Nahimiya 12:1-47
12 Salaatiyala naꞌaa Zarubaabeelaaranne Yeshuwara kiyida kahinetinne Leewati hageeta: Kahineti Seraya, Ermmaasa, Izira,
2 Amariya, Malluka, Haxxusha,
3 Shekaniya, Rehuma, Meremota,
4 Iddoꞌa, Ginnetoꞌa, Abiya,
5 Miyamina, Maꞌadiya, Bilgga,
6 Shemaya, Yoyariba, Yedaya,
7 Salla, Amoka, Hilqqiyanne Yedaya. Hageeti Yeshuwa wode, kahinetanne eta ishantta kaalettiyageeta.
8 Leewati Yeshuwa, Binuya, Qadimiꞌeela, Sherebiya, Yihudaa, qassi galataa yettaa yexxiyageeta ba ishanttuura kaalettiya Mataniya.
9 Qassi eta ishantti Baqibuqiyinne Unni Xoossaa keettaa* naaganawu* etawu baazzan eqqidosona.
10 Yeshuwi Yoyaqima yeliis, Yoyaqimi Eliyashiba yeliis, Eliyashibi Yoyadaꞌa yeliis.
11 Qassi Yoyadaꞌi Yonatana yeliis, Yonatani Yadduꞌa yeliis.
12 Yoyaqima wode, kahineti, aawatu keettaa kaalettiyageeti hageeta: Seraya keettawu, Meraya; Ermmaasa keettawu, Hananiya;
13 Izira keettawu, Meshulama; Amariya keettawu, Yihohanana;
14 Mallukiꞌa keettawu, Yonatana; Shebaniya keettawu, Yooseefa;
15 Harima keettawu, Adinna; Merayota keettawu, Hilqqaya;
16 Iddoꞌa keettawu, Zakkaariyasa; Ginnetona keettawu, Meshulama;
17 Abiya keettawu, Zikira; Miniyamina keettawu, . . . ;* Moꞌadiya keettawu, Pilxxaya;
18 Bilgga keettawu, Shammuꞌa; Shemaya keettawu, Yihonatana;
19 Yoyariba keettawu, Matenaya; Yedaya keettawu, Uzziꞌa;
20 Sallaya keettawu, Qallaya; Amoka keettawu, Ebeera;
21 Hilqqiya keettawu, Hashabiya; Yedaya keettawu, Netaniꞌeela.
22 Eliyashiba, Yoyadaꞌa, Yohanananne Yadduꞌa wode, Leewa yaratu aawatu keettaa kaalettiyageeti, kahinetuugaadan, Parsse Kawuwa Dariyosa wodiya gakkanaashin xaafettidosona.
23 Aawatu keettaa kaalettiyageeta gidida Leewati, Eliyashiba naꞌaa Yohanana wodiya gakkanaashin he wode deꞌiya haydaa maxaafan xaafettidosona.
24 Leewata kaalettiyageeti Hashabiya, Sherebiyanne Qadimiꞌeela naꞌaa Yeshuwa; qassi eta ishantti, naagiyageeti, tumu Xoossaa asa gidiya Daawiti azazidoogaadan Xoossaa sabbanawunne galatanawu citan citan etawu baazzan* eqqidosona.
25 Mataniyi, Baqibuqiyi, Abddiyyu, Meshulami, Talmmoninne Aqqubi penggiya naagiyageetudan eqqidi, Xoossaa keettaa matan deꞌiya minjja kifileta naagoosona.
26 Hageeti Yozadaqa naꞌaa Yeshuwa naꞌaa Yoyaqima wode, qassi biittaa haariya Nahimiyanne xaafe* gidida, kahiniya Izira wode haggaazidosona.
27 Yerusalaame dirssaa gimbbiya anjjissiyo wode, galataa yettan, simbbaaliyan,* baqettan waaxettida miishshatuuninne diittan anjjissuwa baalaa ufayttiiddi bonchchanawu Leewata koyidi eti deꞌiyosa ubbaappe Yerusalaame ehiidosona.
28 Qassi yexxiyageetu naati* moottaappe,* Yerusalaame yuushuwan deꞌiya ubbasaappenne Nexofa asati deꞌido qeeri katamatuppe shiiqidosona,
29 hegaadankka Bet-gelggalappe, Geba biittaappenne Azimaweta biittaappekka shiiqidosona; ayssi giikko, yexxiyageeti Yerusalaame yuushuwan ubbasan banttawu qeeri katamata keexxidosona.
30 Kahinetinne Leewati Xoossaa sinttan banttana geeshshidosona; qassi asaa, penggetanne dirssaa gimbbiyakka geeshshidosona.
31 Hegaappe simmin, taani Yihudaa daannata dirssaa huuphiyan eqqanaadan ehaas. Hegaa bollikka, galataa yettaa yexxiya naaꞌꞌu gita citaanne salppidi eta kaalliyageeta sunttaas, qassi issi citay dirssaa bollaara hemettidi ushachcha baggi Guufettida Bidinttaa Penggiyakko biis.
