Numeri 6:1-27
6 Yehova a dovha a amba na Mushe a ri:
2 “Amba na Vhaisiraele u ri: ‘Arali munna kana mufumakadzi a ita muano wo khetheaho wa uri a vhe Munazari*+ wa Yehova,
3 ho ngo fanela u nwa waini na halwa. Ho ngo fanela u nwa tshinwiwa tshiṅwe na tshiṅwe tsho itwaho nga nḓirivhe kana u ḽa nḓirivhe,+ hu sa londwi uri ndi nṋu kana dzo omiswa.
4 Maḓuvha awe oṱhe musi e Munazari ho ngo fanela u ḽa tshithu naho tshi tshifhio tsho itwaho nga nḓirivhe, hu sa londwi uri ndi nḓirivhe dzi songo vhibvaho kana ndi makanda adzo.
5 “‘Maḓuvhani awe oṱhe a muano wawe wa u vha Munazari ho ngo fanela u vheula ṱhoho yawe.+ A dzule e mukhethwa nga u litsha mavhudzi a ṱhohoni yawe a tshi aluwa u swika a tshi fhedza maḓuvha awe e a a vhetshela Yehova.
6 Ho ngo fanela u sendela tsini na tshitumbu* tshifhingani tsha u ḓiṋekedza kha Yehova.
7 Naho arali khotsi awe, mme awe, murathu kana mukomana wawe kana khaladzi awe a fa, ho ngo fanela u ḓitshikafhadza,+ ngauri luswayo lwawe lwa u vha Munazari kha Mudzimu wawe lu kha ṱhoho yawe.
8 “‘Maḓuvha awe oṱhe musi e Munazari a dzule e mukhethwa phanḓa ha Yehova.
9 Fhedzi arali muṅwe muthu a sokou fela tsini hawe,+ a tshikafhadza mavhudzi a sumbedzaho uri o ḓiṋekedza kha Mudzimu, a vheule ṱhoho yawe+ nga ḓuvha ḽa u kunakiswa hawe. A i vheule nga ḓuvha ḽa vhusumbe.
10 Nga ḓuvha ḽa vhumalo a ḓise kha tshifhe maivha-muronzhe mavhili kana mafhondo mavhili a maivha muṋangoni wa dennde ḽa muṱangano.
11 Tshifhe u ḓo ṋekedza ḽiṅwe sa tshifhiwa tsha u pfumelela tshivhi,+ ḽiṅwe sa tshifhiwa tsha u fhiswa, a mu pfumelela tshivhi tshawe nge onoyo muthu a ḓitshikafhadza nga tshitumbu. A ite uri ṱhoho yawe i vhe khethwa nga ḽeneḽo ḓuvha.
12 A ḓiṋekedze kha Yehova uri a dovhe a vhe maḓuvhani awe a Vhunazari, u ḓo ḓisa thutha ya ṅwaha muthihi sa tshifhiwa tsha u pfumelela mulandu. Naho zwo ralo, maḓuvha o fhiraho ha nga ḓo vhalwa ngauri o tshikafhadzwa kha Vhunazari hawe.
13 “‘Mulayo wa Munazari ndi hoyu: Musi o fhedza maḓuvha awe a Vhunazari,+ u ḓo ḓiswa muṋangoni wa dennde ḽa muṱangano.
14 A ḓisele Yehova tshifhiwa tsha thutha nthihi i sa lwaliho ya ṅwaha muthihi sa tshifhiwa tsha u fhiswa,+ ngwana ya tsadzi nthihi i sa lwaliho ya ṅwaha muthihi sa tshifhiwa tsha u pfumelela tshivhi,+ thutha nthihi i sa lwaliho sa tshiṱhavhelo tsha u pfumedzana,+
15 manngi u re na ḽofo* dza fuḽauru tsekene yo ṱanganyiswaho na mapfura, makokisi a si na mbiliso o ḓodzwaho mapfura na tshifhiwa tshazwo tsha thoro+ na zwifhiwa zwa u nwiwa.+
16 Tshifhe u ḓo zwi ṋekedza phanḓa ha Yehova, a ṋekedza tshifhiwa tshawe tsha u pfumelela tshivhi na tshifhiwa tshawe tsha u fhiswa.
17 A ṋekedze thutha sa tshiṱhavhelo tsha u pfumedzana kha Yehova khathihi na manngi u re na ḽofo dzi si na mbiliso, tshifhe u ḓo ṋekedza tshifhiwa tsha thoro+ yazwo na tshifhiwa tshazwo tshi nwiwaho.
18 “‘Munazari u tea u vheula mavhudzi a ṱhohoni* yawe+ muṋangoni wa dennde ḽa muṱangano, a dzhie eneo mavhudzi e a a lela musi e Munazari, a a pose muliloni u re nga fhasi ha tshiṱhavhelo tsha u pfumedzana.
19 Tshifhe u tea u dzhia voho ḽa thutha ḽo vholomiswaho+ na ḽofo* nthihi i si na mbiliso i re kha manngi, na kukisi ḽithihi ḽi si na mbiliso, a zwi vhee kha tshanḓa tsha Munazari musi o no fhedza u vheula luswayo lwawe lwa Vhunazari.
20 Tshifhe u tea u zwi dzungudzela phanḓa na murahu sa tshifhiwa tsha u dzungudzwa phanḓa ha Yehova.+ Ndi tshifhiwa tshikhethwa kha tshifhe, u katela na tshiakha tsha tshifhiwa tsha u dzungudzwa na mulenzhe sa muṋeelo.+ Nga murahu ha zwenezwo, Munazari a nga nwa waini.
21 “‘Ndi wone mulayo wa Munazari+ ane a ita muano. Arali a ana, a tshi nga kona u swikelela u ṋekedza Yehova tshifhiwa tshine tsha fhira zwine zwa ṱoḓea kha Vhunazari hawe, a bvele phanḓa na muano wawe nga nṱhani ha mulayo wa Vhunazari hawe.’”
22 Yehova a amba na Mushe a ri:
23 “Vhudza Aroni na vharwa vhawe u ri: ‘Nḓila ine na fanela u fhaṱutshedza+ ngayo vhathu vha Isiraele ndi heyi. Ni vha vhudze uri:
24 “Yehova nga a ni fhaṱutshedze+ na u ni tsireledza.
25 Yehova nga a ni lavhelese tshifhaṱuwo tshawe tsho tsha,+ a ni sumbedze vhuthu.
26 Yehova nga a ni takalele a ni ṋee mulalo.”’+
27 Vha tea u vhea dzina ḽanga kha vhathu vha Isiraele+ uri ndi vha fhaṱutshedze.”+
