Izira 4:1-24
4 Omoodduwappe simmidaageeti Israaꞌeela Xoossaa Yihoowayyo keettaa* keexxiyogaa Yihudaanne Biniyama morkketi siyido wode,
2 sohuwara Zarubaabeelakkonne aawatu keettaa kaalettiyageetukko biidi etawu hagaadan giidosona: “Ane nuunikka inttenaara issippe keexxoos; ayssi giikko, intteegaadan nuunikka intte Xoossawu goynnoos,* qassi nuna hagawu ehiida Asoore Kawuwa Esar-haddona wodiyappe doommidi ayyo yarshshoos.”
3 Gidikkonne, Zarubaabeeli, Yeshuwinne Israaꞌeela aawatu keettaa kaalettiya harati etawu hagaadan giidosona: “Nu Xoossaa keettaa nunaara keexxanawu inttena gattiyay baa; ayssi giikko, Parsse Kawoy Qiiroosi nuna azazidoogaadan, Israaꞌeela Xoossaa Yihoowa keettaa nurkka keexxana.”
4 Yaatin, yuushuwan deꞌiya biittaa asati Yihudaa asay keexxiyogaa aggana mala, eta hidootaa qanxxissiyogaanne* yibbaatissiyogaa aggibookkona.
5 Eti Parsse Kawuwa Qiiroosa wodiyappe doommidi, Parsse Kawuwa Dariyosa haaruwa wodiya gakkanaashin, eta halchchuwa laalanawu zoriyageeta qaxaridosona.
6 Eti Ahashuresa haaruwa doomettan, Yihudaaninne Yerusalaamen deꞌiyageeta mootiyobaa xaafidosona.
7 Qassi Parsse Kawuwa Arxxekisesa wode, Bishilami, Mitiredati, Tabeꞌeelinne hara A miireti* Kawuwa Arxxekisesawu dabddaabbiya xaafidosona; eti he dabddaabbiya Aramattuwawu birshshidi, Aramatto pitaliyan xaafidosona.*
8 * Kawotettan xoqqa maatay deꞌiyo Rehuminne xaafee Shimshshayi Yerusalaame asaa mootidi, Kawuwa Arxxekisesawu kaallidi deꞌiyagaadan dabddaabbiya xaafidosona:
9 (Hegaa kiittidaageeti kawotettan xoqqa maatay deꞌiyo Rehumanne xaafiya Shimshshaya, qassi hara eta miireta, hegeetikka, daannatanne garssaara haariyageeta, xaafe gidiya Ereka asata, Baabilooneta, Susan deꞌiyageeta, hegeekka, Elaamata,
10 qassi gitanne bonchchettida Asenappari omooddi efiidi, Samaariya katamatun wottido hara deretanne Shaafaappe Hefintta moottan* deꞌiya hara asata;
11 hagee eti ayyo kiittido dabddaabbiya.)
“Kawuwa Arxxekisesayyo, Shaafaappe Hefintta moottan deꞌiya ne ashkkaratuppe:
12 Neeni deꞌiyosaappe hagawu nuukko yiida Ayhudati Yerusalaame gakkidoogaa kawoy ero. Eti makkalaynne iitatettay kumido katamaa zaaretti keexxiiddi deꞌoosona, qassi dirssaa gimbbidi wurssiiddinne baasota bottokoniiddi deꞌoosona.
13 Simi ha katamay zaaretti keexettiyabanne A dirssay gimbbetti wuriyaba gidikko, eti qaraxaa, giiraa, woy keellan qanxxiyo miishshaa immennaagaa, qassi hegaa gaasuwan kawotu buquraa wottiyosawu geliya miishshay guuxxanaagaa kawoy ero.
14 Nuuni kawo garuwa maxiniya miiddi,* kawoy qohettishin beꞌiyogee nuussi bessennaba; yaaniyo gishshawu kawoy hagaa eranaadan ha dabddaabbiya kiittoos,
15 hegaa gishshawu, ne mayzza aawatubay xaafettido maxaafay pilggettidi xeeletto. Ha katamay kawotanne moottata* qohiya makkalanchcha katama gidiyogaa, qassi an deꞌiyageeti beniisappe doommidi kawotettaa bolli makkalanaadan denttettiyageeta gidiyogaa neeni he maxaafaappe erana. Ha katamay kase xayidoy hegaassa.
16 Ha katamay zaaretti keexettiyabanne A dirssay gimbbetti wuriyaba gidikko, Shaafaappe Hefintta moottay ne kushiyappe kiyanaagaa* neeni kawoy eranaadan koyoos.”
17 Kawotettan xoqqa maatay deꞌiyo Rehumassi, xaafiya Shimshshayassi, Samaariyan deꞌiya eta miiretussinne* Shaafaappe Hefintta moottan deꞌiya asawu kawoy hagaadan giidi kiittiis:
“Saro deꞌeetii?
18 Intte taayyo kiittido dabddaabbee ta sinttan geeyidi nabbabettiis.*
19 Taani azazin, xaafettidabay pilggettiis, yaatin he kataman deꞌiyageeti beniisappe doommidi kawotettaa eqettiyageeta, makkalanchchatanne danobaa oottiyageeta gidiyogee erettiis.
20 Shaafaappe Hefintta moottaa kumettaa haarida wolqqaama kawoti Yerusalaamen deꞌidosona; qassi qaraxay, giiraynne keellan qanxxiyo miishshay etayyo imettiis.
21 Yaakko, taani azazana gakkanaashin katamay zaarettidi keexettenna mala, ha asati oosuwa agganaadan azazite.
22 Kawoy haranttuwa qohettenna mala, hegaara gayttidaagan koshshiyabaa oottanawu shenehoo geennaadan naagettite.”
23 Kawuwa Arxxekisesa dabddaabbee Rehuma, xaafiya Shimshshayanne eta miiretu sinttan nabbabetti simmin, eti sohuwara Ayhudatukko Yerusalaame biidi, oottiyogaa agganaadan eta wolqqanttidosona.
24 Yerusalaamen deꞌiya Xoossaa keettaa oosoy eqqidoy he wode; he oosoy Parsse Kawuwa Dariyosa haaruwawu naaꞌꞌantto layttaa gakkanawu eqqosan atti bayiis.
Footnotes
^ Woykko “beeta maqidasiya; garuwa.”
^ Mise, “Xoossaa koyoos.”
^ Mise, “kushiya xalalissiyogaanne.”
^ Woykko “laggeti.”
^ Woykko geella, “hegee Aramattuwan xaafettiisinne hegaappe simmin birshshettiis.”
^ Woykko “Efiraaxiisa pinnidi.”
^ Woykko “nu damoozaa kawo keettaappe ekkiiddi.”
^ Woykko “awuraajjata.”
^ Mise, “nena gattiyabi xayanaagaa.”
^ Woykko “laggetussinne.”
^ Woykko geella, “birshshettidi nabbabettiis.”
