Marcos 16:1-20
16 Katapos han Sabbath, hira Maria Magdalena, Maria nga nanay ni Santiago, pati hi Salome namalit hin mga pahamot basi ipahid ha lawas ni Jesus.
2 Ngan aga pa han primero nga adlaw han semana, kinadto hira ha lubnganan pagsirang han adlaw.
3 Nag-iristorya hira: “Hin-o an aton pakukuhaon han bato tikang ha ganggang han lubnganan?”
4 Kondi pagkita nira, ginkuha na an bato bisan kon daku gud ito.
5 Pagsulod nira ha lubnganan, nakakita hira hin batan-on nga lalaki nga an bado hilaba ngan busag. Nalingkod hiya ha too nga dapit, ngan nahipausa gud hira.
6 Nagsiring hiya ha ira: “Ayaw kamo kahipausa. Maaram ako nga ginbibiling niyo hi Jesus nga Nazareno nga iginraysang ha kahoy. Ginbanhaw na hiya, waray na hiya dinhi. Kitaa niyo an ginlubngan ha iya.
7 Salit lakat kamo, sumati an iya mga disipulo ngan hi Pedro, ‘Mag-uuna hiya ha iyo ngadto ha Galilea, ngan makikita niyo hiya didto, sugad han ginsiring niya ha iyo.’ ”
8 Paggawas nira ha lubnganan, nagdadlagan hira nga nangungurog ngan nahipapausa gud. Pero waray hira ginsumatan kay nahahadlok hira.*
HALIPOT NGA KONKLUSYON
Kondi an ngatanan nga sugo ha ira iginsaysay nira hin halipot ha mga kaupod ni Pedro. Dugang pa, katapos hini iginpadara ni Jesus pinaagi ha ira an baraan nga mensahe nga waray tubtoban an kapulsanan mahitungod han waray kataposan nga katalwasan, tikang ha este tubtob ha weste.
HILABA NGA KONKLUSYON
9 Kabanhaw ni Jesus temprano ha aga han primero nga adlaw han semana, nagpakita hiya siyahan kan Maria Magdalena, nga hadto may ginpagawas hi Jesus tikang ha iya nga pito nga demonyo.
10 Linakat hiya ngan iginsumat ito ha mga nakaupod ni Jesus kay nasusubo hira ngan nananangis.
11 Kondi han hinbaroan nira nga nabanhaw hiya ngan nakita mismo ni Maria, waray hira tumuod.
12 Katapos hini, nagpakita liwat hi Jesus ha duha nga disipulo pinaagi hin iba nga dagway, ngan inupod hiya samtang naglalakat hira tipakadto ha kaumhan,
13 ngan binalik hira basi sumatan an iba nga mga apostol, kondi waray liwat hira tumuod ha ira.
14 Katapos, nagpakita hi Jesus ha 11 nga apostol samtang nangangalingkod hira ha may lamesa. Ngan iya ginsaway hira tungod han ira kawaray pagtoo ngan katig-a han kasingkasing, kay waray hira tumuod ha mga nakakita nga nabanhaw na hiya.
15 Ngan nagsiring hiya ha ira: “Kadto kamo ha bug-os nga kalibotan ngan isangyaw niyo an maopay nga sumat ha ngatanan nga tawo.
16 Hiya nga natoo ngan nagpapabawtismo matatalwas, kondi hiya nga diri natoo sisirotan.
17 Dugang pa, ini an mga tigaman nga makikita ha mga natoo: Pinaagi han akon ngaran, magpapagawas hira hin mga demonyo; magyayakan hira hin iba-iba nga pinulongan;
18 pupuruton nira an mga halas; ngan kon uminom hira hin bisan ano nga makamaratay, diri gud hira madadaot. An magsakit ira kakaptan ngan mag-oopay.”
19 Katapos magyakan ha ira an Ginoo nga hi Jesus, gindara hiya ha langit ngan liningkod ha too han Dios.
20 An mga disipulo nagkalakat ngan nagsangyaw ha iba-iba nga lugar. Ginbuligan hira han Ginoo ngan gintagan hin gahum ha pagbuhat hin mga tigaman basi ipakita nga tinuod an mensahe.
Mga footnote
^ An masasarigan nga mga manuskrito han Biblia natatapos ha mga pulong nga mababasa ha bersikulo 8. Kondi an iba nga kadaan nga mga manuskrito may hilaba nga konklusyon, ngan an iba pa nga naurhi nga mga manuskrito may halipot nga konklusyon nga masunod hini. Ini nga masunod nga mga konklusyon diri gintatagad nga bahin han giniyahan nga Kasuratan.
