magigin tigaman han ikatarapos hini ngatanan nga butang?”
5 Salit binaton hi Jesus: “Pag-ikmat nga diri kamo maisimang han bisan hin-o.
6 Damu an maabot nga magamit han akon ngaran, nga masiring, ‘Ako an Kristo,’ ngan damu an maisisimang.
7 Dugang pa, kon makabati kamo hin mga girra ngan mga sumat mahitungod han girra, ayaw kamo kahadlok; kinahanglan mahitabo ito, pero diri pa ito an kataposan.
8 “An mga nasud makikig-away ha iba nga nasud ngan an mga ginhadian makikig-away ha iba nga ginhadian; magkakaada mga linog ha iba-iba nga lugar; magkakaada gutom. Tinikangan pa la ini han mga kasakitan.*
9 “Pero pag-ikmat kamo, kay dadad-on kamo han mga tawo ha mga korte ngan kakastiguhon kamo ha mga sinagoga ngan dadad-on kamo ha mga gobernador ngan mga hadi tungod ha akon, basi magpamatuod ha ira.
10 Sugad man, an maopay nga sumat kinahanglan isangyaw anay ha ngatanan nga nasud.
11 Pero kon dad-on kamo nira ha korte, ayaw kamo kabaraka kon ano an iyo iyayakan, pero kon ano an ihatag ha iyo han baraan nga espiritu hito nga panahon, igyakan ito, kay diri kamo an nagyayakan kondi an baraan nga espiritu.
12 Dugang pa, ipapapatay han usa nga tawo an iya bugto. Sugad liwat hito an bubuhaton han usa nga amay ha iya anak, ngan kukontrahon han mga anak an ira mga kag-anak ngan ipapapatay hira.
13 Ngan mapupungot ha iyo an ngatanan nga tawo tungod ha akon ngaran. Pero an magpailob tubtob ha kataposan amo an matatalwas.
14 “Kondi kon an mangil-ad nga butang nga hinungdan han kabungkagan makita niyo nga natindog ha lugar nga diri angay tindogan hito (sadang gumamit hin pagsabot an magbarasa), an mga aadto ha Judea sadang pumalagiw ngadto ha kabukiran.
15 An aadto ha atop diri na lumusad o sumulod ha iya balay ha pagkuha hin bisan ano nga butang,
16 ngan an aadto ha uma diri na umuli pagkuha han iya ginbayaan nga mga butang, sugad han iya pantungbaw nga panapton.
17 Kairo han mga burod ngan han may minasus-an nga ginmamangnoan hito nga panahon!
18 Pag-ampo kamo pirme nga diri ito mahituman ha kathagkot,
19 kay ito nga mga adlaw magigin mga adlaw han kasakitan nga waray pa mahitabo tikang ha tinikangan han paghimoa han Dios han ngatanan nga butang tubtob yana, ngan diri na gud mahitatabo utro.
20 Ha pagkamatuod, kon diri pahaliputon ni Jehova an mga adlaw, waray tawo nga matatalwas. Pero tungod han iya mga pinili, pahahaliputon niya an mga adlaw.
21 “Kon may magsiring ha iyo, ‘Kitaa! Aanhi an Kristo,’ o ‘Kitaa! Aadto hiya,’ ayaw kamo pagtuod.
22 Kay maabot an buwa nga mga Kristo ngan buwa nga mga propeta ngan magpapakita hin mga tigaman ngan urusahon nga mga butang basi isimang an mga pinili, kon posible.
23 Salit pagbantay kamo; iginsusumat ko ha iyo an ngatanan antes ini mahitabo.
24 “Kondi katapos han kasakitan hito nga panahon, an adlaw magsisirom, an bulan diri maglalamrag,
25 an mga bitoon magkakahulog tikang ha langit, ngan mababay-og an gamhanan nga mga butang ha langit.
26 Ngan makikita nira an Anak han tawo nga nalusad upod han mga dampog nga may daku nga gahum ngan himaya.
27 Ngan susugoon niya an mga anghel ngan titirukon an iya mga pinili tikang ha upat nga direksyon han hangin, tikang ha kataposan han tuna tubtob ha kataposan han langit.
28 “Sugad nga ehemplo, tagda an kahoy nga igera: Kon tumubo na an mga sanga hito ngan manaringsing an mga dahon, maaram kamo nga hirani na an katpaso.
29 Sugad man, kon makita niyo nga nahitatabo na ini nga mga butang, makakasiguro kamo nga hirani na hiya ha purtahan.
30 Ha pagkamatuod, susumatan ko kamo nga diri gud malabay ini nga henerasyon tubtob nga mahitabo ini ngatanan.
31 An langit ngan an tuna mawawara, pero an akon mga pulong diri mawawara.
32 “Mahitungod hito nga adlaw o oras, waray maaram, bisan an mga anghel ha langit o an Anak, kondi an Amay la.
33 Padayon nga magbantay, padayon nga mag-mata, kay diri kamo maaram kon san-o an itinanda nga panahon.
34 Pariho ito hin tawo nga nagbiyahe ha iba nga nasud nga ginbayaan an iya balay ngan gintagan an iya mga uripon hin awtoridad ha panginano ha panimalay, nga an kada usa ha ira may buruhaton, ngan gintugon niya an gwardya ha purtahan nga padayon nga magbantay.
35 Salit padayon nga magbantay, kay diri kamo maaram kon san-o maabot an Agaron han balay, kon temprano ba ha gab-i o ha katutnga o ha kaagahon* o temprano ha aga,
36 basi diri kamo maabtan nga nangangaturog kon tigda nga umabot hiya.
37 Kondi an akon ginyayakan ha iyo, ginyayakan ko ha ngatanan: Padayon nga magbantay.”
