Nahimiya 2:1-20
2 Niisaana* aginan, Kawuwa Arxxekisesa haaruwawu 20tta layttan, woynee A sintti shiiqiis, qassi kaseegaadankka taani woyniya ekkada kawuwassi immaas. Shin taani kawuwa sinttan mule azzana erikke.
2 Yaatiyo gishshawu, kawoy tana, “Neeni sahettennan hagaa keeni keehi azzanidoy aybissee? Hagee wozanan azzaniinappe attin haraba gidenna” yaagiis. Yaatin taani keehi yayyaas.
3 Hegaappe simmin, taani kawuwassi hagaadan gaas: “Kawoy merinawu deꞌo! Ta mayzza aawati moogettido katamay laaletti uttidaashin, A penggetikka taman xuugetti uttidaashin taani waana azzanikkinaa?”
4 Yaatin kawoy tana, “Neeni koyiyobay aybee?” yaagiis. Taani sohuwara saluwa Xoossaa woossaas.
5 Hegaappe simmada, taani kawuwassi hagaadan gaas: “Hegee kawuwa ufayssiyaba gidikko, qassi neeni ne ashkkaran ufayttidaba gidikko, taani katamaa zaarettada keexxana mala, ta mayzza aawati moogettido katamaa, Yihudaa baanaadan tana yedda.”
6 Yaatin, kawiya A miyyiyan uttidaashin, kawoy tana, “Manddaray ay keena wodiya wurssanee, qassi awude simmuutee?” yaagiis. Hegaa gishshawu, tana yeddanawu kawoy ufayttidoogaa akeekaas, qassi taani awude simmanaakko ayyo yootaas.
7 Qassi taani kawuwayyo hagaadan gaas: “Hegee kawuwa ufayssiyaba gidikko, taani Yihudaa gakkanaashin eta biittaara saro kanttanaadan Shaafaappe Hefintta moottaa* haariyageeti eeno gaana mala dabddaabbee taayyo imetto,
8 qassi Keettaa* Qatuwa penggetussi, katamaa dirssaa gimbbiyassinne taani baada deꞌana keettaassi mittaa taayyo immana mala, Kawuwa Woraa* naagiya Asaafawu dabddaabbee xaafetto.” Hegaa gishshawu, kawoy hegeeta taayyo immiis; ayssi giikko, ta Xoossaa keha kushee ta bolli deꞌees.
9 Guyyeppe, taani Shaafaappe Hefintta moottaa haariyageetukko baada, kawuwa dabddaabbiya etawu immaas. Qassi kawoy olaa gadaawatanne paraasata tanaara yeddiis.
10 Bet-horona asa gidiya Sanbbalaxinne Ammona asa gidiya, suntta* gidida Xobbee hegaa siyido wode, issi uri Israaꞌeela asawu loꞌꞌobaa oottanawu yiidoogan keehi yiillotidosona.
11 Wurssettan taani Yerusalaame gakkada, yan heezzu gallassaa takkaas.
12 Taani qamman denddaas, qassi amarida asati tanaara deꞌoosona; taani Yerusalaameyyo oottanaadan Xoossay ta wozanan wottidobaa ooyyonne yootabeykke, qassi taani toggido mehiyappe hara mehee ta matan baawa.
13 Taani qamman Wombbaa Penggiyara kiyada, Gita Shooshshaa Pulttuwa sinttaara kanttada, Guufettida Bidinttaa Penggiya gakkanawu baas, qassi laalettida Yerusalaame dirssaa gimbbiyanne taman xuugettida A penggeta xomoosaas.
14 Qassi Pulttuwa Penggiyakkonne Kawuwa Dalbbanttaakko baas, shin taani toggido mehiya kanttissiya sohoy baawa.
15 Gidikkonne, qamman wombbaara* pude kiyada dirssaa gimbbiya aggennan xomoosaas, hegaappe simmin guyye yaada, Wombbaa Penggiyara gelada soo simmaas.
16 Sima maataawati taani biidosaanne taani oottaydda deꞌiyobaa eribookkona; ayssi giikko, Ayhudatussi, kahinetussi, xoqqa maataawatussi, sima maataawatussinne hara oosanchchatussi taani aybanne odabeykke.
17 Wurssettan taani etayyo hagaadan gaas: “Nuuni ay mala yashshiya hanotan deꞌiyakko, Yerusalaamee ay keena laalettidaakko, qassi A penggeti taman ay keena xuugettidaakko beꞌana danddayeeta. Haa yiite, hagaadan kawuyyidi deꞌiigennaadan Yerusalaame dirssaa ane zaarettidi gimbboos.”
18 Yaatada, ta keha Xoossay tana ay keena maaddidaakko* etawu yootaas, qassi kawoy taayyo odidobaakka yootaas. Yaatin eti, “Ane denddidi gimbboos” yaagidosona. Yaaniyo gishshawu, eti loꞌꞌo oosuwa oottanawu issoy issuwa* minttettidosona.
19 Bet-horona asa gidiya Sanbbalaxi, Ammona asa gidiya, suntta* gidida Xobbeenne Araba asa gidiya Geshemi hegaa siyido wode, nuna qilliicciyogaa doommidosona, qassi eti nuna karidosonanne hagaadan giidosona: “Intte ay oottiiddi deꞌeetii? Kawuwa bolli makkaliiddi deꞌeetii?”
20 Gidoppe attin, taani hagaadan gaada zaaraas: “Nuuyyo ushachchanaadan oottiyay saluwa Xoossaa; nuuni ayyo haggaaziyageeti denddidi gimbbana, shin inttena Yerusalaamen gattiyabi, woy intteyyo maati, woy inttena hassayissiyabi aybinne baawa.”
Footnotes
^ Guj. B15 xeella.
^ Woykko “Efiraaxiisa pinnidi.”
^ Woykko “Beeta Maqidasiya; Xoossaa Garuwa.”
^ Woykko, “kawoy allaxxiyosaa.”
^ Mise, “ashkkara.”
^ Woykko “melida shaafaara.”
^ Woykko “ta Xoossaa keha kushee ay keena ta bolli deꞌiyakko.”
^ Mise, “bantta kushiya minttidosona.”
^ Mise, “haggaaziyagaa.”
