Marcos 10:1-52
10 Tikang didto kinadto hi Jesus ha mga lugar ha giutan han Judea ngan ha tabok han Jordan, ngan nagkaabot na liwat an damu nga tawo. Sugad han iya nabatasan, nagtutdo hiya ha ira.
2 Dinaop ha iya an mga Pariseo, ngan basi sarihan hiya, ginpakianhan nira hiya kon igintutugot ba han balaud nga idiborsyo han usa nga lalaki an iya asawa.
3 Binaton hiya: “Ano an iginsugo ni Moises ha iyo?”
4 Nagsiring hira: “Igintugot ni Moises nga an bana maghimo hin kasuratan ha pagdiborsyo basi bulagan an iya asawa.”
5 Kondi hi Jesus nagsiring ha ira: “Tungod ha katig-a han iyo kasingkasing, iginsurat niya ini nga sugo ha iyo.
6 Ha tinikangan, ‘Iya ginhimo hira nga lalaki ngan babaye.
7 Tungod hini, babayaan han lalaki an iya tatay ngan an iya nanay,
8 ngan hira nga duha magigin usa nga unod,’ salit diri na hira duha, kondi usa na la nga unod.
9 Kon sugad, an gintampo han Dios diri pagbulagon han tawo.”
10 Han sinulod utro hiya ha balay, ginpakianhan hiya han mga disipulo mahitungod hini.
11 Ngan nagsiring hiya ha ira: “Bisan hin-o nga makigdiborsyo ha iya asawa ngan mag-asawa hin iba, nag-aadulteryo hiya,
12 ngan kon an babaye nga nakigdiborsyo ha iya bana mag-asawa hin iba, nag-aadulteryo hiya.”
13 Katapos, gindara han mga tawo kan Jesus an kabataan basi kaptan niya, pero ginpugngan hira han mga disipulo.
14 Pakakita hito ni Jesus, nasina hiya ngan nagsiring ha ira: “Pabay-i an kabataan nga kumadi ha akon; ayaw hira pagdid-i, kay an Ginhadian han Dios para ha mga sugad ha ira.
15 Ha pagkamatuod susumatan ko kamo: Bisan hin-o nga diri kumarawat han Ginhadian han Dios sugad han pagkarawat han usa nga bata, diri gud makakasulod hito.”
16 Ngan iya ginkugos an kabataan ngan ginbendisyonan hira nga ginkakaptan an ira ulo.
17 Han naglalakat hi Jesus, usa nga lalaki an dinalagan ngadto ha iya, linuhod ha iya atubangan, ngan nagpakiana: “Maopay nga Magturutdo, ano an kinahanglan ko buhaton basi mapanunod an kinabuhi nga waray kataposan?”
18 Binaton hi Jesus: “Kay ano nga gintatawag mo ako nga maopay? Waray iba nga maopay kondi an Dios la.
19 Maaram ka han mga sugo: ‘Diri ka magpatay, diri ka mag-adulteryo, diri ka mangawat, diri ka magtestigo hin buwa, diri ka manlimbong, pasidunggi an imo tatay ngan nanay.’ ”
20 An lalaki nagsiring: “Magturutdo, ginbubuhat ko na ito ngatanan tikang pa han akon kabata.”
21 Ginkita hiya ni Jesus ngan inabat hin gugma ha iya ngan nagsiring: “Usa an kulang ha imo: Lakat, ibaligya an imo mga gintatag-iya ngan ihatag ha mga pobre, ngan magkakaada ka bahandi ha langit, ngan kadi, sunod ha akon.”
22 Kondi nabido hiya hito nga baton salit linakat hiya nga masurub-on, kay damu an iya panag-iya.
23 Katapos kitaon ni Jesus an mga tawo, nagsiring hiya ha mga disipulo: “Makuri gud makasulod ha Ginhadian han Dios an mga tawo nga damu an kwarta!”
24 Pero nahipausa an mga disipulo ha iya ginyakan. Salit nagsiring hi Jesus: “Mga anak, makuri gud an pagsulod ha Ginhadian han Dios!
25 Mas masayon pa an kamel makalusot ha luho han dagum kay ha makasulod ha Ginhadian han Dios an riko nga tawo.”
26 Mas nahipausa pa gud hira ngan nagpakiana ha iya: “Hin-o man la an matatalwas?”
27 Ginkita hira ni Jesus ngan ginsidngan: “Ha mga tawo imposible ito, pero ha Dios diri, kay an ngatanan posible ha Dios.”
