Izira 6:1-22
6 Kawoy Dariyosi azazuwa kessidoy he wode; yaatin eti Baabiloonen alꞌꞌobata wottido buqura keettaa* pilggidosona.
2 Meedoona moottan,* Ekibatanan deꞌiya, yuushoy gimbbettido sohuwan issi xaaxettida maxaafay beettiis; qassi kaallidi deꞌiya awaajjoy an xaafetti uttiis:
3 “Kawuwa Qiiroosa haaruwa koyro layttan, Yerusalaamen deꞌiya Xoossaa keettaara gayttidaagan Kawoy Qiiroosi hagaadan giidi azaziis: ‘Eti yarshshuwa yan yarshshana mala keettay zaarettidi keexetto, qassi A shuchchati hiixettona; A geesay 60 wara,* qassi A gomppay 60 wara gido,
4 heezzu maaran gita shuchchati wodhdhin, issi maaran xawulay yegetto; qassi hegawu kessiyo miishshay kawo keettaappe qanxxetto.
5 Hegaa bollikka, Nebukadanaxori Yerusalaamen deꞌiya Xoossaa keettaappe* ekkidi Baabiloone efiido worqqaappenne biraappe merettida miishshati, Yerusalaamen deꞌiya Xoossaa keettan bantta kase sohuwan deꞌana mala guyye simmona.’
6 “Hegaa gishshawu, Shaafaappe Hefintta moottaa* haariya Tattanayaa, Shetar-bozenayaa, qassi Shaafaappe Hefintta moottaa garssaara haariya A miiretoo,* yaappe kichchite.
7 Xoossaa keettaa oosuwan kelttiya geloppite. Ayhudata haariyageenne Ayhudatu cimati Xoossaa keettaa kase sohuwan zaarettidi keexxana.
8 Hegaa bollikka, Ayhudatu cimati Xoossaa keettaa zaarettidi keexxana mala intte etayyo oottanabay aybakko taani azazays: Oosoy xubbiyabi baynnan oosettanaadan kawuwa buquraa wottiyosaappe, hegeekka, Shaafaappe Hefintta moottaappe shiiqida qaraxaappe koshshiya miishshay ha asatuyyo eesuwan imetto.
9 Koshshiya aybinne, hegeekka, saluwan deꞌiya Xoossawu xuuggiyo yarshshuwa yarshshanawu mirggoti, hegaadankka, dorssa orggetinne dorssa marati, qassi gisttee, maxinee, woyneenne zaytee Yerusalaamen deꞌiya kahineti koyiyogaa keenay, ubba gallassi aggennan etayyo imetto;
10 yaatikko, eti saluwan deꞌiya Xoossaa ufayssiya yarshshuwa aggennan yarshshananne kawuwanne A naatu deꞌuwawu woossana danddayoosona.
11 Qassi, ooninne ha awaajjuwawu azazettana xayikko, he mooruwa gaasuwan, A keettaa tuuqee shodettin I hegaa bolli kaqettanaadaaninne* A keettay dere asaa sheeshsha keetta* gidanaadan taani azazaas.
12 Ha azazuwa azazettennan agganawu maliyanne Yerusalaamen deꞌiya he Xoossaa keettaa xayssanawu kushiya denttiya ay kawonne woy ay asanne gidin, ba sunttay yan deꞌanaadan oottida Xoossay A xaysso. Taani Dariyosi hagaa azazays. Hagee eesuwan poletto.”
13 Yaatin, Shaafaappe Hefintta moottaa haariya Tattanayi, qassi Shetar-bozenayinne eta miireti Kawoy Dariyosi azazido ubbabaa eesuwan polidosona.
14 Qassi hiraagaa* yootiya Haggeenne Iddoꞌa naꞌaa naꞌay Zakkaariyasi yootido hiraagay minttettin, Ayhudatu cimati aggennan keexxidosonanne oosuwa eesoyidosona; eti Israaꞌeela Xoossay azazidoogaadan, qassi Qiiroosi, Dariyosinne Parsse Kawoy Arxxekisesi* azazidoogaadan, keexxiyogaa polidosona.
15 Kawuwa Dariyosa haaruwa usuppuntta layttan, Adaare* aginawu heezzantto gallassi, eti keettaa muleera polidosona.
16 Yaatin Israaꞌeelati, kahineti, Leewatinne omoodettidaageeti ha Xoossaa keettaa anjjissuwa* baalaa ufayttiiddi bonchchidosona.
17 Eti ha Xoossaa keettaa anjjissuwa baalawu, 100 boorata, 200 dorssa orggeta, 400 dorssa marata, qassi Israaꞌeela asa ubbaa nagaraa yarshshuwawu, Israaꞌeela yaratu qoodaadan 12 deeshsha orggeta yarshshidosona.
18 Eti Muuse maxaafan xaafettidaagaadan, Yerusalaamen Xoossaa oosuwawu kahineta eta citan, qassi Leewata eta shaahuwan sunttidosona.
19 Qassi omoodettidaageeti, koyro aginawu 14tta gallassan Paasikaa baalaa bonchchidosona.
20 Kahinetinne Leewati issoynne attennan banttana geeshshidosona, yaatiyo gishshawu eti ubbay geeshsha; eti omoodettidaageetu ubbaassi, bantta mala kahinetussinne banttassi Paasikawu yarshshiyobaa shukkidosona.
21 Yaatin, Israaꞌeela Xoossaa Yihoowayyo goynnanawu* etaara walahettidanne he biittan deꞌiya deretu tunatettaappe banttana gaxayida ubbaara, omoodduwappe simmida Israaꞌeelati hegaa miidosona.
22 Qassi eti ufayttanaadan Yihoowi oottido gishshawunne Israaꞌeela Xoossaa, tumu Xoossaa keettaa oosuwan eta maaddana* mala, keha ayfiyan eta xeellanaadan Asoore kawuwa wozanaa denttettido gishshawu, laappun gallassawu Oyttaa Baalaa ufayttiiddi bonchchidosona.
Footnotes
^ Mise, “mazggafa keettaa.”
^ Woykko “awuraajjan.”
^ Woykko “beeta maqidasiyappe; Xoossaa garuwappe.”
^ Woykko “Efiraaxiisa pinnidi.”
^ Woykko “laggetoo.”
^ Woykko “baxxannettanaadaaninne.”
^ Woykko geella, “miiriqaa oliyosa; oshay kuurettiyosa.”
^ Woykko “Xoossay erissidobaa.”
^ Guj. B15 xeella.
^ Woykko “sheedhdhiyo.”
^ Mise, “koyanawu.”
^ Mise, “eta kusheta minttana.”
