Numeri 20:1-29
20 Tshitshavha tshoṱhe tsha Isiraele tsha swika sogani ḽa Zini nga ṅwedzi wa u thoma, vhathu vha dzula henefho Kadese.+ Miriamu+ a fela henefho, a vhulungwa henefho.
2 Tshitshavha tsho vha tshi si na maḓi,+ tsha kuvhanganela Mushe na Aroni.
3 Vhathu vha lwa na Mushe+ vha ri: “Nga vhe ri fe musi vhahashu vha tshi fa phanḓa ha Yehova!
4 Ndi ngani no ḓisa tshivhidzo tsha Yehova fhano sogani uri riṋe na zwifuwo zwashu ri fele henefha?+
5 Ndi ngani no ri ranga phanḓa na ri bvisa Egipita na ri ḓisa afha fhethu hu si havhuḓi?+ A hu meli thoro, mahuyu, minḓirivhe na maphomagraneithi, a hu na maḓi a u nwa.”+
6 Ngauralo, Mushe na Aroni vha ṱuwa phanḓa ha tshivhidzo vha ya muṋangoni wa dennde ḽa muṱangano vha gwadama vho kwatamisa zwifhaṱuwo, vha vhona vhugala ha Yehova.+
7 Yehova a amba na Mushe a ri:
8 “Dzhia thonga u vhidze tshitshavha uri tshi kuvhangane, iwe na Aroni mukomana wau, u ambe na tombo ḽihulu vha tshi zwi vhona uri ḽi vha ṋee maḓi, u vha bvisele maḓi kha ḽeneḽi tombo ḽihulu, u ṋee tshitshavha na zwifuwo zwavho maḓi a u nwa.”+
9 Mushe a dzhia thonga phanḓa ha Yehova,+ sa zwe a mu laya.
10 Mushe na Aroni vha kuvhanganya tshivhidzo phanḓa ha tombo ḽihulu, Mushe a amba navho a ri: “Zwino thetshelesani inwi mashandukwa! Naa ri ni bvisele maḓi kha iḽi tombo ḽihulu?”+
11 Ndi hone Mushe a tshi imisela tshanḓa tshawe nṱha, a rwa ḽeneḽo tombo ḽihulu luvhili nga thonga yawe, ha bva maḓi manzhi, tshitshavha na zwifuwo zwatsho zwa thoma u nwa.+
12 Nga murahu Yehova a amba na Mushe na Aroni a ri: “Ngauri a no ngo sumbedza u vha na lutendo kha nṋe na u nnyita mukhethwa vhathu vha Isiraele vha tshi zwi vhona, a ni nga swikisi hetshi tshivhidzo shangoni ḽine nda ḓo tshi ṋea ḽone.”+
13 Haya ndi maḓi a Meriba,*+ he Vhaisiraele vha lwa na Yehova, a itwa mukhethwa vhukati havho.
14 Mushe a ruma vhaḓinḓa vha tshi bva Kadese uri vha ye ha khosi ya Edomo a ri:+ “Zwe Isiraele+ murathu wau a zwi amba ndi hezwi: ‘U a ḓivha zwavhuḓi nga ha u tambula hashu.
15 Vhokhotsi ashu vho ya Egipita,+ ra dzula ngei Egipita miṅwaha* minzhi,+ Vhaegipita vha tambudza riṋe na vhokhotsi ashu.+
16 Ro lilela Yehova a ri pfa,+ a ruma muruṅwa+ wawe a ri bvisa Egipita, zwino ri Kadese, muḓi u re mukanoni wa shango ḽau.
17 Ri khou humbela uri u ri tendele ri fhire nga shangoni ḽau. A ri nga fhiri nga masimuni kana nga minḓirivheni, a ri nga nwi maḓi a tshisima naho tshi tshifhio. Ri ḓo tshimbila Nḓilani ya Khosi ri sa pambutsheli kha tsha u ḽa kana tsha monde u swika ri tshi fhira shango ḽau.’”+
18 Naho zwo ralo, Edomo a amba nae a ri: “U songo fhira nga shangoni ḽashu. Arali wa fhira, ndi ḓo u ṱanganedza ndo fara banga.”
19 Vhaisiraele vha mu fhindula vha ri: “Ri ḓo tshimbila nga nḓila khulwane, arali riṋe na zwifuwo zwashu ra nwa maḓi au, ri ḓo u lifhela.+ A hu na tshiṅwe tshine ra khou tshi ṱoḓa nga nnḓa ha uri ri tendelwe uri ri fhire.”+
20 A ḓi dovha a ri: “U songo fhira.”+ Edomo a ḓa a ṱangana nae e na vhathu vhanzhi na mmbi i re na maanḓa.
21 Edomo a si tendele Vhaisiraele vha tshi fhira nga shangoni ḽawe; nga zwenezwo, Vhaisiraele vha mu ṱutshela.+
22 Tshitshavha tshoṱhe tsha vhathu vha Isiraele tsha takuwa Kadese tsha ya Thavhani ya Horo.+
23 Yehova a amba na Mushe na Aroni Thavhani ya Horo mukanoni wa shango ḽa Edomo a ri:
24 “Aroni u ḓo vhulungwa na vhathu vha hawe.+ Ha nga ḓo dzhena shangoni ḽine nda ḓo ḽi ṋea Vhaisiraele, ngauri vhuvhili haṋu no hanedza ndaela yanga nga ha maḓi ngei Meriba.+
25 Ṱuwa na Aroni na Eliasara murwa wawe u gonye navho Thavhani ya Horo.
26 U bvule Aroni zwiambaro+ zwawe zwa vhutshifhe u zwi ambadze Eliasara+ murwa wawe, Aroni u ḓo fela henefho.”
27 Mushe a ita zwe Yehova a mu laya, vha gonya Thavhani ya Horo tshitshavha tshoṱhe tshi tshi khou vha vhona.
28 Mushe a bvula Aroni zwiambaro zwa vhutshifhe a zwi ambadza Eliasara murwa wawe. Nga murahu Aroni a fela henefho nṱha ha thavha.+ Mushe na Eliasara vha tsa henefho thavhani.
29 Musi tshitshavha tshoṱhe tshi tshi vhona uri Aroni o fa, vhoṱhe vha nnḓu ya Isiraele vha lilela Aroni maḓuvha a 30.+
