Marcos 14:1-72
14 Duha na la ka adlaw isasaurog na an Paskua* ngan an Piyesta han Tinapay nga Waray Libadura. Ngan an punoan nga mga saserdote ngan mga eskriba nagbiniling hin malimbong nga paagi ha pag-aresto ngan pagpatay ha iya,
2 kay pauroutro nga nagsiring hira: “Ayaw naton ito buhata ha panahon han piyesta, kay bangin magsaramok an mga tawo.”
3 Han nakadto hi Jesus ha Betania, samtang nalingkod basi kumaon ha balay ni Simon nga may liprosi hadto, inabot an usa nga babaye nga may alabastro* nga surudlan han mahamot nga lana, nga puro nga nardo ngan marahalon gud. Gin-abrihan niya an alabastro nga surudlan ngan iginbubo ito ha ulo ni Jesus.
4 Tungod hito, nasina an iba ngan nagsiring: “Kay ano nga ginkakaragan iton mahamot nga lana?
5 Maibabaligya unta iton mahamot nga lana hin sobra 300 ka denaryo basi an kwarta maihatag ha mga pobre!” Ngan nasina gud hira ha babaye.
6 Pero hi Jesus nagsiring: “Pabay-i niyo hiya. Kay ano nga iyo ginsisinamok hiya? Maopay an iya ginbuhat ha akon.
7 An mga pobre pirme niyo kaupod, ngan kon karuyag niyo, pirme kamo makakabulig ha ira, pero ako diri niyo pirme makakaupod.
8 Ginbuhat niya an iya mahihimo. Ginpahiran niya hin mahamot nga lana an akon lawas sugad nga pangandam ha paglubong.
9 Ha pagkamatuod susumatan ko kamo: Bisan diin isangyaw an maopay nga sumat ha bug-os nga kalibotan, an ginbuhat hini nga babaye igsusumat liwat sugad nga paghinumdom ha iya.”
10 Ngan hi Judas Iscariote nga usa han 12 nga apostol kinadto ha punoan nga mga saserdote basi buligan hira pag-aresto kan Jesus.
11 Pakabati nira hito, nalipay hira ngan nagsaad nga tatagan hiya hin silber nga kwarta. Salit nagpinamiling hiya hin maopay nga higayon ha pagtraydor kan Jesus.
12 Ha primero nga adlaw han piyesta han tinapay nga waray libadura, nabatasan na an paghalad hin hayop para ha Paskua, salit an mga disipulo nagsiring ha iya: “Diin mo karuyag nga kumadto kami basi iandam an pagkaon para ha Paskua?”
13 Tungod hito ginsugo niya an duha han iya mga disipulo ngan ginsidngan hira: “Kadto kamo ha syudad, ngan tatapoon kamo hin lalaki nga may dara nga tibod hin tubig. Upod kamo ha iya,
14 ngan kon diin hiya sumulod, sidnga niyo an tagbalay, ‘An Magturutdo nasiring: “Hain an kwarto para ha bisita nga akon kakaonan para han panihapon ha Paskua upod an akon mga disipulo?” ’
15 Ngan ipapakita niya ha iyo an daku nga kwarto ha igbaw nga nakaandam na, ngan pag-andam kamo didto para ha aton.”
16 Salit kinadto an mga disipulo ha syudad ngan nakita nira ito sugad la han ginsiring ha ira ni Jesus, ngan nag-andam hira para ha Paskua.
17 Han tikagab-i na, inabot hiya upod an 12 nga apostol.
18 Ngan han nalingkod hira ha may lamesa ngan nangangaon, hi Jesus nagsiring: “Ha pagkamatuod susumatan ko kamo: Usa ha iyo nga kaupod ko yana ha pangaon an magtatraydor ha akon.”
19 Nasubo gud hira ngan an kada usa nagpakiana ha iya: “Ako ba?”
20 Binaton hiya: “Usa ha iyo nga 12 nga nadungan ha akon ha pagtunlob han iya kamot ha yahong.
21 Oo, an Anak han tawo mabaya sugad la han nahisurat na mahitungod ha iya. Pero kairo hito nga tawo nga magtatraydor ha Anak han tawo! Mas maopay pa kon waray na la hiya matawo.”
22 Ngan samtang nagpapadayon hira ha pangaon, kinuha hi Jesus hin tinapay, ngan katapos mag-ampo gintipik-tipik ito, iginhatag ha ira ngan nagsiring: “Kuha kamo; nagsisimbolo ini han akon lawas.”
