Nahimiya 13:1-31
13 He gallassi asay siyishin Muuse maxaafay nabbabettiis, qassi Ammona asi woy Moꞌaba asi ooninne tumu Xoossaa galchchaa mule gelana koshshennaagee xaafettidabay beettiis,
2 ayssi giikko, eti Israaꞌeelatuyyo qumaanne haattaa immibookkona, ubba eta qangganaadan Balaamawu miishshaa qanxxidosona. Gidikkonne, nu Xoossay qanggettaa anjjuwawu laammiis.
3 Eti Higgiyan odettidabaa siyidosaara, hara biittaa asata ubbaanne eta naata* Israaꞌeelatuppe shaakkiyogaa doommidosona.
4 Hagee hananaappe kase, nu Xoossaa keettaa* minjja kifiletun* aawatiya kahinee, Xobbiyara dabbotiya Eliyashiba.
5 Kattaa yarshshuwa, ixaanaa, miishshata, qassi Leewatuyyo, yexxiyageetuyyonne penggiya naagiyageetuyyo imettanaadan azazettida, kattaappe, ooratti agido woyniyappenne zaytiyappe tammaappe issi kushiya* kahinetuyyo imettiyabaara issippe eti kase wottiyo aaho minjja kifiliya* I Xoobiyayyo immiis.
6 Ha ubbabay haniyo wode taani Yerusalaamen deꞌikke, ayssi giikko Baabiloone Kawoy Arxxekisesi kawotido 32ntta layttan taani kawuwakko ba uttaas; qassi amarida wodiyappe guyyiyan, tana yeddanaadan kawuwa oychchaas.
7 Hegaappe simmin, taani Yerusalaame yaada, tumu Xoossaa keettaa dirssaa giddon deꞌiya minjja kifiliya Eliyashibi Xobbiyawu immiyogan oottido hanttaarabaa akeekaas.
8 Hegan taani keehi hanqqettaas, yaaniyo gishshawu Xobbiya so miishshata ubbaa minjja kifiliyappe* kessada olaas.
9 Hegaappe guyyiyan, taani azazin eti minjja kifileta* geeshshidosona; yaatin tumu Xoossaa keettaa miishshata, kattaa yarshshuwaranne ixaanaara yan zaarada wottaas.
10 Qassi, Leewatussi imettana bessiyabay imettibeenna gishshawu, oosuwa oottiya Leewatinne yexxiyageeti bantta goshshawu goshshawu biichchidoogaa akeekaas.
11 Yaaniyo gishshawu, “Tumu Xoossaa keettay shenehoo geetettidoy aybissee?” gaada sima maataawata hanqqettaas. Hegaappe simmada, eta* issippe shiishshaas, qassi kase sohuwawu eta zaaraas.
12 Hegaa bollikka, Yihudan deꞌiya ubbay kattaappe, ooratti agido woyniyappenne zaytiyappe tammaappe issi kushiya minjja kifileta ehiidosona.
13 Hegaappe simmin, kahiniya Shelemiya, xaafiya* Xaadooqanne Leewatuppe Pedaya minjja kifiletun aawatanaadan sunttaas, qassi eta maaddiyagaa gidanaadan, Mataniya naꞌaa Zakkura naꞌaa Hanana sunttaas; ayssi giikko, eti ammanettiya asa gidiyogaa bessidosona. Bantta ishanttussi imettana bessiyabaa gishiyogee eta aawatetta.
14 Ta Xoossawu, hagaara gayttidaagan tana hassaya; qassi ne keettawunne an oosettiyabatuyyo* taani oottido tasenna siiquwa bessiyabata dogoppa.
15 He wode Yihudan deꞌiya asay Sambbatan woyniya yedhdhiyogaa, kattaa shiishshiyogaanne hegaa hariyan caaniyogaa, qassi woyne eessaa, woyniya ayfiya, balasiyanne caanido dumma dummabaa Sambbataa gallassi Yerusalaame ehiyogaa beꞌaas. Hegaa gishshawu, he gallassi qumaa bayzziyogaa agganaadan* etawu mintta yootaas.
16 Qassi kataman deꞌida Xiiroosa asati moliyanne bayzziyo dumma dummabata ehiidi, Yerusalaamen deꞌiya Yihudaa asawu Sambbatan bayzzoosona.
17 Hegaa gishshawu, Yihudan deꞌiya xoqqa maataawata hanqqettada eta hagaadan gaas: “Sambbataa gallassaa tunissiyogan ha ayba iitabaa ootteetii?
