Numeri 14:1-45
14 Tshitshavha tshoṱhe tsha vusa tshililo, vhathu vha lila na u zhamba vhusiku hoṱhe.+
2 Vhaisiraele vhoṱhe vha thoma u gungulela Mushe na Aroni,+ tshitshavha tshoṱhe tsha amba luvhi nga havho tsha ri: “Arali ri vhe ro fela zwashu shangoni ḽa Egipita kana arali ri vhe ro fela zwashu sogani ḽeneḽi!
3 Ndi ngani Yehova a tshi khou ri isa shangoni ḽeneḽi uri ri vhulawe nga banga?+ Vhafumakadzi vhashu na vhana vhashu vha ḓo dzhiiwa.+ Naa a si khwine ro humela Egipita?”+
4 Vha ita na u amba nga tshavho vha ri: “Kha ri nange murangaphanḓa ri humele Egipita!”+
5 Mushe na Aroni vha khotha vho kwatamisa zwifhaṱuwo phanḓa ha tshivhidzo tshoṱhe tsha Isiraele tshe tsha vha tsho kuvhangana.
6 Yoshua+ murwa wa Nunu na Kalebe+ murwa wa Yefune, vhaṅwe vha ṱholi dze dza vha dzo ya u ṱola shango, vha kherukanya zwiambaro zwavho,
7 vha amba na tshitshavha tshoṱhe tsha Vhaisiraele vha ri: “Shango ḽe ra tshimbila khaḽo u itela u ḽi ṱola ndi ḽavhuḓi nga maanḓa.+
8 Arali Yehova a tshi ri takalela, u ḓo ri dzhenisa kha ḽeneḽo shango a ri ṋea ḽone, shango ḽi elelaho mafhi na mutoli.+
9 Fhedzi ni songo shandukela Yehova, ni songo ofha vhathu vha ḽeneḽo shango,+ ngauri ri ḓo vha kunda.* A vho ngo tsha tsireledzea, Yehova u na riṋe.+ Ni songo vha ofha.”
10 Naho zwo ralo, tshitshavha tshoṱhe tsha amba uri tshi ḓo vha kanḓa nga matombo.+ Fhedzi vhugala ha Yehova ha vhonala nṱha ha dennde ḽa muṱangano vhathu vhoṱhe vha Isiraele vha tshi zwi vhona.+
11 Yehova a amba na Mushe a ri: “Avha vhathu vha ḓo nnyadza u swika lini,+ vha ḓo litsha lini u sa vha na lutendo kha nṋe ngeno vho vhona vhuṱolo hoṱhe he nda vhu ita phanḓa havho?+
12 Nnditshe ndi vha rwe nga dwadze ndi vha vhulaye, ndi u ite lushaka luhulu na lu re na maanḓa u vha fhira.”+
13 Fhedzi Mushe a amba na Yehova a ri: “Vhaegipita vha ḓo zwi pfa uri havha vhathu wo vha pfulusa nga maanḓa au vhukati havho,+
14 vha ḓo vhudza vhadzulapo vha ḽino shango. Na vhenevho vhathu vho zwi pfa uri iwe Yehova u na havha vhathu,+ wo ḓivhonadza khavho.+ Ndi iwe Yehova, gole ḽau ḽi nṱha havho, u vha ranga phanḓa nga gole nga masiari, vhusiku nga mulilo.+
15 Arali wa vhulaya vhenevha vhathu nga khathihi, tshaka dze dza pfa bvumo ḽau dzi ḓo ri:
16 ‘Yehova o kundwa u dzhenisa avha vhathu shangoni ḽe a vha anela uri u ḓo vha ṋea, a vha vhulaya sogani.’+
17 Zwino ndi khou humbela iwe Yehova, maanḓa au nga a vhe mahulu samusi wo fhulufhedzisa, musi u tshi ri:
18 ‘Yehova, a sa ṱavhanyi u sinyuwa na a re na lufuno luhulu lu sa shanduki,+ ane a hangwela vhukhakhi na vhutshinyi, fhedzi a nga si litshe a re na mulandu a songo pfiswa vhuṱungu, ane a pfisa vhana vhuṱungu nga nṱhani ha vhukhakhi ha vhokhotsi avho, u bva kha murafho wa vhuraru u swika kha wa vhuṋa.’+
19 Ndi khou humbela uri u hangwele havha vhathu vhutshinyi nga lufuno lwau luhulu lu sa shanduki, samusi wo hangwela vhenevha vhathu u bva Egipita u swika zwino.”+
20 Yehova a ri: “Ndi ḓo vha hangwela vhunga wo amba.+
21 Ndi ana nga vhutshilo hanga, ḽifhasi ḽoṱhe ḽi ḓo ḓala vhugala ha Yehova.+