23 Ngan ginkuha niya an kopa nga may bino, nag-ampo hiya, iginhatag ito ha mga apostol, ngan nanginom hira.
24 Katapos nagsiring hiya ha ira: “Nagsisimbolo ito han akon ‘dugo han kasabotan,’ nga igpapaagay para ha damu nga tawo.
25 Ha pagkamatuod susumatan ko kamo: Diri na gud ako mainom hin bisan ano nga bino tubtob ha adlaw nga uminom ako han bag-o nga bino ha Ginhadian han Dios.”
26 Katapos nira magkanta hin mga pagdayaw, kinadto hira ha Bukid han mga Olibo.
27 Ngan hi Jesus nagsiring ha ira: “Babayaan ako niyo ngatanan, kay ini an iginsurat: ‘Papatayon ko an paraataman, ngan an mga karnero magpapatlaag.’
28 Pero kabanhaw ko, mag-uuna ako ha iyo ngadto ha Galilea.”
29 Kondi hi Pedro nagsiring ha iya: “Bisan bayaan ka nira ngatanan, diri ko gud ikaw babayaan.”
30 Salit nagsiring hi Jesus: “Ha pagkamatuod susumatan ko ikaw, yana nga adlaw, oo yana mismo nga gab-i, antes tumugaok an manok hin makaduha, igninigar mo ako hin tulo ka beses.”
31 Pero nag-insister hi Pedro: “Bisan pa ako mamatay kaupod mo, diri ko gud ikaw igninigar.” Ito liwat an ginsiring han iba.
32 Katapos, kinadto hira ha Getsemani, ngan nagsiring hiya ha mga disipulo: “Lingkod kamo dinhi samtang nag-aampo ako.”
33 Igin-upod niya hira Pedro, Santiago, ngan Juan, ngan inabat hiya hin duro nga kasubo ngan kasakit.
34 Ngan nagsiring hiya ha ira: “Nasusubo gud an akon kalag nga haros ikamatay ko. Dinhi la kamo ngan magpadayon kamo ha pagbantay.”
35 Kinadto hiya ha unhan ngan yinukbo ha tuna ngan nag-ampo nga kon posible, palabyon ha iya ito nga oras.
36 Ngan nagsiring hiya: “Abba, Amay, an ngatanan nga butang posible ha imo; alayon kuhaa ha akon ini nga kopa. Pero diri uyon ha akon karuyag, kondi uyon ha imo karuyag.”
37 Katapos binalik hiya ngan naabtan niya nga nangangaturog hira, ngan nagsiring hiya kan Pedro: “Simon, kay ano nga nagkikinaturog ka? Waray ka ba kusog nga magpadayon pagbantay hin bisan usa la ka oras?
38 Padayon kamo nga magbantay ngan mag-ampo basi diri kamo madara han pagsulay. Oo, an espiritu disidido pero an lawas maluya.”
39 Ngan binaya utro hiya ngan nag-ampo mahitungod han amo gihapon nga butang.
40 Pagbalik niya utro, naabtan niya nga nangangaturog hira kay ginpipiraw na gud hira, salit diri hira maaram kon ano an ibabaton ha iya.
41 Ngan ha iya ikatulo nga pagbalik, nagsiring hiya ha ira: “Diri yana panahon nga mangaturog ngan mamahuway kamo! Pagkamata na kamo! Inabot na an oras! Kitaa! An Anak han tawo igtutubyan ha mga kamot han magpakasasala.
42 Buhát kamo, pagkalakat kita. Kitaa! Tikanhi na an magtatraydor ha akon.”
43 Han nagyayakan pa hiya, tigda nga inabot hi Judas nga usa han 12 nga apostol, upod an mga tawo nga may mga espada ngan mga ibaralbag. Tikang hira ha punoan nga mga saserdote, mga eskriba, ngan katigurangan.
44 Ngan an traydor naghatag ha ira hin tigaman uyon ha ginkasabotan, nga nasiring: “An akon harokan, amo ito hiya; arestoha niyo hiya ngan dad-a nga gwardyado hin maopay.”
45 Diniretso hiya pagdaop kan Jesus ngan nagsiring, “Rabbi!” ngan ginharokan hiya.
46 Salit ira ginkaptan hi Jesus ngan gin-aresto.
47 Kondi usa han mga naninindog an naghulbot han iya espada ngan gintigbas an uripon han hitaas nga saserdote salit napalong an talinga.
48 Pero hi Jesus nagsiring ha ira: “Kinanhi ba kamo basi arestuhon ako nga baga hin kawatan, nga nagdara pa kamo hin mga espada ngan mga ibaralbag?
49 Kada adlaw kaupod ako niyo samtang nagtututdo ha templo, pero waray ako niyo arestoha. Kondi nahitatabo ini basi matuman an Kasuratan.”
