Izira 1:1-11
1 Parsse Kawoy Qiiroosi kawotido koyro layttan, Yihoowi Ermmaasa baggaara yootidobay polettana mala, Parsse Kawoy Qiiroosi ba kawotetta ubban hagaadan giidi awaajjanaadan Yihoowi A ayyaanaa denttettiis, qassi I hegaa xaafi wottiis:
2 “Parsse Kawoy Qiiroosi hagaadan gees: ‘Saluwa Xoossay Yihoowi saꞌaa kawotettata ubbaa taayyo immiis, qassi Yihudan deꞌiya Yerusalaamen ayyo keettaa keexxanaadan tana azaziis.
3 A asaa ubbaa giddon inttenaara deꞌiya oonaaranne A Xoossay gido, qassi I Yihudan deꞌiya Yerusalaame kiyo; yaatidi, A keettay kase Yerusalaamen deꞌiyo* Israaꞌeela Xoossaa, Yihoowa keettaa zaarettidi keexxo; I tumu Xoossaa.
4 Hara biittaa asadan awankka deꞌiya oonanne, A shooroti* Yerusalaamen kase deꞌiya tumu Xoossaa keettaayyo dosan immiyobaara biraanne worqqaa, buquratanne mehiya immidi maaddona.’”
5 Yaatin, Yihudaa keettaanne Biniyama keettaa kaalettiyageeti, qassi kahinetinne Leewati, ee, tumu Xoossay eta ayyaanaa denttettido ubbay pude kiyidi, Yerusalaamen kase deꞌiya Yihoowa keettaa zaarettidi keexxanawu giigettidosona.
6 Eta yuushuwan deꞌiya ubbay dosan immiyobata, qassi biraappenne worqqaappe merettida miishshata, buqurata, mehiyanne alꞌꞌobata immidi eta maaddidosona.*
7 Qassi, Nebukadanaxori Yerusalaameppe efiidi ba xoossaa keettan wottido, Yihoowa keettaa miishshata Kawoy Qiiroosi yaappe kessiis.
8 Parsse Kawoy Qiiroosi buquran aawatiya Mitiredati kaalli xeellin hegeeta yaappe kessiis, qassi Mitiredati hegeeta qoodidi Yihudaa kaalettiya Sheshibazzarawu* sheedhdhiis.
9 Qoodidobati hageeta: Keeshe milatiya 30 worqqa miishshata, keeshe milatiya 1,000 bira miishshata, eta mala hara 29 miishshata,
10 30 guutta worqqa kereta, 410 guutta bira kereta, qassi 1,000 hara miishshata.
11 Worqqa miishshatinne bira miishshati muleera 5,400. Omooddettidaageeti Baabilooneppe Yerusalaame simmiyo wode, Sheshibazzari hegeeta ubbaa ekkidi kiyiis.
