Marcos 9:1-50
9 Dugang pa, hi Jesus nagsiring ha ira: “Ha pagkamatuod susumatan ko kamo: An iba nga naninindog dinhi diri mamamatay tubtob nga makita anay nira nga nagmamando na an Ginhadian han Dios.”
2 Paglabay hin unom ka adlaw, sinagka hi Jesus ha hitaas nga bukid, ngan hira Pedro, Santiago, ngan Juan la an iya igin-upod. Katapos nakita nira nga nabag-o an hitsura ni Jesus,
3 ngan an iya pantungbaw nga panapton nagin masilaw, nga mas mabusag pa kay ha bado nga ginpabusag han bisan hin-o nga paraglaba dinhi ha tuna.
4 Nakita liwat nira hira Elias ngan Moises nga nakikiistorya kan Jesus.
5 Katapos nagsiring hi Pedro kan Jesus: “Rabbi,* maopay kay nakaupod kami nganhi, salit magtitindog kami hin tulo nga tolda, usa para ha imo, usa para kan Moises, ngan usa para kan Elias.”
6 Ha pagkamatuod, diri maaram hi Pedro kon ano an iya bubuhaton kay nahadlok hira.
7 Ngan nagkaada hin dampog nga naglandong ha ira, ngan may tingog tikang ha dampog: “Ini an akon Anak nga hinigugma. Pamati kamo ha iya.”
8 Pero pagkita nira ha palibot, waray na hira iba nga nakita nga kaupod nira kondi hi Jesus na la.
9 Han nalugsad na hira ha bukid, gintugon gud niya hira nga diri isumat ha bisan hin-o an ira nakita tubtob nga banhawon an Anak han tawo.
10 Ginsunod gud nira ito, pero nag-iristorya hira kon ano an kahulogan han pagbanhaw.
11 Ngan nagpakiana hira ha iya: “Kay ano nga nasiring an mga eskriba nga kinahanglan mahiuna pagkanhi hi Elias?”
12 Binaton hiya: “Mahiuuna hi Elias pagkanhi ngan iya igpapahiuli an ngatanan nga butang, pero kay ano nga iginsurat nga an Anak han tawo mag-aantos hin damu nga kasakitan ngan isasalikway?
13 Susumatan ko kamo: Ha pagkamatuod, kinanhi na hi Elias pero ginbuhat nira ha iya an bisan ano nga ira karuyag, sugad han nahisurat mahitungod ha iya.”
14 Han hi Jesus ngan an tulo nga disipulo kinadto ha iba nga mga disipulo, nakita nira nga damu nga tawo an nakapalibot ha ira ngan an mga eskriba nakikigdiskusyon ha ira.
15 Kondi pakakita ha iya han mga tawo, nasurprisa hira ngan nagdadlagan ngadto ha iya basi tapoon hiya.
16 Nagpakiana hiya ha mga tawo: “Ano an gindidiskusyonan niyo ngan han mga disipulo?”
17 Ngan usa ha ira an binaton: “Magturutdo, gindara ko nganhi ha imo an akon anak nga lalaki kay ginsaniban hiya hin espiritu salit nangula hiya,
18 ngan kon ginpapasakitan hiya hito natutumba hiya ha tuna, ngan nagbubura an iya baba, nangingigot an ngipon, ngan nagluluya hiya. Ginsidngan ko an imo mga disipulo nga pagawson ito, pero waray nira ito mapagawas.”
19 Nagsiring hiya: “Waray pagtoo nga henerasyon, tubtob san-o ako makikig-upod ha iyo? Tubtob san-o ako magpapailob ha iyo? Dad-a hiya ha akon.”
20 Salit ira gindara ha iya an bata. Kondi pakakita han espiritu kan Jesus, ginpakisaykisay dayon hito an bata ngan katumba ha tuna, nagpuropulilid hiya nga nagbubura an baba.
21 Katapos ginpakianhan ni Jesus an tatay: “Kakan-o pa ini nagtikang mahitabo ha iya?” Binaton hiya: “Tikang pa han iya kabata,
22 ngan agsob hiya ilabog ha kalayo ngan ha tubig basi patayon hiya. Pero kon may mahihimo ka, malooy ka ha amon ngan buligi kami.”
23 Hi Jesus nagsiring ha iya: “Kay ano nga nasiring ka, ‘Kon may mahihimo ka’? Para ha usa nga may pagtoo, mahihimo an ngatanan.”
24 An tatay han bata nagyakan dayon ha daku nga tingog: “May pagtoo ako! Buligi ako nga magmarig-on an akon pagtoo!”
25 Pakakita ni Jesus nga an mga tawo nagdadadlagan ngada ha ira, ginsaway niya an maraot nga espiritu: “Ikaw nga espiritu nga nakakapangula ngan nakakapabungol, ginsusugo ko ikaw nga gumawas ha iya ngan ayaw na pagsulod utro ha iya.”