50 Ngan ginbayaan hiya han ngatanan nga disipulo ngan namalagiw.
51 Pero may nagsinunod kan Jesus nga batan-on nga lalaki nga an bado maopay nga klase hin tela, ngan nagsari hira pag-aresto ha iya,
52 kondi nahukasan hiya han bado ngan nakapalagiw nga waray bado.*
53 Katapos, gindara nira hi Jesus ha hitaas nga saserdote, ngan nagkatirok an ngatanan nga punoan nga saserdote, katigurangan pati mga eskriba.
54 Pero hi Pedro apartado nga sinunod ha iya tubtob ha bungsaran han hitaas nga saserdote, ngan nagliningkod hiya upod han mga surugoon ha balay ngan nagpapaso hirani ha kalayo.
55 Hito nga oras, karuyag han punoan nga mga saserdote ngan han bug-os nga Sanhedrin* nga makabiling hin testimonya kontra kan Jesus basi masentensyahan hiya hin kamatayon, pero waray hira nabilngan.
56 Damu gud an nagtestigo hin buwa kontra ha iya, pero an ira mga testimonya diri nagkakauruyon.
57 May nanindog liwat ngan nagtestigo hin buwa kontra ha iya, nga nagsiring:
58 “Hinbatian namon hiya nga nagyakan, ‘Bubungkagon ko ini nga templo nga ginhimo han mga kamot, ngan ha sulod hin tulo ka adlaw magtitindog ako hin iba nga diri hinimo han mga kamot.’ ”
59 Kondi mahitungod hini, an ira testimonya diri la gihapon nagkakauruyon.
60 Katapos, an hitaas nga saserdote tinindog ha butnga nira ngan nagpakiana kan Jesus: “Waray ka ba ibabaton? Ano an imo masisiring ha ira testimonya kontra ha imo?”
61 Pero waray pagtingog hi Jesus ngan waray gud hiya bumaton. Ginpakianhan utro hiya han hitaas nga saserdote: “Ikaw ba an Kristo, an Anak han Darayawon nga Dios?”
62 Binaton hi Jesus: “Oo, ako, ngan makikita niyo an Anak han tawo nga nalingkod ha too han Usa nga Gamhanan, ngan napakanhi upod han mga dampog ha langit.”
63 Tungod hito gin-gisi han hitaas nga saserdote an iya panapton ngan nagsiring: “Kinahanglan pa ba naton hin mga testigo?
64 Hinbatian niyo an iya pagpasipara. Ano an iyo desisyon?” Ginhukman nira ngatanan hi Jesus nga angay hiya patayon.
65 Gintuprahan hiya han iba, gintahoban an iya nawong, ginsuntok, ngan ginsidngan: “Kon propeta ka, tigoha kon hin-o an nagsuntok ha imo!” Katapos hiya tampaluhon, gindara hiya han mga gwardya han korte.
66 Hito nga oras, samtang nakadto hi Pedro ha ubos ha bungsaran, inabot an usa han mga surugoon nga babaye han hitaas nga saserdote.
67 Pakakita niya kan Pedro nga nagpapapaso hirani ha kalayo, ginkinita niya hi Pedro ngan ginsidngan: “Kaupod ka liwat ni Jesus nga Nazareno.”
68 Pero nagnigar hi Pedro: “Diri ako nakilala ha iya ngan diri ako maaram han imo ginyiyinakan,” ngan ginawas hiya ngadto ha may ganghaan.
69 Didto, pakakita ha iya han surugoon nga babaye, nagsiring na liwat hiya ha mga naninindog: “Usa hiya ha ira.”
70 Nagnigar na liwat hi Pedro. Ngan waray pag-iha an mga naninindog didto nagsiring liwat ha iya: “Sigurado nga kaupod ka nira kay taga-Galilea ka.”
71 Kondi nagsumpa hi Pedro nga maghihikaraot hiya kon diri hiya nagsusumat han kamatuoran ngan nagsiring: “Diri ko kilala ito nga tawo nga iyo ginsisiring!”
72 Ngan katapos gud hito, tinugaok an manok ha ikaduha nga higayon, ngan nahinumdom hi Pedro han ginsiring ni Jesus ha iya: “Antes tumugaok an manok hin makaduha, igninigar mo ako hin tulo ka beses.” Salit nasubo gud hi Pedro ngan nagtinangis.
Mga footnote
^ Kitaa an “Paskua” ha Glossary.
^ Kitaa an “Alabastro” ha Glossary.
^ O “pan-ilarom nga bado la an sul-ot.”
^ Kitaa an footnote ha Mat 26:59.