28 Hi Pedro nagsiring: “Kitaa! Ginbayaan namon an ngatanan ngan nagsisinunod ha imo.”
29 Nagsiring hi Jesus: “Ha pagkamatuod susumatan ko kamo: Bisan hin-o nga binaya ha balay o kabugtoan o nanay o tatay o mga anak o kaumhan tungod ha akon ngan han maopay nga sumat
30 makarawat yana nga panahon hin 100 ka pilo nga balay, kabugtoan, nanay, anak, ngan kaumhan, pati mga pagtimaraot, ngan ha maabot nga sistema kinabuhi nga waray kataposan.
31 Pero damu nga nahiuuna an mahiuurhi, ngan an nahiuurhi mahiuuna.”
32 Han nagbabaktas hira ha dalan tipakadto ha Jerusalem, hi Jesus nag-uuna ha ira, ngan nahipausa an mga disipulo, pero nahadlok an iba pa nga nagsinunod. Iya ginkaistorya utro an 12 nga apostol ngan ginsumatan hira han mahitatabo ha iya:
33 “Tikadto kita ha Jerusalem, ngan an Anak han tawo itutubyan ha punoan nga mga saserdote ngan ha mga eskriba. Huhukman nira hiya hin kamatayon ngan itutubyan ha mga tawo han mga nasud,
34 ngan hihimoon hiya nga pataraw-an, tutuprahan, lalatiguhon, ngan papatayon, pero paglabay hin tulo ka adlaw babanhawon hiya.”
35 Ngan an duha nga anak ni Sebedeo nga hira Santiago ngan Juan dinaop ha iya ngan nagsiring: “Magturutdo, karuyag namon nga buhaton mo an anoman nga hangyoon namon ha imo.”
36 Nagsiring hiya: “Ano an karuyag niyo nga buhaton ko para ha iyo?”
37 Binaton hira: “Tuguti kami nga makalingkod kaupod mo kon magmando ka na ha imo Ginhadian, an usa ha imo too ngan an usa ha imo wala.”
38 Kondi hi Jesus nagsiring: “Diri kamo maaram han iyo gin-aaro. Makakainom ba kamo ha kopa nga akon gin-iinoman, o magpapabawtismo ba kamo ha bawtismo nga iginbabawtismo ha akon?”
39 Binaton hira: “Makakainom kami.” Nagsiring hi Jesus ha ira: “Mainom kamo ha kopa nga akon gin-iinoman, ngan babawtismohan kamo ha bawtismo nga iginbabawtismo ha akon.
40 Pero ini nga paglingkod ha akon too ngan wala diri ako an nagbubuot, kay para ito ha mga gin-andaman han akon Amay.”
41 Han nabatian ito han napulo, nasina hira kanda Santiago ngan Juan.
42 Pero katapos hira tawagon ni Jesus, nagsiring hiya: “Maaram kamo nga an gintatagad nga mga magmarando han mga nasud nagpapakaagaron ha mga tawo ngan an mga prominente ha ira nagamit hin awtoridad ha ira.
43 Diri kamo magin sugad hito, lugod an bisan hin-o nga karuyag magkaada daku nga awtoridad ha iyo kinahanglan magin surugoon niyo,
44 ngan an bisan hin-o nga karuyag magin una ha iyo kinahanglan magin uripon han ngatanan.
45 Kay bisan an Anak han tawo kinanhi, diri basi pagserbihan kondi basi magserbi ngan maghalad han iya kalag* sugad nga lukat para ha damu nga tawo.”
46 Ngan kinadto hira ha Jerico. Kondi han tigawas na hiya ha Jerico upod an mga disipulo ngan damu nga tawo, an buta nga makililimos nga hi Bartimeo nga anak ni Timeo, nalingkod ha ligid han dalan.
47 Han hinbatian niya nga naagi hi Jesus nga Nazareno, nagsinggit hiya: “Anak ni David, Jesus, malooy ka ha akon!”
48 Tungod hito, damu an nagsiring ha iya nga diri mag-inaringasa, pero dinugang la hiya pagsininggit: “Anak ni David, malooy ka ha akon!”
49 Salit inundang hi Jesus ngan nagsiring: “Tawaga niyo hiya.” Gintawag nira an buta ngan ginsidngan: “Magmarig-on ka! Buhát, kay gintatawag ka niya.”
50 Iginwaklit niya an iya pantungbaw nga panapton ngan tinindog dayon basi dumaop kan Jesus.
51 Ginpakianhan hiya ni Jesus: “Ano an karuyag mo nga buhaton ko para ha imo?” Binaton an buta: “Rabboni, buligi ako nga makakita utro.”
52 Ngan hi Jesus nagsiring ha iya: “Lakat, tungod han imo pagtoo nag-opay ka.” Nakakita dayon hiya, ngan nag-inupod kan Jesus ha dalan.
Mga footnote
^ O “kinabuhi.”
