Izira 8:1-36
8 Kawuwa Arxxekisesa haaruwa wode tanaara Baabilooneppe kiyida, aawatu keettaa kaalettiyageetinne so asaa maaran xaafettidaageeti hageeta:
2 Pinehasa naatuppe, Gershshoma; Itamara naatuppe, Daaneela; Daawita naatuppe, Haxxusha;
3 Shekaniya naatuppe, Parosha naatuppe, Zakkaariyasa, qassi aara deꞌiya xaafettida 150 attuma asata;
4 Pahat-mooꞌaaba naatuppe, Zerahiya naꞌaa Eliyeho-enaya, qassi aara 200 attuma asata;
5 Zattu naatuppe, Yahaziꞌeela naꞌaa Shekaniya, qassi aara 300 attuma asata;
6 Adina naatuppe, Yonatana naꞌaa Ebeda, qassi aara 50 attuma asata;
7 Elaama naatuppe, Ataliya naꞌaa Yeshaꞌiya, qassi aara 70 attuma asata;
8 Shefaxiya naatuppe, Mikaaꞌeela naꞌaa Zebadiya, qassi aara 80 attuma asata;
9 Yoꞌaba naatuppe, Yihiꞌeela naꞌaa Abddiyya, qassi aara 218 attuma asata;
10 Bana naatuppe, Yosifiya naꞌaa Shelomita, qassi aara 160 attuma asata;
11 Bebaya naatuppe, Bebaya naꞌaa Zakkaariyasa, qassi aara 28 attuma asata;
12 Azggada naatuppe, Haqqaxana naꞌaa Yohanana, qassi aara 110 attuma asata;
13 Adoniqama naatuppe, wurssettan simmidaageeti hageeta: Elifelexa, Yeꞌeelanne Shemaya, qassi etaara 60 attuma asata;
14 Bigiwaya naatuppe, Utayanne Zabbuda, qassi etaara 70 attuma asata.
15 Taani Ahawakko goggiya shaafaa matan eta shiishshaas; qassi nuuni yan dunkkaaniya tolidi heezzu gallassaa takkida. Shin taani asaanne kahineta yigga xeellido wode, Leewatuppe oonanne yan demmabeykke.
16 Yaaniyo gishshawu, kaalettiyageeta gidiya Eliꞌeezeri, Ariꞌeeli, Shemayi, Elnnatani, Yaribi, Elnnatani, Naataani, Zakkaariyasinne Meshulami, qassi tamaarissiyageeta gidiya Yoyaribinne Elnnatani taakko yaanaadan kiittaas.
17 Yaatada, Kasifiya giyo sohuwan kaalettiya Iddoꞌakko baanaadan eta azazaas. Iddoꞌinne Xoossaa keettan* haggaaziya,* Kasifiyan deꞌiya A ishantti, nu Xoossaa keettan oottiyageeta nuukko ehaanaadan yootana mala etawu odaas.
18 Nu Xoossaa keha kushee nu bolli deꞌiyo gishshawu, eti Israaꞌeela naꞌaa Leewa naꞌaa naꞌaa Mahila naatuppe Sherebiya giyo wozannaama bitaniya, qassi A naatanne A ishantta, muleera 18 asaa ehiidosona;
19 hegaa bollikka, Hashabiya, qassi Meraratuppe Yeshaꞌiya, A ishanttanne eta naata, muleera 20 asaa ehiidosona.
20 Qassi Daawitinne daannati Leewata maaddanaadan sunttido, Xoossaa keettan haggaaziyageetuppe* 220ti deꞌoosona; eti ubbay bantta sunttaa maaran xaafettidosona.
21 Yaatin, nu Xoossaa sinttan nuna ziqqi oottanawu, qassi nu ogiyan kaalettanaadaaninne nuna, nu naatanne nu aqo ubbaa naaganaadan A oychchanawu, Ahawa shaafaa matan, yan xoomaa awaajjaas.
