Nahimiya 6:1-19
6 Sanbbalaxi, Xobbee, Araba asa gidiya Gesheminne hara nu morkketi taani dirssaa zaarettada gimbbidoogaanne dirssan ayba kayyeenne attibeennaagaa siyidosaara (he wode gakkanaashin taani penggetun sanqqaa aattabeennaba gidikkonne),
2 Sanbbalaxinne Geshemi, “Haaya, wodiya bazzidi, Onoꞌa dembban deꞌiya sohotuppe issuwan ane gayttoos” yaagidi sohuwara taakko kiittidosona. Shin eti tana qohanawu maqettidosona.
3 Hegaa gishshawu, hagaadan gaada asaa etakko kiittaas: “Taani gita oosuwa oottaydda deꞌiyo gishshawu, duge baana danddayikke. Taani aggada inttekko bin oosoy aybissi eqqi bayii?”
4 Eti issi mala kiitaa taayyo oyddutoo kiittidosona, taanikka he wode ubban etawu issi malabaa zaaraas.
5 Yaatin, Sanbbalaxi dooya deꞌiya dabddaabbiya ba ashkkarawu immidi, issi mala kiitaa ichchashanttuwa taakko kiittiis.
6 He dabddaabbiyan xaafettidabay hagaadan gees: “Neeninne Ayhudati makkalanawu maqettiyogaa yuushuwan deꞌiya dereti siyidosona, qassi Geshemikka hegaa yootees. Neeni dirssaa gimbbaydda deꞌiyoy hegaassa; qassi ha odettiyabay bessiyogaadan, neeni eta kawo gidana hanaasa.
7 Hegaa bollikka, ‘Yihudan kawoy deꞌees!’ yaagidi Yerusalaamen ubbasan nebaa awaajjanaadan hiraagaa yootiyageeta sunttadasa. Qassi he odoy kawuwakko gakkana. Yaaniyo gishshawu, haaya, ane hegaabaa issippe tobboos.”
8 Gidoppe attin, taani hagaadan gaada akko guyye kiittaas: “Neeni yootiyobaappe awugeenne hanidaba gidenna; neeni hegeeta neeyyo* medhdha ekkada yootaasa.”
9 Ayssi giikko, eti ubbay nuna yashissanawu maloosona, qassi eti, “Eta kushee arggaacin oosoy polettennan attana” giidi bantta giddon haasayoosona. Shin taani, “Ta kusheta mintta” yaagada woossaas.
10 Yaatada, Mehexabiꞌeelo naꞌaa Delaya naꞌaa Shemaya soo baas, he wode I ba sooppe kiyibeenna. I hagaadan giis: “Ane tumu Xoossaa keetti boos. Ane keerettidi Xoossaa keettaa* giddon issippe gayttoos, yaatidi Xoossaa keettaa penggeta gorddoos; ayssi giikko, eti nena woranawu yiiddi deꞌoosona. Eti qamman nena woranawu yiiddi deꞌoosona.”
11 Shin taani hagaadan gaas: “Ta mala asi baqatana koshshii? Ta mala asi Xoossaa keettaa giddo gelidi hayqqennan attana danddayii? Taani mule gelikke!”
12 A kiittiday Xoossaa gidennan, ha hiraagaa ta bolli yootanaadan Xobbeenne Sanbbalaxi awu miishshaa immidoogaa taani akeekaas.
13 Eti ta sunttaa mooriyobaanne tana boriyobaa demmanawu, tana yashissanaadaaninne nagaraa ootissanaadan ayyo miishshaa immidosona.
14 Ta Xoossawu, Xobbeenne Sanbbalaxi oottido ha iita oosota, qassi tana yashissanawu aggennan maliya, hiraagaa yootiya Noꞌadayonne hiraagaa yootiya harata dogoppa.
15 Dirssay 52 gallassan gimbbettidi, Elula aginan, 25tta gallassan muleera wuriis.
16 Nu morkketi ubbay hegaa siyidosaara, qassi yuushuwan deꞌiya dereti ubbay hegaa beꞌidosaara keehi yeellatidosona,* hegaa bollikka, ha oosoy polettidoy nu Xoossay maaddiina gidiyogaa akeekidosona.
17 He wodetu ubban, Yihudan xoqqa maatay deꞌiyogeeti Xobbiyassi daro dabddaabbeta kiittoosona, Xobbeekka etawu zaarees.
18 I Araha naꞌaa Shekaniya bollo gidiyo gishshawunne A naꞌay Yihohanani, Berekiya naꞌaa Meshulama naꞌiyo ekkido gishshawu, Yihudan deꞌiya daroti A maaddanawu caaqqidosona.
19 Qassi eti abaa loꞌꞌobaa ubbatoo taayyo yootoosonanne taani giyobaa ayyo guyye odoosona. Yaatin, Xobbee tana yashissanawu dabddaabbeta kiittees.
