Nahimiya 1:1-11
1 Hakaliya naꞌay Nahimee* yootidobaa: Kisilewa* aginan, 20tta layttan, taani Shushanan* yuushoy gimbbettido sohuwan* deꞌays.
2 He wode ta ishanttuppe issoy Hananiꞌi hara asaara Yihudaappe yiis; yaatin, omoodduwappe simmida Ayhudatubaa eta oychchaas, qassi Yerusalaamebaakka oychchaas.
3 Eti hagaadan zaaridosona: “Omoodduwappe simmidi moottan* deꞌiyageeti keehi yashshiya hanotan kawuyyidi deꞌoosona. Yerusalaame dirssay laalettiis, A penggetikka taman xuugettidosona.”
4 Taani hegaa siyidosaara, uttada yeekkiyogaa doommaas, qassi saluwa Xoossaa sinttan unddenna gallassawu kayyottaas, xoomaasinne woossaas.
5 Taani hagaadan gaas: “Saluwa Xoossaa Yihoowaa, nena siiqiyageetuyyonne ne azazota naagiyageetuyyo tasenna siiquwa bessiyanne etaara maacettido ne maachchaa naagiya gitanne hoola giyo Xoossawu,
6 hayyanaa, neeyyo haggaaziya taani hachchi woossiyo woosaa loyttada ezgga, qassi tabaa wudada xeella; Israaꞌeela asay oottido nagaraa ubbaa paaxaydda, neeyyo haggaaziya Israaꞌeelatubawu gallassinne qammi woossays. Taanikka ta aawaa keettaykka nagaraa oottida.
7 Neeyyo haggaaziya Muuseyyo neeni immido azazota, wogatanne pirddata naagennan aggiyogan nuuni suure gidennabaa ne bolli oottidoogee erettidaba.
8 “Hayyanaa, neeyyo haggaaziya Muusa neeni hagaadan gaada azazidobaa* hassaya: ‘Intte ammanettennaba gidikko, taani inttena deretu giddon piskki oottada laalana.
9 Shin intte taakko simmikko, qassi ta azazota naagikkonne etawu azazettikko, saꞌaa gaxaa gakkanaashin intte asay laalettiyakkokka, taani yaappe eta shiishshana; yaatada, ta sunttay deꞌanaadan taani doorido sohuwa eta ehaana.’
10 Eti neeni ne gita wolqqaaninne ne wolqqaama kushiyan wozido neeyyo haggaaziyageetanne ne asata.
11 Yihoowaa, hayyanaa, neeyyo haggaaziya taani woossiyo woosaanne ne sunttawu yayyiyogan ufayttiya neeyyo haggaaziyageetu woosaa loyttada ezgga; hayyanaa, kawoy taayyo qarettanaadaaninne taani hachchi oychchiyobaa I taayyo eeno gaanaadan ootta.”
He wode taani kawuwassi ushshaa tigiyagaa.
