Marcos 3:1-35
3 Sinulod utro hi Jesus ha sinagoga, ngan may tawo didto nga uga an kamot.
2 Salit ginbinantayan hiya han mga Pariseo kon tatambalon ba niya ito nga tawo ha adlaw han Sabbath basi nira maakusaran hiya.
3 Ginsidngan niya an tawo nga uga an kamot: “Buhát ngan kadto ha butnga.”
4 Katapos nagsiring hiya ha ira: “Uyon ba ha balaud han Sabbath an pagbuhat hin maopay o maraot, an pagtalwas o pagpatay hin kalag?” Pero nagpabilin hira nga hilom.
5 Tungod kay nasusubo gud ha katig-a han ira kasingkasing, nasisina nga iya ginkinita hira, katapos ginsidngan niya an tawo: “Unata an imo kamot.” Gin-unat niya ito ngan nag-opay an iya kamot.
6 Tungod hito, an mga Pariseo nagkagawas ngan nakigsarabot dayon ha mga membro han partido ni Herodes nga patayon hi Jesus.
7 Katapos hi Jesus ngan an iya mga disipulo kinadto ha dagat, ngan sinunod ha iya an damu nga tawo tikang ha Galilea ngan Judea,
8 an iba tikang pa ha Jerusalem, ha Idumea, ha tabok han Jordan ngan ha palibot han Tiro ngan Sidon. Damu gud an kinadto ha iya han hinbatian nira an iya mga ginbuhat.
9 Ngan ginsidngan niya an mga disipulo nga mag-andam pirme hin gutiay nga baluto nga magagamit niya basi diri hiya maipit han damu nga tawo.
10 Tungod kay damu an iya gintambal, ginpalibotan hiya han ngatanan nga may grabe nga sakit basi makakapot ha iya.
11 Bisan an magraot nga espiritu, kon nakakakita ha iya, nahapa ha iya atubangan ngan naguliat: “Ikaw an Anak han Dios.”
12 Kondi damu ka beses nga iya ginsidngan hira nga diri gud magsumat ha iba mahitungod ha iya.
13 Katapos, sinagka hiya ha bukid ngan gintawag an iba han iya mga disipulo, ngan dinaop hira ha iya.
14 Ngan nagpili hiya hin 12 nga lalaki, ngan ini nga grupo gintawag niya nga mga apostol, nga igkakaupod niya ngan susugoon ha pagsangyaw
15 ngan tatagan hin awtoridad ha pagpagawas hin mga demonyo.
16 Ngan an 12 nga iya ginpili amo hira Simon nga ginngaranan liwat niya hin Pedro,
17 Santiago nga anak ni Sebedeo ngan Juan nga bugto ni Santiago (ginngaranan liwat niya hira hin Boanerges nga nangangahulogan “mga Anak han Dalugdog”),
18 Andres, Felipe, Bartolome, Mateo, Tomas, Santiago nga anak ni Alfeo, Tadeo, Simon nga Cananeo,
19 ngan Judas Iscariote, nga ha urhi nagtraydor kan Jesus.
Katapos, sinulod hi Jesus ha usa nga balay.
20 Nagtirirok utro didto an mga tawo, salit waray na hira makapangaon.
21 Kondi han nakabati an iya mga paryente mahitungod hito, kinadto hira basi dakpon hi Jesus, kay nagsiniring hira: “Nalulurong na hiya.”
22 Sugad man, an mga eskriba tikang ha Jerusalem nagsiring: “Aada ha iya hi Beelsebub, ngan nagpapagawas hiya hin mga demonyo pinaagi han magmarando han mga demonyo.”
23 Salit katapos niya padaupon hira, nagyakan hiya pinaagi hin mga ilustrasyon: “Paonan-o hi Satanas makakapagawas kan Satanas?
24 Kon nababahin an usa nga ginhadian, diri ito makakapadayon,
25 ngan kon nababahin an usa nga panimalay, diri ito makakapadayon.
26 Sugad man, kon ginkukontra ni Satanas an iya kalugaringon ngan nababahin hiya, diri hiya makakapadayon, kondi ito an iya magigin kataposan.
27 Ha pagkamatuod, an usa nga nakasulod ha balay han makusog nga tawo diri gud makakapangawat han mga panag-iya kon diri anay niya gapuson ito nga makusog nga tawo. Katapos, makakapangawat na hiya hito nga balay.
28 Ha pagkamatuod, susumatan ko kamo nga papasayloon an ngatanan nga sala nga ginbuhat han mga tawo ngan an pagpasipara nga ira ginyakan.
29 Kondi an bisan hin-o nga nagpapasipara ha baraan nga espiritu diri na gud mapapasaylo, ngan magpapadayon hiya nga salaan.”
30 Ginyakan ini ni Jesus tungod kay nagsiring hira: “May-ada hiya maraot nga espiritu.”
31 Ngan inabot an iya nanay ngan kabugtoan nga kalalakin-an, ngan samtang nagkakatukdaw hira ha gawas, ira iginpatawag hiya.
32 Damu nga tawo an nangangalingkod ha iya palibot, salit nagsiring hira ha iya: “Kitaa! Aadto ha gawas an imo nanay ngan kabugtoan, ginbibiling ka.”
33 Kondi nagsiring hiya: “Hin-o an akon nanay ngan an akon kabugtoan?”
34 Ginkita niya an nangangalingkod ha iya palibot ngan nagsiring: “Kitaa, an akon nanay ngan an akon kabugtoan!
35 An bisan hin-o nga nagbubuhat han kaburut-on han Dios hiya an akon bugto nga lalaki ngan bugto nga babaye ngan akon nanay.”
