Marcos 8:1-38
8 Hito nga panahon nagtirirok na liwat an damu nga tawo. Waray hira pagkaon, salit gintawag ni Jesus an mga disipulo ngan ginsidngan hira:
2 “Nalolooy ako ha mga tawo, kay tulo ka adlaw na nga nag-iinupod hira ha akon, ngan waray hira pagkaon.
3 Kon paulion ko hira nga gutom, bangin madismayo hira ha dalan, ngan an iba ha ira hirayo an gintikangan.”
4 Pero an mga disipulo nagsiring: “Diin kita makakakuha hin tinapay dinhi hinin hirayo nga lugar basi makakaon ini nga mga tawo?”
5 Nagpakiana hiya ha ira: “Pira nga tinapay an aada ha iyo?” Binaton hira: “Pito.”
6 Salit ginpalingkod niya ha tuna an mga tawo. Katapos ginkuha niya an pito nga tinapay, nagpasalamat, gintipik-tipik ito, ngan iginhatag ha mga disipulo basi ipanhatag ha mga tawo.
7 May-ada liwat hira pipira nga gudtiay nga isda, ngan katapos niya mag-ampo, iya ginsugo hira nga ipanhatag liwat ito.
8 Salit nangaon hira ngan nabusog, ngan gintirok nira an nahisalin nga mga tipik nga nakapuno hin pito nga dagku nga basket.
9 Mga 4,000 nga kalalakin-an an nakadto. Katapos iya ginpauli hira.
10 Ngan sinakay dayon hiya ha baluto upod an mga disipulo tipakadto ha syudad han Dalmanuta.
11 Nagkaabot didto an mga Pariseo ngan nakigdiskusyon ha iya, kay gin-aaroan hiya hin tigaman tikang ha langit basi sarihan hiya.
12 Salit nasubo gud hi Jesus ngan nagsiring: “Kay ano nga nangangaro hin tigaman ini nga henerasyon? Ha pagkamatuod susumatan ko kamo: Waray tigaman nga ihahatag hini nga henerasyon.”
13 Katapos ginbayaan niya an mga Pariseo, ngan sinakay utro hiya ha baluto ngan kinadto ha tabok nga baybayon.
14 Pero nahingalimot hira pagdara hin mga tinapay, ngan waray hira iba nga pagkaon ha baluto labot la han usa nga tinapay.
15 Ngan ginpahamangnoan niya hira: “Padayon kamo nga magbantay; mag-ikmat kamo ha libadura han mga Pariseo ngan ha libadura ni Herodes.”
16 Salit nagdiskusyon hira tungod kay waray hira magdara hin tinapay.
17 Han naobserbaran ini ni Jesus, nagsiring hiya: “Kay ano nga nagdidiskusyon kamo nga waray kamo pakadara hin tinapay? Diri pa ba niyo nasasabtan ngan nasasantop an kahulogan? Nakukurian ba kamo pagsabot?
18 ‘Bisan kon may mga mata kamo, diri ba kamo nakakakita, ngan bisan kon may mga talinga kamo, diri ba kamo nakakabati?’ Ngan diri ba kamo nahinunumdom
19 han gintipik-tipik ko an lima nga tinapay para ha 5,000 nga kalalakin-an? Pira ka basket an napuno han salin nga mga tipik nga iyo gintirok?” Binaton hira: “Dose.”
20 “Han gintipik-tipik ko an pito nga tinapay para ha 4,000 nga kalalakin-an, pira ka basket nga dagku an napuno han gintirok niyo an nahisalin nga mga tipik?” Binaton hira: “Pito.”
21 Salit nagsiring hiya: “Diri pa ba niyo nasasabtan an kahulogan?”
22 Katapos kinadto hira ha Betsaida. Didto, gindara ha iya han mga tawo an usa nga buta nga lalaki, ngan nakimalooy hira nga kaptan hiya ni Jesus.
23 Ginkaptan niya an kamot han buta ngan gintugwayan ngadto ha gawas han baryo. Katapos luraan an iya mga mata, ginkaptan hiya ni Jesus ngan ginpakianhan: “May-ada ka ba nakikita?”
24 An lalaki nagkita ha unhan ngan nagsiring: “Nakakakita ako hin mga tawo, kay baga hin may mga kahoy, pero nagkakalakat hira.”
25 Ginkaptan ni Jesus an mga mata han lalaki, salit nakakita hiya ngan nakita na niya hin klaro an ngatanan.
26 Katapos ginpauli hiya ni Jesus ngan ginsidngan: “Ayaw pagsulod ha baryo.”
27 Hi Jesus ngan an mga disipulo kinadto ha mga baryo han Cesarea Filipos, ngan ha dalan nagpakiana hiya ha mga disipulo: “Hin-o ako sumala ha mga tawo?”
28 Binaton hira: “Hi Juan nga Parabaptis; an iba nasiring, hi Elias; ngan an iba pa nasiring, usa han mga propeta.”
29 Ngan iya ginpakianhan hira: “Kondi para ha iyo, hin-o ako?” Binaton hi Pedro: “Ikaw an Kristo.”
30 Katapos gintugon gud hira ni Jesus nga diri magsumat ha bisan hin-o mahitungod ha iya.
31 Ginsumatan liwat niya hira nga an Anak han tawo kinahanglan mag-antos hin damu nga kasakitan ngan isalikway han katigurangan, punoan nga mga saserdote, ngan mga eskriba. Ngan papatayon hiya pero babanhawon paglabay hin tulo ka adlaw.
32 Prangka nga iginsumat niya ito. Pero gindara hiya ni Pedro ha ligid ngan gindid-an hiya.
33 Inatubang hi Jesus ha mga disipulo ngan ginkita hira, katapos iya ginsaway hi Pedro: “Ayaw ako pag-ulanga,* Satanas! kay imo gintatagad an panhunahuna han mga tawo, diri an panhunahuna han Dios.”
34 Ginpadaop niya an mga tawo ngan an mga disipulo ngada ha iya ngan nagsiring hiya: “An bisan hin-o nga naruruyag sumunod ha akon, isalikway niya an iya kalugaringon ngan pas-anon an iya pasakitan nga kahoy* ngan padayon nga sumunod ha akon.
35 Kay an bisan hin-o nga nagpapanalipod han iya kalag* mawawad-an hito, pero an bisan hin-o nga mawad-an han iya kalag tungod ha akon ngan han maopay nga sumat magtatalwas hito.
36 Kon sugad, ano an kapulsanan kon maangkon han usa nga tawo an bug-os nga kalibotan pero mawawara an iya kalag?
37 Ano gud ba an ihahatag han usa nga tawo sugad nga kabalyo han iya kalag?
38 Kay kon ako ngan an akon mga pulong ikaawod han bisan hin-o hinin diri-matinumanon ha Dios* ngan makasasala nga henerasyon, ikakaawod liwat hiya han Anak han tawo kon umabot na hiya ha himaya han iya Amay upod han baraan nga mga anghel.”
Mga footnote
^ Ha literal, “dida ka ha akon likod.”
^ Kitaa an Apendise 6.
^ O “kinabuhi.”
^ Ha literal, “nag-aadulteryo.”
