Nahimiya 9:1-38
9 Ha aginan 24tta gallassi Israaꞌeelati issippe shiiqidosona; eti waaruwa maayidi, bantta bolli baanaa toskkayiiddi xoomidosona.
2 Israaꞌeela yarati yaati simmidi, hara biittaa asa ubbaappe banttana gaxayidosona, qassi eti denddi eqqidi bantta nagaraanne bantta aawatu mooruwa paaxidosona.
3 Eti bantta deꞌiyosan eqqidi bantta Xoossaa Yihoowa Higgiya maxaafaappe bantta qaalaa xoqqu oottidi heezzu saatiyawu* nabbabidosona, qassi hara heezzu saatiyawu bantta nagaraa paaxidosonanne bantta Xoossaa Yihoowa sinttan gufannidosona.
4 Yeshuwi, Bani, Qadimiꞌeeli, Shebaniyi, Buni, Sherebiyi, Baninne Kenani Leewatu xoqqa daraphphan* eqqidi bantta qaalaa xoqqu oottidi bantta Xoossaa Yihoowa woossidosona.
5 Qassi Leewata gidida Yeshuwi, Qadimiꞌeeli, Bani, Hashabiniyi, Sherebiyi, Hodiyi, Shebaniyinne Patahiyi hagaadan giidosona: “Denddidi intte Xoossaa Yihoowa meri merinawu* sabbite. Qassi woraaba ubbaappenne saba ubbaappe xoqqu xoqqu giida ne bonchcho sunttaa eti sabbona.
6 “Ne xalaalay Yihoowa; neeni salota, ee, salotu saluwanne A olanchchata ubbaa, saꞌaanne an deꞌiyaba ubbaa, abbaanne A giddon deꞌiyaba ubbaa medhdhadasa. Neeni eta ubbaa paxa wottaasa, qassi saluwa olanchchati neeyyo ziggoosona.
7 Neeni Abrama doorada, Kaladatu katamaa Urappe kessada, Abrahaama gaada A sunttida tumu Xoossaa Yihoowa.
8 Neeni I neeyyo wozanappe ammanettiyogaa beꞌadasa; hegaa gishshawu Kanaanetu, Hitetu, Amoretu, Perzzetu, Yabusatunne Gerggesatu biittaa ayyonne A zerettawu immanawu aara maacettadasa; qassi ne qaalaa naagadasa, ayssi giikko neeni xillo.
9 “Hegaa gishshawu, nu mayzza aawati Gibxxen waayettido waayiya beꞌadasa, qassi Zoꞌo Abban eta waasuwa siyadasa.
10 Yaatada, Paaroona, A ashkkarata ubbaanne A biittan deꞌiya asa ubbaa qaxxayanawu malaatatanne malaaliyabata oottadasa; ayssi giikko, eti ne asaa bolli otorettidi oottidobaa eraasa. Neeni hachchi gakkanawu ne sunttay erettanaadan oottadasa.
11 Eti mela biittaara pinnana mala eta sinttan abbaa shaakkadasa; qassi balbbuqettiya abban olettida shuchchaadan, eta yedettiyageeta ciimman oladasa.
12 Neeni gallassi shaaraa tuussan, qassi qamman eti baana bessiyo ogee pooꞌana mala tamaa tuussan eta kaalettadasa.
13 Neeni Siinaa Deriyan wodhdhadasa, qassi saluwappe eta haasayissadasa; yaatada xillo pirddata, tumaa higgeta,* loꞌꞌo wogatanne azazota etawu immadasa.
14 Neeni ne geeshsha sambbataa eta erissadasa, qassi neeyyo haggaaziya Muuse baggaara azazota, wogatanne higgiya etawu immadasa.
15 Eti namisettido wode, saluwappe etawu qumaa immadasa, eti saamettido wode zaallaappe haattaa kessadasa, qassi neeni etawu immanawu caaqqido* biittaa gelidi laattanaadan etawu yootadasa.
16 “Shin eti, nu mayzza aawati otorettidosona, zozza gididosonanne* ne azazota siyibookkona.
17 Eti siyennan ixxidosona, qassi neeni etawu oottido malaaliya gitabata hassayibookkona; shin eti zozza gididosonanne* Gibxxe aylletettawu guyye simmanawu banttana kaalettiyagaa sunttidosona. Gidikkonne neeni atto gaanawu giiga uttida, qarettiyanne maariya, hanqquwawu eesotennanne tasenna siiqoy darido Xoossaa; qassi neeni eta agga bayabaakka.
18 Eti birataappe miizzaa maraa misiliya banttawu medhdhidi, “Hagee Gibxxeppe nena kaalettidi kessida ne Xoossaa” yaagidosona, qassi keehi toochchiyogaa bessiyabata oottidosona.
19 Yaanidaba gidikkonne, ne maarotay gita gidiyo gishshawu, bazzuwan eta aggaagabaakka. Gallassi ogiyan eta kaalettanawu shaaraa tuussay, woy qamman eti baana bessiyo ogee pooꞌana mala tamaa tuussay etappe shaahettibeenna.
20 Neeni eta akeekanchcha oottanawu ne loꞌꞌo ayyaanaa immadasa, ne mannaa eta doonaappe wotta ekkabaakka, eti saamettido wode etawu haattaa immadasa.
21 Neeni 40 layttawu bazzuwan etawu qumaa immadasa. Etawu aybinne paccibeenna. Eta maayoy wuribeenna, qassi eta tohoy kixxibeenna.
22 “Eti Sihona biittaa, hegeekka Heshibona kawuwa biittaa, hegaadankka Bashana kawuwa Oga biittaa laattana mala, kawotettatanne dereta shaakka shaakkada etawu immadasa.
