Numeri 13:1-33
13 Yehova a amba na Mushe a ri:
2 “Ruma vhanna vha ye u ṱola* shango ḽa Kanana, ḽine nda ḓo ḽi ṋea Vhaisiraele. U rume munna muthihi uri a imele lushaka lwa khotsi awe, muṅwe na muṅwe a vhe e murangaphanḓa.”+
3 Mushe a ita zwe Yehova a amba, a vha ruma vha bva sogani ḽa Pharani.+ Vhenevha vhanna vhoṱhe vho vha vhe vharangaphanḓa vha Vhaisiraele.
4 Madzina avho ndi haya: Kha lushaka lwa Rubeni, o vha e Shamua murwa wa Sakure;
5 kha lushaka lwa Simioni o vha e Shafati murwa wa Hori;
6 kha lushaka lwa Yuda, o vha e Kalebe+ murwa wa Yefune;
7 kha lushaka lwa Isashari, o vha e Igala murwa wa Yosefa;
8 kha lushaka lwa Efuraimi, o vha e Hoshea+ murwa wa Nunu;
9 kha lushaka lwa Benyamini, o vha e Palati murwa wa Rafu;
10 kha lushaka lwa Sebuloni, o vha e Gadiele murwa wa Sodi;
11 kha lushaka lwa Yosefa,+ lushaka lwa Manase,+ o vha e Gedai murwa wa Susi;
12 kha lushaka lwa Dani, o vha e Amiele murwa wa Gemali;
13 kha lushaka lwa Ashere, o vha e Sithuri murwa wa Mikaele;
14 kha lushaka lwa Nafutali, o vha e Nahabi murwa wa Vapisi;
15 kha lushaka lwa Gada, o vha e Guele murwa wa Maxi.
16 Haya ndi one madzina a vhanna vhe Mushe a vha ruma uri vha ye u ṱola shango. Mushe a ira Hoshea murwa wa Nunu a ri u pfi Yoshua.*+
17 Musi Mushe a tshi vha ruma uri vha ye u ṱola shango ḽa Kanana, o ri: “Gonyani ni ye Negebe, gonyani dzinguni ḽa dzithavhani.+
18 Ni tea u sedza uri ḽeneḽo shango ḽi hani,+ na uri vhathu vhane vha khou dzula henefho vha na maanḓa kana a vha na maanḓa, a si vhanzhi kana ndi vhanzhi;
19 na uri ḽeneḽo shango ndi ḽavhuḓi kana a si ḽavhuḓi, na uri miḓi ine vha dzula khayo ndi ya madennde kana yo tsireledzwa nga luvhondo.
20 Zwiṅwe hafhu, u itela u vhona arali shango ḽo nona kana ḽi songo nona,+ arali ḽi na miri kana ḽi si na. Ni tea u vha na tshivhindi,+ ni fule na miṅwe mitshelo ya ḽeneḽo shango.” Ho vha hu tshifhinga tsha musi nḓirivhe dzi tshi kha ḓi tou thoma u vhibva.+
21 Vha ya vha ṱola shango u bva sogani ḽa Zini+ u swika Rehobo,+ tsini na Lebo-hamathi.*+
22 Musi vha tshi gonya Negebe, vha swika Heburoni+ he ha vha hu tshi dzula Ahimani, Sheshai na Thalamai,+ vha Vhaenaki.+ Heburoni wo vha wo fhaṱiwa miṅwaha ya sumbe phanḓa ha musi hu tshi fhaṱiwa muḓi wa Tsoani ngei Egipita.
23 Musi vha tshi swika Govhani* ḽa Esikolo,+ vha rema tavhi ḽi re na tshiṱokola tshithihi tsha nḓirivhe, vhanna vhavhili vha hwalisana nga thanda, u katela na mitshelo ya maphomagraneithi na mahuyu.+
24 Vha vhidza henefho fhethu uri ndi Govhani* ḽa Esikolo,*+ nga nṱhani ha tavhi ḽe Vhaisiraele vha ḽi rema henefho.
25 Musi ho no fhela maḓuvha a 40,+ vha vhuya vha tshi bva u ṱola shango.
26 Vha vhuyelela sogani ḽa Pharani vha ḓa vha vhiga kha Mushe na Aroni na tshitshavha tshoṱhe tsha Isiraele, ngei Kadese.+ Vha vhuisa muvhigo kha tshitshavha tshoṱhe, vha tshi sumbedza mitshelo ya ḽeneḽo shango.
27 Vha mu vhudza vha ri: “Ro dzhena shangoni ḽe wa ri ruma khaḽo, nangoho ndi shango ḽi elelaho mafhi na mutoli,+ heyi ndi mitshelo yaḽo.+
28 Naho zwo ralo, vhathu vhane vha dzula kha ḽeneḽo shango vha na maanḓa, miḓi yavho ndi mihulu yo tsireledzwa nga mbondo. Ro vhona na Vhaenaki henefho.+
29 Vhaamaleke+ vha dzula shangoni ḽa Negebe.+ Vhahethe, Vhayebusi+ na Vhaamori+ vha dzula dzinguni ḽa dzithavhani, Vhakanana+ vha tsini na lwanzhe+ vho livhana na Yorodane.”
30 Kalebe a lingedza u fhumudza vhathu musi vho ima phanḓa ha Mushe a ri: “Kha ri gonye nga u ṱavhanya, ri ḓo dzhia ḽeneḽo shango, ngauri ri nga kona u ḽi kunda zwa vhukuma.”+
31 Fhedzi vhanna vhe vha ṱuwa nae vha ri: “Ri nga si kone u lwa na vhenevho vhathu, ngauri vha na maanḓa u ri fhira.”+
32 Vha bvela phanḓa vha tshi vhudza Vhaisiraele zwithu zwi si zwavhuḓi+ nga ha shango ḽe vha ḽi ṱola, vha ri: “Shango ḽe ra tshimbila khaḽo u itela u ḽi ṱola ndi shango ḽine ḽa ḽa vhadzulapo vhaḽo, na vhathu vhoṱhe vhe ra vha vhona ndi vhanna vhalapfu-lapfu.+
33 Henefho ro vhona Vhanefilimu, vharwa vha Enaki,+ vha bvaho* kha Vhanefilimu, musi ri tshi ḓivhambedza navho ro vha ri tshi vhonala ri tshi nga dzinzie na vhone vha tshi ri vhona nga u ralo.”
