Izira 10:1-44
10 Iziri woossiiddinne asaa nagaraa paaxiiddi, tumu Xoossaa keettaa sinttan gufannidi yeekkishin, Israaꞌeelatuppe daro attumaageeti, maccaageetinne naati A matan shiiqidosona; qassi asay afuttaa holssayidi yeekkees.
2 Yaatin, Elaama naatuppe Yihiꞌeela naꞌay Shekanee Izirayyo hagaadan giis: “Nu yuushuwan deꞌiya deretuppe macca asaa ekkiyogan* nu Xoossawu ammanettennaagaa bessiyabaa oottida. Yaanidaba gidikkonne, Israaꞌeelassi haꞌꞌikka hidootay deꞌees.
3 Yaakko, Yihoowa kaaletuwadaaninne nu Xoossaa azazuwa bonchchiyageetu* kaaletuwadan, machchota ubbaa eti yelido naatuura yeddanawu nu Xoossaara ane maacettoos. Higgee yootiyogaadan ane oottoos.
4 Dendda, ayssi giikko hagee ne aawatetta, qassi nuuni nenaara deꞌoos. Minna, qassi koshshiyabaa ootta.”
5 He wode Iziri denddidi, odettidabaa oottanaadan kahineta kaalettiyageeta, Leewata kaalettiyageetanne ubba Israaꞌeelata kaalettiyageeta caaqissiis. Yaatin eti caaqqidosona.
6 Iziri tumu Xoossaa keettaa sinttappe denddidi, Eliyashiba naꞌaa Yihohanana kifiliya* biis. I yaa biidaba gidikkonne, omoodduwappe simmida asay ammanettibeennaagaa gaasuwan kayyottiiddi deꞌiyo gishshawu, ayba qumanne mibeenna woy haatta uyibeenna.
7 Hegaappe simmin, omooddettidaageeti ubbay Yerusalaamen shiiqanaadan, Yihudaaninne Yerusalaamen ubbasan eti awaajjidosona;
8 daannatinne cimati kuuyidoogaadan, heezzu gallassa giddon yeenna O aqoynne muleera wotti ekettana,* qassi I omoodduwappe simmidaageetu galchchaappe goodettana.
9 Hegaa gishshawu, Yihudaanne Biniyama yara gidiya attumaageeti ubbay heezzu gallassaa giddon, hegeekka, uddufuntta aginawu 20tto gallassan, Yerusalaamen issippe shiiqidosona. Asay ubbay tumu Xoossaa keettaa dirssaa giddon uttidi, eti shiiqido allaallee deexo gidiyo gishshawunne wolqqaama iray bukkiyo gishshawu kokkoroosona.
10 Hegaappe simmin, kahinee Iziri denddidi etawu hagaadan giis: “Intte hara biittaa macca asaa ekkiyogan Xoossawu ammanettennaagaa bessiyabaa oottideta, qassi yaatiyogan Israaꞌeelatu mooruwa yaa darissideta.
11 Haꞌꞌi intte mayzza aawatu Xoossaa Yihoowayyo intte nagaraa paaxite, qassi I koyiyobaa oottite. He biittaa deretuppenne ha hara biittaa machchotuppe shaahettite.”
12 Yaagin kumetta galchchay bantta qaalaa xoqqu oottidi hagaadan zaaridosona: “Neeni yootiyogaadan nuuni oottana bessees.
13 Gidikkokka, asay keehi daro, qassi hagee iray bukkiyo wode. Nuuni karen eqqidi takkana danddayokko, qassi ha allaalliyan nuuni keehi makkalido gishshawu, hegee issi woy naaꞌꞌu gallassa xallan giigiyaba gidenna.
14 Yaaniyo gishshawu, hayyanaa nu daannati kumetta galchchaa gishshaa koshshiyabaa oottona; qassi ha allaalliyara gayttidaagan nu Xoossay nu bolli hanqqettido eexxiya hanqquwappe simmana gakkanaashin, hara biittaa macca asaa ekkida nu katamatun deꞌiyageeti ubbay, keerettido wodiyan ubba katamatu cimatuuranne pirddiyageetuura issippe yona.”