23 Qassi eta naata saluwa xoolinttiyadan corayadasa. Yaatada, eti gelidi laattanaadan eta mayzza aawatuyyo neeni qaalaa gelido biittaa eta ehaadasa.
24 Hegaa gishshawu, eta naati he biittaa gelidi laattidosona, qassi neeni he biittan deꞌiya Kanaaneta eta sinttan xoonadasa; neeni eta kawotakka, he biittan deꞌiya deretakka Israaꞌeelati banttana ufayssidabaa oottanaadan eta kushiyan aatta immadasa.
25 Eti gimbbettida katamatanne aradda biittaa oyqqidosona, qassi loꞌꞌoba ubbay kumido keettaa, bookettida haattaa ollaa, woyniya gadiya, wogaraa gadiyanne ayfiya daro mittata laatadan ekkidosona. Yaaniyo gishshawu eti miidi kallidosonanne orddidosona, qassi neeni etawu oottido loꞌꞌoba ubban keehi ufayttidosona.
26 “Gidoppe attin, eti azazettibookkonanne ne bolli makkalidosona, qassi ne Higgiyawu zokkuwa zaaridosona.* Eti neekko simmana mala eta akeekissida, hiraagaa yootiya ne asata woridosona, qassi nena keehi toochchiyogaa bessiyabata oottidosona.
27 Hegaa gaasuwan, eta ubbatoo wayssida morkketu kushiyan eta aatta immadasa. Shin eti waayettido wode neekko waassidosona, yaatin neeni saluwappe siyadasa; qassi ne gita maarotaappe denddidaagan, morkketu kushiyappe eta ashshanawu, ashshiyageeta etawu immadasa.
28 “Shin eti woppaa demmidosaara, ne sinttan iitabaa zaarettidikka oottidosona, yaatin naaqqidi haariya* morkketu kushiyan eta agga bayadasa. He wode eti neekko simmidi maaduwawu waassidosona, yaatin neeni saluwan siyada, ne gita maarotaappe denddidaagan zaara zaarada eta ashshadasa.
29 Ne Higgiyakko eta guyye zaaranawu, eti naagettana mala neeni yootidaba gidikkonne, eti otorettidosonanne ne azazota siyennan ixxidosona; qassi eti ne wogata naagibeenna gishshawu nagaraa oottidosona, he wogati eta naagiya urawu deꞌuwa immiyageeta. Shin eti zozzu giidi neeyyo zokkuwa zaaridosonanne makkalidosona,* qassi siyennan ixxidosona.
30 Neeni daro layttawu eta keehi danddayadasa, qassi hiraagaa yootiya ne asatu baggaara eti naagettanaadan ne ayyaanan yootiyogaa aggabaakka, shin eti siyennan ixxidosona. Wurssettan, eta yuushuwan deꞌiya deretu kushiyan eta aatta immadasa.
31 Ne maarotay gita gidiyo gishshawu neeni eta xayssabaakka, woy agga bayabaakka; ayssi giikko neeni qarettiyanne* maariya Xoossaa.
32 “Simi nu Xoossawu, gita, wolqqaamanne hoola giyo, ne maachchaa naagiyanne tasenna siiquwa bessiya Xoossawu, Asoore kawotu wodiyappe hachchi gakkanawu, nuuni, nu kawoti, nu daannati, nu kahineti, hiraagaa yootiya nu asati, nu mayzza aawatinne ne asay ubbay waayettido waayiya xaasaya xeelloppa.
33 Nu bolli gakkida waaye ubban neeni xillo, ayssi giikko neeni ne qaalaa poladasa; shin iitabaa oottidaageeti nuna.
34 Nu kawoti, nu daannati, nu kahinetinne nu mayzza aawati ne higgiya naagibookkona, woykko eti naagettana mala neeni yootido ne azazota woy ne hassayissota wudidi xeellibookkona.
35 Eti bantta kawotettan deꞌiyo, neeni etawu darissada immido loꞌꞌobatun ufayttiyo, qassi neeni eta wottido aahonne aradda biittan deꞌiyo wodekka, neeyyo haggaazibookkonanne bantta iita oosota aggibookkona.
36 Hegaa gishshawu nuuni haꞌꞌi hagan aylle, ee, an ayfidabata maanaadaaninne an deꞌiya loꞌꞌobatun ufayttanaadan neeni nu mayzza aawatuyyo immido biittan aylle.
37 An ayfida keehi darobay, nu nagaraa gaasuwan neeni nu bolli kawoyido hara biittaa kawotuba. Eti nunanne nu mehiya banttana loꞌꞌidaagaadan haaroosona, qassi nuuni keehi waayettiiddi deꞌoos.
38 “Yaaniyo gishshawu, ha ubbabaa gaasuwan, nuuni xaafidi mintti maacettiiddi deꞌoos, qassi hegee nu daannatu, nu Leewatunne nu kahinetu maatafan minnidaba gidees.”
Footnotes
^ Mise, “gallassawu oyddaappe issi kushiya.”
^ Woykko “madirakiyan.”
^ Woykko “merinaappe merinaa gakkanawu.”
^ Woykko “ammanttiya higgeta.”
^ Mise, “ne kushiya denttido.”
^ Mise, “bantta morggiya kebeelissidosonanne.”
^ Mise, “morggiya kebeelissidosonanne.”
^ Mise, “ne Higgiya bantta zokkuwappe guyye baggi olidosona.”
^ Woykko “eta mentterettiya.”
^ Mise, “bantta morggiya kebeelissidosona.”
^ Woykko “kehanne.”
