Izira 3:1-13
3 Laappuntta aginay gakkido wode, qassi Israaꞌeelati* bantta katamatun deꞌiyo wode, eti issi wozanan Yerusalaamen issippe shiiqidosona.
2 Yihozadaqa naꞌay Yeshuwinne A mala kahineti, qassi Salaatiyala naꞌay Zarubaabeelinne A ishantti denddidi, tumu Xoossaa asa gidiya Muuse higgiyan xaafettidaagaadan, xuuggiyo yarshshuwa an yarshshanawu Israaꞌeela Xoossaayyo yarshshiyosaa gimbbidosona.
3 Eti bantta yuushuwan deꞌiya deretuyyo yayyikkonne, yarshshiyosaa A kase sohuwan gimbbidosona; yaatidi, hegan maalladonne omarssi xuuggiyo yarshshuwa Yihoowayyo yarshshiyogaa doommidosona.
4 Yaatidi, eti higgiyan xaafettidaagaadan, Daasiya* Baalaa bonchchidosona, qassi eti gallassan gallassan yarshshana bessiyogaa keena xuuggiyo yarshshuwa ubbatoo yarshshidosona.
5 Hegaappe simmin, ubbatoo yarshshiyo xuuggiyo yarshshota, aginay xeeriyo wode yarshshiyo yarshshota, Yihoowa geeshsha baalatu wode yarshshiyo yarshshota ubbaa, qassi ubba asay ba dosan Yihoowayyo immido yarshshota eti yarshshidosona.
6 Yihoowa keettaa* shuchchay hiixettiichchibeennaba gidikkonne, eti laappuntta aginawu koyro gallassaappe doommidi Yihoowayyo xuggiyo yarshshuwa yarshshiyogaa doommidosona.
7 Eti shuchchaa massiyageetussinne hiillanchchatussi miishshaa immidosona; qassi Sidoonatinne Xiiroosati Parsse Kawoy Qiiroosi eta azazidoogaadan, erzze giyo xiiddaa Libanosappe abbaa bollaara Yoophphe ehiyo gishshawu, etawu miyobaa, uyiyobaanne zaytiya immidosona.
8 Eti Yerusalaamen deꞌiya tumu Xoossaa keettaa yi simmin, naaꞌꞌantto layttan, naaꞌꞌantto aginan, Salaatiyala naꞌay Zarubaabeeli, Yihozadaqa naꞌay Yeshuwi, qassi eta ishantti, kahinetinne Leewati, hegaa bollikka, omoodduwappe kiyidi Yerusalaame simmidaageeti ubbay oosuwa doommidosona; eti Yihoowa keettaa oosuwa kaalettiyageeta gidanaadan layttay 20nne hegaappe bolla gidido Leewata sunttidosona.
9 Yaaniyo gishshawu, Yeshuwi, A attuma naatinne A ishantti, qassi Qadimiꞌeelinne A attuma naati, hegeetikka Yihudaa attuma naati, Leewa yara gidiya Henadada attuma naatuura, eta attuma naatuuranne eta ishanttuura, tumu Xoossaa keettaa oosuwa oottiyageeta kaalettanawu issippe gididosona.
10 Gimbbiyageeti Yihoowa keettaa shuchchaa hiixxido wode, bantta maayuwa maayida kahineti xurumbbaa oyqqidi, qassi Leewati, Asaafa attuma naati simbbaaliya* oyqqidi, Isiraaꞌeela Kawoy Daawiti azazidoogaadan, Yihoowa sabbanawu eqqidosona.
11 Qassi eti Yihoowa sabbiyogaanne galatiyogaa doommidosona. Eti sophi sophi ekkidi, “ayssi giikko I loꞌꞌo; I Israaꞌeela siiqiyo tasenna siiqoy merinawu eqqidi deꞌees” yaagidi yexxidosona; hegaappe simmin, asay ubbay Yihoowa keettaa baasuwa shuchchay hiixettido gishshawu, ba qaalaa xoqqu ootti hombbociiddi Yihoowa sabbiis.
12 Kase keettaa beꞌida cima asati hegeetikka, kahinetuppe, Leewatuppenne aawatu keettaa kaalettiyaageetuppe daroti, ha keettaa shuchchay hiixettiyogaa beꞌido wode, bantta qaalaa xoqqu oottidi yeekkidosona; shin hara daroti bantta qaalaa xoqqu oottidi ufayssan hombbocidosona.
13 Hegaappe denddidaagan, asay keehi wocamiyogee haahuwan siyettiyo gishshawu, ufayttidi hombbociyogaa, azzanidi yeekkiyogaappe asay shaakki eranawu danddayibeenna.
