Izira 9:1-15
9 Hageeti poletti simmin sohuwara daannati taakko yiidi hagaadan giidosona: “Israaꞌeela asay, kahinetinne Leewati yuushuwan deꞌiya deretuppe, hegeetikka, Kanaanetuppe, Hitetuppe, Perzzetuppe, Yabusatuppe, Ammonatuppe, Moꞌabatuppe, Gibxxetuppenne Amoretuppe, qassi iitiya eta oosotuppe banttana gaxayibookkona.
2 Eta macca naatuppe amaridaageeta eti banttayyo machcho ootti ekkidosonanne bantta attuma naatuyyo immidosona. Yaatiyogan eti, geeshsha zeretta gidiyageeti, he biittan deꞌiya deretuura walahettidosona. Daannatinne sima maataawati ammanettennaagaa bessiya ha mooruwan sintta xeera gididosona.”
3 Taani hegaa siyidosaara, bollaaranne garssaara maayidobaa pooshshaas, ta huuphiya binnaanaanne buuchchaa dafada shoddaas, qassi dagaman loccu gaada* utta bayaas.
4 Omarssa kattaa yarshshoy shiiqana gakkanaashin taani dagaman loccu gaada uttidaashin, Israaꞌeela Xoossaa qaalaa bonchchiya* ubbay, omoodduwappe simmidaageeti ammanettibeennaagaa gaasuwan ta matan shiiqiis.
5 Omarssa kattaa yarshshuwa shiishshiyo wode, taani bollaaranne garssaara maayidobay pooshetti uttidaashin kawuyyada uttidosaappe denddaas, qassi gulbbatada, ta Xoossaa Yihoowakko ta kushiya miccaas.
6 Yaatada hagaadan gaas: “Ta Xoossawu, taani xoqqu gaada neekko xeellanawukka yeellataasinne pokkottaas; ayssi giikko, ta Xoossawu, nu nagaray keehi dariis,* nu mooroykka saluwa gakkiis.
7 Nu mayzza aawatu wodiyappe ha gallassaa gakkanawu nu mooroy keehi daro; neeni nu nagaraa gaasuwan nuna, nu kawotanne nu kahineta hara biittaa kawotu kushiyan aatta immadasa; nuuni bisuwan hayqqida, omooddettida, bonqqettidanne kawuyyida; qassi hanno gakkanawu hegaadan hanees.
8 Shin nu Xoossay Yihoowi nuuppe attidaageeti kessi ekkanaadaaninne nuuni A geeshsha sohuwan hirggennan saro deꞌanaadan oottiyogan* amarida wodiyawu nuussi kehatettaa bessiis; nu Xoossawu, nu sinttaa pooꞌissanawu, qassi aylletettaappe nuna guuttaa woppissanawu yaatadasa.
9 Nuuni aylle gidikkokka, nu Xoossay aylletettan nuna aggiigibeenna; shin laalettida nu Xoossaa keettaa zaaretti keexxanawu nu wolqqay ooraxxanaadan, qassi Yihudaaninne Yerusalaamen nuuyyo shuchcha dirssay* deꞌanaadan, Parsse kawotu sinttan I ba tasenna siiquwa nuuyyo darissidi bessiis.
10 “Shin nu Xoossawu, simi hagaappe simmin nuuni woygana danddayiyo? Ayssi giikko, nuuni ne azazota aggi bayida;
11 hegeeti neeyyo haggaaziya, hiraagaa* yootiyageetu baggaara neeni nuuyyo hagaadan gaada yootidobata: ‘Intte laattanawu geliyo biittay yan deꞌiya deretu tunatettaa gaasuwaninne iitiya eta oosotu gaasuwan tuniis. Eti ya gaxaappe ha gaxaa gakkanaashin biittaa tunatettan kunttidosona.
12 Hegaa gishshawu, intte macca naata eta attuma naatussi immoppite, woy eta macca naata intte attuma naatussi ekkoppite; qassi eti saruwaninne ishaluwan deꞌanaadan maaddiyabaa intte mule oottana bessenna; yaatikko intte mino asa gidana, he biittan mokkida loꞌꞌobaa maananne intte naati he biittaa merinawu laattana.’
13 Nu iita oosuwanne nu gita mooruwa gaasuwan ha ubbabay nu bolli gakkiis; shin nu Xoossawu, neeni nu nagaraadan nuna qaxxayabaakka, qassi hagan deꞌiya nuuni kessi ekkanaadan oottadasa;
14 yaatin nuuni zaarettidikka ne azazota azazettennan ixxananne ha iitiyabaa oottiya deretuura ekuwan geluwan walahettana* bessii? Neeni nuuppe issuwanne ashshennan muleera xayssanawu nu bolli keehi hanqqettana bessennee?
15 Israaꞌeela Xoossaa Yihoowaa, neeni xillo; ayssi giikko, nuuppe amaridaageeti attidi paxa deꞌanaadan oottadasa. Ha mooruwa gaasuwan ne sinttan eqqiyogee nuussi bessennaba gidikkonne, hekko nuuni ne sinttan deꞌoos.”