32 Etappe guyyeera, Hoshayinne Yihudaa daannatuppe baggati hemettidosona,
33 etaara Azaree, Iziri, Meshulami,
34 Yihuday, Biniyami, Shemayinne Ermmaasi deꞌoosona.
35 Kahinetu attuma naatuppe malkkataa oyqqidi etaara deꞌiya amaridaageeti hageeta: Asaafa naꞌaa Zakkura naꞌaa Mikaya naꞌaa Mataniya naꞌaa Shemaya naꞌaa Yonatana naꞌaa Zakkaariyasa,
36 qassi A ishantta Shemaya, Azariꞌeela, Milalaya, Gilalaya, Maꞌaya, Netaniꞌeela, Yihudaanne Hananiꞌa; eti tumu Xoossaa asa gidiya Daawitaagaa mala muuziqaa miishshata oyqqidosona; qassi xaafee* Iziri etappe sinttaara hemettees.
37 Eti Pulttuwa Penggiya gakkidi, Daawita Katamaa Xekkaara sitti gi biidi dirssaa bolli pude kiyidosona; eti Daawita Keettaara kanttidi arshsho baggi Haattaa Penggiyakko biidosona.
38 Galataa yettaa yexxiya hinkko citay haddirssa baggi* biis, qassi taani eta geeduwa kaallada, asaappe baggaara Coociya Gimbbiyappe dirssaa bollaara pude kanttada Aaho Gimbbiyakko baas,
39 qassi Efireema Penggiyara pude kanttada, Beni Katamaa Penggiyanne Moliya Penggiya gakkaas, qassi Hananeela Gimbbiyaranne Meꞌa Gimbbiyara kanttada Dorssaa Penggiya gakkaas; eti Naaguwa Penggiya gakkidi eqqidosona.
40 Wurssettan, galataa yettaa yexxiya naaꞌꞌu citati tumu Xoossaa keettaa sinttan eqqidosona; taanikka eqqaas, tanaara deꞌiya sima maataawatuppe baggati,
41 qassi kahinetuppe Eliyaqimi, Maꞌaseyi, Miniyamini, Mikayi, Eliyoꞌenayi, Zakkaariyasinne Hananiyi malkkataa oyqqidi,
42 qassi Maꞌaseyi, Shemayi, Eliꞌaazari, Uzziꞌi, Yihohanani, Malkkiyi, Elaaminne Exeri eqqidosona. Qassi yexxiyageeti Yizirahiyi kaalli xeellin, bantta qaalaa xoqqissidi yexxidosona.
43 He gallassi eti daro yarshshuwa yarshshidosonanne ufayttidosona; ayssi giikko, tumu Xoossay eti ufayssan poocammanaadan oottiis. Macca asaynne naatikka keehi ufayttidosona, yaatin Yerusalaame ufayssay haahuwan siyettiis.
44 He gallassi imotaa, koyro gakkida xeera kattaanne tammaappe issi kushiya* wottiyo minjja keettan aawatiyageeti sunttettidosona. Eti Higgiyan koyettiyagaadan, kahinetussinne Leewatussi imettana bessiyabaa katamaa yuushuwan deꞌiya goshsha gadetuppe shiishshidi yan wottana koshshees, ayssi giikko haggaaziya kahinetuppenne Leewatuppe denddidaagan Yihudan asay keehi ufayttiis.
45 Qassi Daawitinne A naꞌay Solomoni azazidoogaa maaran, yexxiyageetinne penggiya naagiyageeti oottidoogaadan, eti bantta Xoossay etappe koyiyobatanne geeshshatettaa wogaa poliyogaa doommidosona.
46 Daro wodiyappe kase, Daawitanne Asaafa wode, yexxiyageetanne Xoossaa sabbiyonne galatiyo yettaa kaalettiyageeti* deꞌoosona.
47 Zarubaabeela wodenne Nahimiya wode, ubba Israaꞌeelati yexxiyageetussinne penggiya naagiyageetussi gallassawu gallassawu koshshiyabaa immidosona. Qassi eti Leewatuyyo imettana bessiyabaa dummayidosona, Leewati qassi Aaroona zerettawu imettana bessiyabaa dummayidosona.
Footnotes
^ Woykko “beeta maqidasiya; Xoossaa garuwa.”
^ Woykko geella, “haggaazaa wode.”
^ Ibraawetto xuufee ha sohuwan sunttaa xaafennan aggi bayidaba milatees.
^ Woykko “sinttan.”
^ Ibraawetto qaalay issuwa issuwara domꞌꞌissiyo wode giiriya, birataappe merettida irzzo milatiya muuziqaa miishshaa malaatees.
^ Woykko “Qassi loohida yettanchchati.”
^ Hegeekka, Yorddaanoosa yuushuwan deꞌiya moottaa.
^ Woykko “sintta baggi.”
^ Woykko “asirataa.”
^ Mise, “huupheti.”