22 Nuuni kawuwayyo, “Nu Xoossaa keha kushee A koyiyageetu ubbaa bollan deꞌees, shin A aggi bayiyageetuyyo I ba wolqqaanne ba hanqquwa bessees” yaagido gishshawu, ogiyan morkketuppe nuna naaganaadan wotaaddaratanne paraasata kawuwa oychchanawu yeellataas.
23 Yaaniyo gishshawu, nuuni xoomidanne hegaabaa nu Xoossaa woossida, qassi I nu watiwatuwa siyiis.
24 Taani kahineta kaalettiyageetuppe 12ta, hegeetikka, Sherebiyanne Hashabiya eta ishanttuppe tammatuura dooraas.
25 Yaatada, kawoy, A zoriyageeti, A daannatinne yan deꞌiya Israaꞌeelati ubbay nu Xoossaa keettawu immido biraa, worqqaanne miishshata eta sinttan likkaas.
26 Likka simmada, etassi immidobati hageeta: 650 taalantte* biraa, 2 taalantte deexxiya 100 bira miishshata, 100 taalantte worqqaa,
27 1,000 darike* deexxiya 20 guutta worqqa kereta, qassi worqqaadan alꞌꞌo gidida phooliya loꞌꞌo nahaasiyappe merettida 2 miishshata.
28 Yaatin taani etawu hagaadan gaas: “Intte Yihoowassa, miishshatikka abaa; qassi biraynne worqqay intte mayzza aawatu Xoossaa Yihoowayyo dosan immidoba.
29 Kahinetanne Leewata kaalettiyageetu sinttaaninne Israaꞌeela aawatu keettaa kaalettiya daannatu sinttan, Yerusalaamen, Yihoowa keettaa* kifiletun intte hegeeta likkana gakkanaashin mintti naagite.”
30 Yaatin, eta sinttan likkido biraa, worqqaanne miishshata, kahinetinne Leewati nu Xoossaa keetti Yerusalaame efaanawu ekkidosona.
31 Wurssettan, koyro aginawu 12tta gallassi Yerusalaame baanawu Ahawa shaafaa matappe denddida, qassi nu Xoossaa kushee nu bolli deꞌees; I morkketuppenne ogiyan zuggidi naagiyageetuppe nuna ashshiis.
32 Yaaniyo gishshawu, nuuni Yerusalaame yiidi heezzu gallassaa takkida.
33 Oyddantta gallassi biraa, worqqaanne miishshata nu Xoossaa keettan likkidi, hegeeta kahiniya Uraya naꞌaa Meremota kushiyan wottida; aara Pinehasa naꞌay Eliꞌaazari deꞌees, qassi etaara Leewata gidiya, Yeshuwa naꞌay Yozabadinne Binuya naꞌay Noꞌadayi deꞌoosona.
34 Eti ubbabaa qoodidosonanne likkidosona, qassi likkidoba ubbaa xaafidosona.
35 Omoodduwappe kiyidi simmidaageeti Israaꞌeela Xoossaayyo xuuggiyo yarshshuwa yarshshidosona; 12 booraa Israaꞌeelatu ubbaayyo, qassi 96 dorssa orggeta, 77 dorssa maraanne nagaraa yarshshuwawu 12 deeshsha orggeta yarshshidosona; hegeeti ubbay Yihoowayyo yarshshido xuuggiyo yarshshota.
36 Hegaappe simmin, kawuwa satirappetuyyonne* Shaafaappe Hefintta moottaa* haariyageetuyyo kawuwa dabddaabbiya immida, qassi eti asaa maaddidosonanne tumu Xoossaa keettawu koshshiyabaa immidosona.
Footnotes
^ Woykko “beeta maqidasiyan; Xoossaa garuwan.”
^ Woykko “Netinimeti.” Mise, “imettidaageeti.”
^ Woykko “Netinimetuppe.” Mise, “imettidaageetuppe.”
^ Woykko “qumaa miyo.”
^ Ha bonchcho sunttaa birshshettay “haaruwa naagiyageeta;” hegee ha sohuwan, Parsse Haaruwan moottata haariyageeta qonccissees.
^ Woykko “Efiraaxiisa pinnidi.”