26 Katapos magginuliat ngan mangisaykisay hin damu ka beses, ginawas ito ngan nagin sugad hin patay an bata, salit an kadam-an nagsiring: “Patay na hiya!”
27 Pero ginkaptan hiya ni Jesus ha kamot ngan ginpabuhát, ngan binuhát hiya.
28 Salit han sinulod hi Jesus ha usa nga balay, an mga disipulo nagpakiana ha iya han hira na la: “Kay ano nga waray namon ito mapagawas?”
29 Binaton hiya: “Ito nga klase mapapagawas la pinaagi han pag-ampo.”
30 Binaya hira didto ngan kinadto ha Galilea, kondi diri niya karuyag nga may mahibaro hito.
31 Kay gintinutdoan ngan ginsinumatan niya an mga disipulo: “An Anak han tawo itutubyan ha iya mga kaaway, ngan ira papatayon hiya, pero bisan kon mamatay hiya, babanhawon hiya paglabay hin tulo ka adlaw.”
32 Pero waray hira makasabot han iya ginyinakan, ngan nahadlok liwat hira pagpakiana ha iya.
33 Katapos kinadto hira ha Capernaum. Han nakadto na hiya ha balay nagpakiana hiya ha ira: “Ano an iyo gindidiskusyonan ha dalan?”
34 Waray hira bumaton, kay ha dalan gindiskusyonan nira kon hin-o ha ira an gilalabawi.
35 Salit liningkod hiya ngan gintawag an 12 nga apostol ngan nagsiring ha ira: “Bisan hin-o nga karuyag magin una, kinahanglan magin urhi ngan magin surugoon han ngatanan.”
36 Katapos iya ginpatindog an usa nga bata ha butnga nira ngan gin-agbayan niya, ngan nagsiring hiya ha ira:
37 “Bisan hin-o nga nakarawat ha usa hini nga kabataan tungod ha akon ngaran, nakarawat ha akon, ngan bisan hin-o nga nakarawat ha akon, nakarawat diri la ha akon, kondi pati ha iya nga nagsugo ha akon.”
38 Hi Juan nagsiring ha iya: “Magturutdo, nakakita kami hin lalaki nga nagpapagawas hin mga demonyo pinaagi han imo ngaran, ngan gindid-an namon hiya kay diri naton hiya kaupod.”
39 Kondi hi Jesus nagsiring: “Ayaw hiya pagdid-i, kay waray makakahimo hin gamhanan nga buhat pinaagi han akon ngaran nga makakagyakan dayon hin maraot mahitungod ha akon,
40 kay an diri nakontra ha aton, nadapig ha aton.
41 Bisan hin-o nga nahatag ha iyo hin usa ka baso nga irimnon nga tubig tungod kay disipulo kamo han Kristo, ha pagkamatuod susumatan ko kamo, diri gud hiya mawawad-an hin balos.
42 Pero an bisan hin-o nga nakakapakdol ha usa hini nga mga ubos nga may pagtoo, mas maopay pa nga higtan hiya ha liog hin daku nga gilingan nga bato pariho ha ginbibirik han asno ngan ilabog hiya ha dagat.
43 “Ngan kon an imo kamot nakakapakdol ha imo, utda ito; mas maopay pa nga pungkol ka nga kumarawat han kinabuhi kay ha duha an imo kamot pero ilalabog ka ha Gehenna,* ha kalayo nga diri napaparong.
44 *——
45 Ngan kon an imo tiil* nakakapakdol ha imo, utda ito; mas maopay pa nga usa la an imo tiil nga kumarawat ka han kinabuhi kay ha duha an imo tiil pero ilalabog ka ha Gehenna.
46 ——
47 Ngan kon an imo mata nakakapakdol ha imo, ilabog ito; mas maopay pa nga masulod ka ha Ginhadian han Dios nga usa la an imo mata kay ha duha an imo mata pero ilalabog ka ha Gehenna,
48 diin an mga ulod diri namamatay ngan an kalayo diri napaparong.
49 “Kay bisan hin-o nga pariho hito nga mga tawo pag-aasinan hin kalayo.
50 An asin maopay, pero kon magtab-ang ito, paonan-o niyo maibabalik an kaasin hito? Magkaada kamo asin ha iyo kalugaringon, ngan makigmurayaw kamo ha usa kag usa.”
Mga footnote
^ Nangangahulogan, “Magturutdo.”
^ Kitaa an Apendise 9.
^ Kitaa an footnote ha Mat 17:21.
^ “Siki” an ginagamit han iba para hini nga pulong.
