Izira 5:1-17
5 Hegaappe guyyiyan, hiraagaa* yootiyageeti Haggeenne Iddoꞌa naꞌaa naꞌay Zakkaariyasi, Yihudaaninne Yerusalaamen deꞌida Ayhudatuyyo eta kaalettiya Israaꞌeela Xoossaa sunttan hiraagaa yootidosona.
2 He wode Salaatiyala naꞌay Zarubaabeelinne Yihozadaqa naꞌay Yeshuwi Yerusalaamen kase deꞌiya Xoossaa keettaa zaarettidi keexxiyogaa doommidosona; qassi hiraagaa yootiyageeti etaara deꞌoosonanne eta minttettidosona.
3 He wode, Shaafaappe Hefintta moottaa* haariya Tattanayi, qassi Shetar-bozenayinne eta miireti etakko yiidi, “Ha keettaa keexxanaadaaninne hagaadan oottidi* polanaadan inttena azaziday oonee?” yaagidosona.
4 Yaatidi, “Hagaa keexxiya asatu sunttay oonee?” yaagidi eta oychchidosona.
5 Gidikkonne, Xoossay Ayhudatu cimatuura* deꞌiyo gishshawu, Dariyosayyo kiitaa yeddin, hegaara gayttida dabddaabbee guyye kiitettana gakkanaashin eti he oosuwa teqqibookkona.
6 Hagee Shaafaappe Hefintta moottaa haariya Tattanayi, qassi Shetar-bozenayinne A miireti, hegeekka, Shaafaappe Hefintta moottan garssaara haariyageeti Kawuwa Dariyosayyo kiittido dabddaabbiya;
7 eti ayyo kiitaa yeddidosona, qassi eti xaafidobay hagaa:
“Kawuwa Dariyosayyo:
“Saroy neeyyo gido!
8 Nuuni Yihudaa moottan* deꞌiya gita Xoossaa keettaa biidoogaa, qassi asay he keettaa gita shuchchatun keexxiiddinne gimbbeta xawula malabaa mayzziiddi deꞌiyogaa kawoy ero. Asay he oosuwa wozanappe oottees, qassi eti minnidi oottiyo gishshawu oosoy eesuwan oosettiiddi deꞌees.
9 Yaatin, nuuni eta cimata, ‘Ha keettaa keexxanaadaaninne hagaadan oottidi polanaadan* inttena azaziday oonee?’ yaagidi oychchida.
10 Sintta xeera gididi kaalettiya asatu sunttay oonakko nuuni xaafidi nena erissanawu, eta sunttaakka oychchida.
11 “Eti nuuyyo hagaadan giidi zaaridosona: ‘Nuuni saluwanne saꞌaa Xoossawu haggaaziyageeta, qassi Israaꞌeela gita kawoy keexxidi polido, daro layttaappe kase keexettida keettaa nuuni zaarettidi keexxiiddi deꞌoos.
12 Gidikkonne, nu aawati saluwa Xoossaa hanqqetissido gishshawu, I Kalade asa gidiya Baabiloone Kawuwa Nebukadanaxora kushiyan eta aatti immiis; yaatin I ha keettaa xayssiisinne asaa omooddidi Baabiloone efiis.
13 Gidoppe attin, Baabiloone Kawuwa Qiiroosa haaruwa koyro layttan, ha Xoossaa keettaa zaarettidi keexxanaadan Kawuwa Qiiroosi azaziis.
14 Hegaa bollikka, Nebukadanaxori Yerusalaamen deꞌiya Xoossaa keettaappe* ekkidi, Baabiloonen deꞌiya garuwawu efiido worqqaappenne biraappe merettida, Xoossaa keettaa miishshata Kawuwa Qiiroosi Baabiloonen deꞌiya garuwappe kessiis. Hegeeti, Kawuwa Qiiroosi haariyagaa gidanaadan sunttido Sheshibazzara* giyo bitaniyawu imettidosona.
15 Qiiroosi ayyo hagaadan giis: “Ha miishshata ekkada, kase sohuwan zaarettidi keexettana Xoossaa keettan wottanawu Yerusalaame efa.”
16 Yaatin, Sheshibazzari yiidi, Yerusalaamen deꞌiya Xoossaa keettaa baasuwa shuchchaa hiixxiis; qassi he wodeppe doommidi hanno gakkanawu he keettay keexettiiddi deꞌiyaba gidikkonne wuriichchibeenna.’
17 “Simi hagee kawuwawu loꞌꞌo milatikko, Kawuwa Qiiroosi Yerusalaamen deꞌiya Xoossaa keettay zaarettidi keexettanaadan azazidaakkonne shaakki eranawu, Baabiloonen deꞌiya kawuwa buquraa wottiyosay pilggettidi xeeletto; qassi hegaara gayttidaagan kawoy kuuyidobay nuussi kiitetto.”
Footnotes
^ Woykko “Xoossay erissidobaa.”
^ Woykko “Efiraaxiisa pinnidi.”
^ Woykko “ha tuuqeta.”
^ Mise, “eta Xoossaa ayfee Ayhudatu cimatu bolli.”
^ Woykko “awuraajjan.”
^ Woykko “ha tuuqeta.”
^ Woykko “beeta maqidasiyappe; Xoossaa garuwappe.”
^ Iz 2:2ninne 3:8n Zarubaabeela geetettidaagaa gidennan aggenna.
