Nahimiya 8:1-18
8 Hegaappe guyyiyan, asay ubbay Haattaa Penggiya sinttan dabaaban issi wozanan issippe shiiqidosona; qassi eti, Israaꞌeelati kaallanaadan Yihoowi azazido Muuse Higgiya maxaafaa ehaanaadan, xaafiya* Izirawu yootidosona.
2 Yaatin, kahinee Iziri laappuntta aginawu koyro gallassi attuma asay, macca asaynne siyiyobaa akeekana danddayiya ubbay shiiqido galchchaa sintti Higgiya maxaafaa ehiis.
3 I Haattaa Penggiya sinttan dabaaban attuma asawu, macca asawunne siyiyobaa akeekana danddayiya ubbawu wonttimaattaappe gallassa seetay gakkanaashin ba qaalaa xoqqu oottidi hegaappe nabbabiis; qassi asay Higgiya maxaafaappe nabbabettiyabaa loytti ezggiis.
4 Xaafee* Iziri he shiiquwawu giigida, mittaappe merettida daraphphan* eqqiis; appe ushachcha baggaara Matitiyi, Shemaꞌi, Anayi, Ooree, Hilqqeenne Maꞌaseyi eqqidosona; qassi haddirssa baggaara Pedayi, Mishaꞌeeli, Malkkiyi, Hashumi, Hash-badanahi, Zakkaariyasinne Meshulami eqqidosona.
5 Iziri ubba asaappe xoqqiyasan eqqido gishshawu, asay ubbay xeellishin maxaafaa dooyiis. I maxaafaa dooyin ubba asay denddi eqqiis.
6 Yaatin, Iziri gitanne tumanchcha Xoossaa Yihoowa sabbiis; he wode asay ubbay, “Aminꞌꞌi! Aminꞌꞌi!” yaagidi zaaridosonanne bantta kushiya pude denttidosona, qassi eti Yihoowa sinttan hokkidi gulbbatidosonanne biittan gufannidosona.
7 Qassi Leewati, hegeetikka Yeshuwi, Bani, Sherebiyi, Yamini, Aqqubi, Shabbetayi, Hodiyi, Maꞌaseyi, Qelixi, Azaree, Yozabadi, Hananinne Pelahiyi asay bantta eqqidosan deꞌishin Higgiya etawu qonccissidosona.
8 Eti tumu Xoossaa Higgiya maxaafaappe bantta qaalaa xoqqu oottidi aggennan nabbabidosona, qassi eti hegaa loytti qonccissidosonanne nabbabettiyabaa birshshettaa asay eranaadan oottidosona; yaatiyogan eti nabbabettiyabaa asay akeekanaadan maaddidosona.
9 He wode biittaa haariya* Nahimee, xaafe* gidida, kahinee Izirinne asaa tamaarissiya Leewati ubba asaassi, “Ha gallassay intte Xoossaa Yihoowayyo geeshsha gallassa. Kayyottoppite, woy yeekkoppite” yaagidosona. Ayssi giikko, ubba asay Higgiyan odettidabata siyidi yeekkiiddi deꞌees.
10 I etawu hagaadan giis: “Biite, loꞌꞌobata* miite, malꞌꞌiyabaa uyite, qassi aybinne baynnaageetussi intte qumaappe shaakkidi immite; ayssi giikko, ha gallassay nu Godaayyo geeshsha gallassa, qassi Yihoowa ufayssay intteyyo qato* gidiyo gishshawu azzanoppite.”
11 Leewati, “Hayzzite! ayssi giikko hagee geeshsha gallassa, qassi azzanoppite” yaagidi ubba asaa woppissidosona.
12 Hegaa gishshawu, ubba asay maanawu, uyanawu, bantta qumaappe haratussi shaakkidi immanawunne ufayssan hombbocanawu biidosona, ayssi giikko eti Higgiya maxaafan deꞌiya banttassi odettidabaa akeekidosona.
13 Naaꞌꞌantto gallassi aawatu keettaa kaalettiyageeti, kahinetinne Leewati Higgiyan odettidabata loytti akeekanawu, xaafiya* Izira matan shiiqidosona.
14 Hegaappe simmin, eti laappuntta aginan bonchchettiya baalaa wode, Israaꞌeelati daasetu* giddon uttana koshshiyogee Yihoowi Muuse baggaara immido Higgiyan xaafettidaagaa demmidosona,
15 qassi eti hegaa awaajjana koshshees. Eti bantta katamatu ubbaaninne Yerusalaamen ubbasan hagaa erissana koshshiyogaa akeekidosona: “Deree dariyo moottaa biidi, xaafettidaagaadan daaseta daasanawu wogaraa mittaappe, etishemen giyo xiiddaappe, hadas* giyo mittaappe, zambbaappenne hara mittatuppe tashiya ehiite.”
16 Hegaa gishshawu, asay kiyidi issoy issoy bantta keettaa huuphiyan, hegaadankka bantta dirssaa giddon, tumu Xoossaa keettaa dirssaa giddon, Haattaa Penggiya dabaabaaninne Efireema Penggiya dabaaban banttawu daaseta giigissanawu hegeeta ehiidosona.
17 Yaatin, omoodduwappe simmida galchchay ubbay daaseta giigissidi eta giddon uttidosona, ayssi giikko Israaꞌeelati Nawe naꞌaa Yaasu wodiyappe doommidi he gallassaa gakkanaashin he baalaa hagaa mala hanotan bonchchi erokkona.
18 Qassi koyro gallassaappe wurssetta gallassaa gakkanaashin, tumu Xoossaa Higgiya maxaafay ubba galla nabbabettiis. Eti laappun gallassawu baalaa bonchchidosonanne Higgiyan koyettiyagaadan hosppuntta gallassi geeshsha yaaꞌaa yaaꞌidosona.*
Footnotes
^ Ibraawetto qaalay Higgiyanne hara Geeshsha Maxaafatu shaahota zaaretti xaafiyageetakka qonccissees.
^ Woykko “madirakiyan.”
^ Woykko “Tirishata;” moottaa haariyagee xeesettiyo Parssetu bonchcho suntta.
^ Mise, “modhdhobata.”
^ Woykko “minotetta.”
^ Woykko “amarida wodiyawu deꞌiyosatu.”
^ Hegeekka, bonccoy ciliciliyonne sawiya bootta ciishshaa ciiyiyabaa.
^ Woykko “shiiqidosona.”