15 Gidikkonne, Asaheela naꞌay Yonataninne Tiqiwa naꞌay Yahizayi hegaa maayibookkona, qassi Leewata gidiya Meshulaminne Shabbetayi eta kaafidosona.
16 Shin omoodettidaageeti kase maayettidoogaadan oottidosona; qassi kahinee Izirinne bantta sunttaa maaran xaafettida, aawatu keettaa kaalettiyageeti ubbay he allaalliya yiggi xeellanawu tammantta aginawu koyro gallassan banttarkka dumma shiiqidosona;
17 eti hara biittaa macca asaa ekkida ubbatubaa yiggi xeelliyogaa koyro aginawu koyro gallassi wurssidosona.
18 Qassi, kahinetu attuma naatuppe amaridaageeti hara biittaa macca asaa ekkidoogee erettiis; hegeeti Yihozadaqa naꞌaa Yeshuwa attuma naatanne A ishantta, Maꞌaseya, Eliꞌeezera, Yaribanne Gedaliya.
19 Shin eti bantta machchota yeddanawu qaalaa gelidosona,* qassi eti mooranchcha gidiyo gishshawu, bantta mooruwawu wudiyappe issi dorssa orggiya yarshshana.
20 Moorida harati, Immera attuma naatuppe, Hananiꞌanne Zebadiya;
21 qassi Harima attuma naatuppe, Maꞌaseya, Eelaasa, Shemaya, Yihiꞌeelanne Ooziyana;
22 Pashihura attuma naatuppe, Eliyoꞌenaya, Maꞌaseya, Isimaaꞌeela, Netaniꞌeela, Yozabadanne Eleꞌasa.
23 Qassi Leewatuppe, Yozabada, Shimeya, Qelaya (hegeekka, Qelixa), Patahiya, Yihudaanne Eliꞌeezera;
24 yexxiyageetuppe, Eliyashiba; qassi penggiya naagiyageetuppe, Shalluma, Telemanne Uriꞌa.
25 Qassi Israaꞌeelatuppe hageeta: Parosha attuma naatuppe, Ramiyaha, Yizziya, Malkkiya, Miyamina, Eliꞌaazara, Malkkiyanne Benaya;
26 Elaama attuma naatuppe, Mataniya, Zakkaariyasa, Yihiꞌeela, Abddiꞌa, Yeremotanne Eelaasa;
27 Zattu attuma naatuppe, Eliyoꞌenaya, Eliyashiba, Mataniya, Yeremota, Zabadanne Aziza;
28 Bebaya attuma naatuppe Yihohanana, Hananiya, Zabbayanne Atilaya;
29 qassi Bana attuma naatuppe, Meshulama, Malluka, Adaya, Yashuba, Sheꞌalanne Yeremota;
30 Pahat-mooꞌaaba attuma naatuppe, Adinna, Kelala, Benaya, Maꞌaseya, Mataniya, Bezaliꞌeela, Binuyanne Minaasa;
31 qassi Harima attuma naatuppe, Eliꞌeezera, Yishꞌiya, Malkkiya, Shemaya, Shimeꞌona,
32 Biniyama, Mallukanne Shemariya;
33 Hashuma attuma naatuppe, Matenaya, Matata, Zabada, Elifelexa, Yeremaya, Minaasanne Shimeya;
34 qassi Bana attuma naatuppe, Maꞌadaya, Amirama, Uꞌeela,
35 Benaya, Bediya, Keluha,
36 Waniya, Meremota, Eliyashiba,
37 Mataniya, Matenayanne Yaaꞌisa;
38 qassi Binuya attuma naatuppe, Shimeya,
39 Shelemiya, Naataana, Adaya,
40 Makinadabaya, Shashaya, Sharaya,
41 Azariꞌeela, Shelemiya, Shemariya,
42 Shalluma, Amariyanne Yooseefa;
43 qassi Nebo attuma naatuppe, Yeꞌeela, Matitiya, Zabada, Zebina, Yaddaya, Yuuꞌeelanne Benaya.
44 Hageeti ubbay hara biittaa macca asaa ekkidosona, qassi eti bantta machchota eta naatuura yeddidosona.
