Numeri 17:1-13
-
Thonga ya Aroni yo bvaho maluvha ndi tshiga (1-13)
17 Yehova a amba na Mushe a ri:
2 “Amba na Vhaisiraele u dzhie thonga kha vha nnḓu iṅwe na iṅwe ya vhokhotsi avho, kha vharangaphanḓa vha nnḓu iṅwe na iṅwe ya vhokhotsi avho,+ thonga dza 12. U ṅwale dzina ḽa muṅwe na muṅwe kha thonga yawe.
3 U ṅwale dzina ḽa Aroni kha thonga ya Levi, ngauri hu na thonga nthihi kha murangaphanḓa wa vha nnḓu iṅwe na iṅwe ya vhokhotsi avho.
4 U dzi vhee denndeni ḽa muṱangano phanḓa ha Vhuṱanzi,*+ hune nda dzulela u ḓivhonadza kha iwe.+
5 Thonga ya munna ane nda ḓo mu nanga+ i ḓo bva maluvha, ndi ḓo ita uri Vhaisiraele vha si tsha ngungulela,+ ngauri na inwi vha khou ni gungulela.”+
6 Mushe a amba na Vhaisiraele, vharangaphanḓa vhavho vhoṱhe vha mu ṋea dzithonga, murangaphanḓa wa nnḓu iṅwe na iṅwe ya vhokhotsi avho a mu ṋea thonga, dza vha 12, thonga ya Aroni yo vha i kha dzenedzo thonga dzavho.
7 Mushe a vhea dzenedzo thonga phanḓa ha Yehova denndeni ḽikhethwa ḽi re na mbulungelo ya mulanga.
8 Nga ḓuvha ḽi tevhelaho musi Mushe a tshi dzhena denndeni ḽikhethwa ḽi re na mbulungelo ya mulanga, a vhona thonga ya Aroni wa muṱa wa Levi yo simuwa, yo bva maluvha na u aṋwa alimondo dzo vhibvaho.
9 Mushe a bvisela nnḓa thonga dzoṱhe dze dza vha dzi phanḓa ha Yehova a dzi isa kha vhathu vhoṱhe vha Isiraele. Vha dzi sedza, munna muṅwe na muṅwe a dzhia thonga yawe.
10 Nga zwenezwo, Yehova a amba na Mushe a ri: “Vhuyedzedza thonga ya Aroni+ phanḓa ha Vhuṱanzi uri i vhe tshiga+ kha vhana vha mashandukwa+ uri vha litshe u ngungulela uri vha si fe.”
11 Nga u ṱavhanya Mushe a ita zwe Yehova a mu laya. A ita nga u ralo.
12 Vhaisiraele vha amba na Mushe vha ri: “Zwino ndi hone ro fa, ndi hone ro fhela, roṱhe ri ḓo fa!
13 Ane a sendela tsini na dennde ḽikhethwa* ḽa Yehova, u ḓo fa!+ Naa ri ḓo fa nga yeneyo nḓila?”+