22 Naho zwo ralo, vhathu vhoṱhe vhe vha vhona vhugala hanga na vhuṱolo hanga+ he nda vhu ita ngei Egipita na ngei sogani, vha bvela phanḓa vha tshi nndinga+ lwa fumi, vha si thetshelese zwine nda amba+
23 a vha nga ḓo vhona shango ḽe nda anela vhokhotsi avho. Vhoṱhe vhe vha nnyadza a vha nga ḽi vhoni.+
24 Fhedzi ngauri mushumeli wanga Kalebe+ o vha a sa fani na vhaṅwe, a bvela phanḓa a tshi ntevhela nga mbilu yoṱhe, ndi ḓo ita uri a dzhene shangoni ḽe a vha o ya khaḽo ḽi ḓo vha ḽa vhana vhawe.+
25 Samusi Vhaamaleke na Vhakanana+ vha tshi kha ḓi dzula govhani, matshelo inwi ni hume ni ye sogani nga nḓila i yaho Lwanzheni Lutswuku.”+
26 Yehova a amba na Mushe na Aroni a ri:
27 “Itshi tshitshavha tshivhi tshi ḓo ngungulela u swika lini?+ Ndo zwi pfa musi Vhaisiraele vha tshi ngungulela.+
28 U vha vhudze uri Yehova u ri: “Ndi ana nga vhutshilo hanga, ndi ḓo ni ita zwe nda pfa ni tshi amba!”+
29 Zwitumbu zwaṋu zwi ḓo balangana na heḽi soga,+ muṅwe na muṅwe waṋu a re na miṅwaha ya 20 u ya nṱha o ṅwaliswaho, vhoṱhe vho ngungulelaho.+
30 A hu na na muthihi waṋu ane a ḓo dzhena shangoni ḽe nda ana uri ni ḓo dzula khaḽo,+ vhane vha ḓo dzhena ndi Kalebe murwa wa Yefune na Yoshua murwa wa Nunu.+
31 “‘“Hu ḓo dzhena vhana vhaṋu vhe na ri vha ḓo dzhiiwa,+ vha ḓo ḓivha shango ḽe inwi na ḽi landula.+
32 Fhedzi inwi ni ḓo fela sogani ḽeneḽi.
33 Vhana vhaṋu vha ḓo vha vhalisa sogani miṅwaha ya 40,+ vha ḓo ḓifhindulela nga nṱhani ha u sa fhulufhedzea* haṋu, u swika ni tshi fa noṱhe sogani.+
34 No fhedza maḓuvha a 40 ni tshi ṱola shango ḽeneḽo,+ ḓuvha ḽithihi ḽi lingana na ṅwaha, ni ḓo ḓifhindulela vhukhakhi haṋu miṅwaha ya 40,+ ngauri ni ḓo ḓivha zwine u nkhanedza* zwa amba zwone.
35 “‘“Nṋe Yehova ndo amba. Hezwi ndi zwine nda ḓo zwi ita hetshi tshitshavha tshivhi, vhoṱhe vhe vha kuvhangana u itela u lwa na nṋe, vha ḓo fhelela henefha sogani, vha ḓo fela henefha.+
36 Vhanna vhe Mushe a vha ruma uri vha ye u ṱola shango, vhe vha ita uri tshitshavha tshoṱhe tshi mu gungulele musi vha tshi vhuya na muvhigo u si wavhuḓi nga ha ḽeneḽo shango,+
37 vhanna vhe vha vhuya na muvhigo u si wavhuḓi nga ha ḽeneḽo shango vha ḓo pfiswa vhuṱungu, vha fa phanḓa ha Yehova.+
38 Fhedzi Yoshua murwa wa Nunu na Kalebe murwa wa Yefune, vhaṅwe vha ṱholi dze dza vha dzo ya u ṱola shango, vha ḓo tshila.”’”+
39 Musi Mushe a tshi vhudza Vhaisiraele vhoṱhe enea mafhungo, vha vusa tshililo tshihulu.
40 Zwiṅwe hafhu, vha vuwa hu tshee nga matsheloni vha lingedza u ya ṱhodzini ya thavha, vha tshi ri: “Ro ita tshivhi. Fhedzi zwino ro lugela u ya fhethu he Yehova a ri vhudza hone.”+
41 Fhedzi Mushe a ri: “Ndi ngani ni tshi khou pfuka ndaela ya Yehova? A ni nga bveleli kha zwine na khou zwi ita.
42 Ni songo gonya, ngauri Yehova haho vhukati haṋu; ni ḓo kundwa nga maswina aṋu.+
43 Ngauri ni ḓo ṱangana na Vhaamaleke na Vhakanana,+ ni ḓo vhulawa nga banga. Ngauri no litsha u tevhela Yehova, Yehova ha nga ḓo vha na inwi.”+
44 Naho zwo ralo, vha kombetshedza u gonya nṱha ha thavha,+ mbulungelo ya Yehova ya mulanga i si bve henefho vhukati ha dennde, na Mushe a si bve.+
45 Vhaamaleke na Vhakanana vha dzulaho henefho dzithavhani vha bva, vha vha vhulaya, vha vha pandamedza u vhuya u swika Horoma.+
