Izira 7:1-28
7 Hageeti hani simmin, Parsse Kawuwa Arxxekisesa haaruwa wode, Iziri* Baabilooneppe Yerusalaame simmiis. I Seraya naꞌaa, Serayi Azariya naꞌaa, Azaree Hilqqiya naꞌaa,
2 Hilqqee Shalluma naꞌaa, Shallumi Xaadooqa naꞌaa, Xaadooqi Ahixuba naꞌaa,
3 Ahixubi Amariya naꞌaa, Amaree Azariya naꞌaa, Azaree Merayota naꞌaa,
4 Merayoti Zerahiya naꞌaa, Zerahee Uzziꞌa naꞌaa, Uzziꞌi Buqqa naꞌaa,
5 Buqqi Abishuꞌa naꞌaa, Abishuꞌi Pinehasa naꞌaa, Pinehasi Eliꞌaazara naꞌaa, Eliꞌaazari waanna kahiniya Aaroona naꞌaa.
6 Baabilooneppe yiida Iziri hagaa. I xaafenne* Israaꞌeela Xoossaa Yihoowi immido Muuse Higgiya luxidi eriya* asa. A Xoossaa Yihoowa kushee A bolli deꞌiyo* gishshawu, I oychchido ubbabaa kawoy ayyo immiis.
7 Israaꞌeelatuppe, kahinetuppe, Leewatuppe, yexxiyageetuppe, penggiya naagiyageetuppenne Xoossaa keettan* haggaaziyageetuppe* amaridaageeti Kawuwa Arxxekisesi haarido laappuntta layttan Yerusalaame kiyidosona.
8 Qassi kawoy haarido laappuntta layttan, ichchashantto aginan Izirikka Yerusalaame yiis.
9 Doometta aginawu koyro gallassi, I Baabilooneppe kiyidi manddariyogaa doommiis; yaatidi, A Xoossaa keha kushee A bolli deꞌiyo gishshawu, ichchashantta aginan koyro gallassi Yerusalaame gakkiis.
10 Iziri Yihoowa Higgiya pilgganawunne oottanawu, qassi an deꞌiya wogatanne pirddata Israaꞌeelan tamaarissanawu ba wozanaa giigissi wottiis.*
11 Yihoowa azazotanne I Israaꞌeelatuyyo immido wogata loytti xannaꞌiya,* qassi xaafe* gidida kahiniya Izirayyo Kawuwa Arxxekisesi immido dabddaabbee hagaa:
12 * “Kawotu kawuwa Arxxekisesappe, Saluwa Xoossaa Higgiya zaaretti xaafiya* kahiniya Izirassi: Zawi baynna saroy neeyyo gido. Simi,
13 ta haaruwan deꞌiya Israaꞌeela asaappe, eta kahinetuppenne Leewatuppe nenaara Yerusalaame baanawu koyiya ubbay baanaadan azazaas.
14 Hegaa gishshawu, kawoynne A zoriya laappunati nena kiittidoy ne kushiyan* deꞌiya ne Xoossaa Higgiya Yihudaaninne Yerusalaamen deꞌiya asay oosuwan peeshshiyakkonne shaakka eranaadaana,
15 hegaa bollikka, kawoynne A zoriyageeti Yerusalaamen deꞌiya Israaꞌeela Xoossawu bantta dosan immido biraanne worqqaa,
16 qassi Baabiloone mootta* ubbaappe neeni shiishshiyo* bira ubbaanne worqqa ubbaa, asaynne kahineti Yerusalaamen deꞌiya bantta Xoossaa keettawu dosan immiyo imotaara issippe ekkada efaanaadaana.
17 Neeni ha miishshan boorata, dorssa orggetanne dorssa marata, kattaa yarshshuwawunne ushshaa yarshshuwawu koshshiyabatuura issippe eesuwan shammana bessees, qassi hegeeta Yerusalaamen deꞌiya intte Xoossaa keettan yarshshiyo sohuwan yarshshana koshshees.
18 “Qassi attida biraanne worqqaa, intte Xoossaa sheniyadan, neeyyonne ne ishanttuyyo loꞌꞌo milatida aybanne oottite.