18 Nu Xoossay ha ubba bashshaa nu bollinne ha katamaa bolli ehiidoy intte mayzza aawati hegaa oottidoogaana gidennee? Sambbataa intte tunissiyogan Xoossaa hanqqoy Israaꞌeelatu bolli yaa daranaadan oottiiddi deꞌeeta.”
19 Hegaa gishshawu, Sambbataappe kase, kuway gakkin Yerusalaame penggeti xumiyogaa doommiyo wode, sohuwara penggeta gorddanaadan taani azazaas. Sambbatay aadhdhana gakkanaashin eti penggeta dooyana koshshennaagaakka yootaas, qassi Sambbataa gallassi bayzziyobi aybinne gelennaadan ta ashkkaratuppe amaridaageeta penggetun essaas.
20 Hegaa gishshawu, zalꞌꞌanchchatinne dumma dummabata bayzziyageeti Yerusalaameppe karen issitoo woy naaꞌꞌutoo aqidosona.
21 Yaatin, taani etawu hagaadan gaada mintta yootaas: “Dirssaa matan aybissi aqeetii? Intte haranttuwa hegaadan oottikko, taani inttena wolqqan hagaappe diggana.” He gallassaappe doommidi eti Sambbatan haranttuwa yibookkona.
22 Qassi, Sambbataa gallassay muletoo geeshsha gidanaadan, Leewati Xoossaa sinttan ubbatoo banttana geeshshananne yiidi penggeta naagana koshshiyogaa yootaas. Ta Xoossawu, hagawukka tana hassaya, qassi tasenna ne siiquwa daruwan taayyo qaretta.
23 He wode, Ashddooda, Ammonanne Moꞌaba macca asaa ekkida* Ayhudati deꞌiyogaakka akeekaas.
24 Eta naatuppe baggati Ashddooda asaa qaalaa haasayoosona, qassi baggati dumma dumma deretu qaalaa haasayoosona; shin etappe ooninne Ayhudatu qaalaa waati haasayiyakko erenna.
25 Hegaa gishshawu, taani eta hanqqettaas, qanggaas, attumaageetuppe amaridaageeta shocaas, eta binnaanaa dafada shoddaasinne hagaadan gaada Xoossaa sunttan eta caaqissaas: “Intte intte macca naata eta attuma naatuyyo immana bessenna, qassi eta macca naatuppe oonanne intte attuma naatuyyo woy intteyyo ekkana bessenna.
26 Israaꞌeela Kawoy Solomoni nagaraa oottidoy hagaa gaasuwana gidennee? Deretu ubbaa giddon A mala kawoy ooninne baawa; qassi A Xoossay A siiqiis, hegaappe denddidaagan Israaꞌeela asaa ubbaa bolli A kawoyiis. Shin hara biittaa maccaasati, haray atto akka nagaraa ootissidosona.
27 Intte hara biittaa macca asaa ekkiyogan, nu Xoossawu ammanettennaagaa bessiya ha gita nagaraa oottidoogee ammananawu metiyaba gidennee?”
28 Gita kahiniya Eliyashiba naꞌaa Yoyadaꞌa attuma naatuppe issoy Bet-horona asa gidiya Sanbbalaxa naꞌiyo ekkiis. Yaaniyo gishshawu, taani A ta matappe gooddaas.
29 Ta Xoossawu, eti kahinetettaa, qassi kahinetunne Leewatu maachchaa tunissido gishshawu, eta hassayada qaxxayennan aggoppa.
30 Taani hara biittaa tunatetta ubbaappe eta geeshshaas, qassi kahinetuyyonne Leewatuyyo issuwawu issuwawu eta oosuwa oosuwa immaas,
31 qassi keerettida wodiyan koshshiya mittaa ehiyogaaranne koyro gakkida xeera kattaara gayttidabaa maarayaas.
Ta Xoossawu, tana kehaban* hassaya.
Footnotes
^ Woykko “walahettida ubbaanne eta naata.”
^ Woykko “beeta maqidasiya; Xoossaa garuwa.”
^ Woykko “qumaa miyo kifiletun.”
^ Woykko “asirataa.”
^ Woykko “qumaa miyo kifiliya.”
^ Woykko “qumaa miyo kifiliyappe.”
^ Woykko “qumaa miyo kifileta.”
^ Hegeekka, Leewatanne yexxiyageeta.
^ Woykko “A haggaazawu.”
^ Woykko geella “he gallassi qumaa bayzzennaadan.”
^ Woykko “bantta soo efiida.”
^ Woykko “loꞌꞌoban.”