19 Hegaa bollikka, Xoossaa keettaa oosuwawu imettida miishshata ubbaa, Xoossaa sintti Yerusalaame neeni efaana koshshees.
20 Qassi ne Xoossaa keettawu neeni immana bessiyo hara koshshiyabata kawuwa buquraa wottiyosaappe imma.
21 “Shaafaappe Hefintta moottan* buquran aawatiya ubbay, saluwa Xoossaa Higgiya zaaretti xaafiya* kahiniya Iziri inttena oychchiyo ubbabaa eesuwan polanaadan, taani Kawoy Arxxekisesi azazaas,
22 biraa 100 taalantte* gakkanawu, gisttiya 100 kore* gakkanawu, woyniya 100 baze* gakkanawu, zaytiya 100 baze gakkanawu, qassi koshshiyagaa keena daro maxiniya immite.
23 Kawuwa haaruwan deꞌiya asaa bollinne kawuwa naatu bolli saluwa Xoossay hanqqettenna mala, ba keettaa xeelliyagan I azazido ubbabay bessiyagaadan loytti poletto.
24 Hegaa bollikka, kahinetuppenne Leewatuppe, yexxiyageetuppenne muuziqa miishshaa kaaꞌiyageetuppe, penggiya naagiyageetuppe, Xoossaa keettan haggaaziyageetuppe,* qassi ha Xoossaa keettaa oosuwa oottiyageetuppe ooppenne qaraxaa, giiraa, woy keellan qanxxiyo miishshaa aybanne oychchennaadan taani intteyyo gujjadakka yootays.
25 “Qassi nenoo Iziraa, neeni ne Xoossaappe ekkido hayyuwadan,* Shaafaappe Hefintta moottan deꞌiya asa ubbawu, hegeekka ne Xoossaa higgeta eriya ubbawu pirddana mala, yiggi xeelliyageetanne daannata suntta; qassi he higgeta erenna oonanne intte tamaarissana koshshees.
26 Ne Xoossaa higgiyanne kawuwa higgiya azazettenna ooninne hayquwan, biittaappe gooddiyogan, miishshaa qanxxissiyogan, woy qashuwan gidin, eesuwan qaxxayettana koshshees.”
27 Yerusalaamen deꞌiya Yihoowa keettaa puulayana mala kawuwa wozanaa denttettida nu mayzza aawatu Xoossay Yihoowi sabetto!
28 Kawuwa sinttan, A zoriyageetu sinttaaninne wolqqaama gidida, kawuwa daannatu ubbaa sinttan I tasenna siiquwa tawu bessiis. Hegaappe denddidaagan, ta Xoossaa Yihoowa kushee ta bolli deꞌiyo gishshawu, taani xala gidaas;* qassi tanaara baana mala Israaꞌeela asaappe kaalettiyageeta* shiishshaas.
Footnotes
^ Birshshettay “Maaduwa.”
^ Ibraawetto qaalay Higgiyanne hara Geeshsha Maxaafatu shaahota zaaretti xaafiyageetakka qonccissees.
^ Woykko “zaaretti xaafiyogan qara.”
^ Woykko “Xoossay A maaddiyo.”
^ Woykko “beeta maqidasiyan; Xoossaa garuwan.”
^ Woykko “Netinimeti.” Mise, “imettidaageeti.”
^ Woykko “ba wozanan murtti uttiis.”
^ Woykko “qaalata zaaretti xaafiya.”
^ Iz 7:12ppe 7:26 gakkanawu Aramattuwan koyro xaafettiis.
^ Woykko “xaafe gidida.”
^ Woykko “matan.”
^ Woykko “awuraajja.”
^ Mise, “demmiyo.”
^ Woykko “Efiraaxiisa pinnidi.”
^ Woykko “xaafe gidida.”
^ Woykko, “Netinimetuppe.” Mise, “imettidaageetuppe.”
^ Mise, “ne kushiyan deꞌiya, ne Xoossaa hayyuwadan.”
^ Woykko “tana minttaas.”
^ Mise, “huuphe gidiyageeta.”
