Numeri 2:1-34
-
Madennde a khethekanywa nga tshaka tharu (1-34)
-
Vha lushaka lwa Yuda vha ya vhubvaḓuvha (3-9)
-
Vha lushaka lwa Rubeni vha ya tshipembe (10-16)
-
Vha lushaka lwa Levi vha atha madennde vhukati ha maṅwe (17)
-
Vha lushaka lwa Efuraimi vha ya vhukovhela (18-24)
-
Vha lushaka lwa Dani vha ya devhula (25-31)
-
Tshivhalo tsha vhanna vhoṱhe vho ṅwaliswaho (32-34)
-
2 Yehova a amba na Mushe na Aroni a ri:
2 “Vhaisiraele vha athe madennde, muṅwe na muṅwe he tshaka dzawe tharu+ dza vhetshelwa hone, tsini na tshiga* tshine tsha ṱalula vha nnḓu ya vhokhotsi awe. Vha fanela u dzula vho livhana na dennde ḽa muṱangano u mona naḽo.
3 “Vhane vha ḓo atha madennde thungo ya vhubvaḓuvha hu ḓo vha tshaka tharu dza Yuda u ya nga zwigwada* zwavho; murangaphanḓa wa vharwa vha Yuda ndi Nahashoni+ murwa wa Aminadaba.
4 Vho ṅwaliswaho kha mmbi yawe ndi 74 600.+
5 Lushaka lune lwa ḓo dzula tsini nae lu ḓo vha lwa Isashari; murangaphanḓa wa vharwa vha Isashari ndi Nethaniele+ murwa wa Tsuwari.
6 Vho ṅwaliswaho kha mmbi yawe ndi 54 400.+
7 Lushaka lu tevhelaho ndi lwa Sebuloni; murangaphanḓa wa vharwa vha Sebuloni ndi Eliaba+ murwa wa Heloni.
8 Vho ṅwaliswaho kha mmbi yawe ndi 57 400.+
9 “Vhoṱhe vho ṅwaliswaho kha mmbi dza madennde a Yuda ndi 186 400. Vha takuwe u thoma.+
10 “Zwigwada* zwa Rubeni+ zwi re na tshaka tharu zwi ḓo dzula thungo ya tshipembe; murangaphanḓa wa vharwa vha Rubeni ndi Elitsuru+ murwa wa Shideuru.
11 Vho ṅwaliswaho kha mmbi yawe ndi 46 500.+
12 Lushaka lwa Simioni ndi lwone lune lwa ḓo dzula tsini nae; murangaphanḓa wa vharwa vha Simioni ndi Shelumi+ murwa wa Tsurisadai.
13 Vho ṅwaliswaho kha mmbi yawe ndi 59 300.+
14 Lushaka lu tevhelaho ndi lwa Gada; murangaphanḓa wa vharwa vha Gada ndi Eliasafu+ murwa wa Ruwele.
15 Vho ṅwaliswaho kha mmbi yawe ndi 45 650.+
16 “Vhoṱhe vho ṅwaliswaho kha mmbi dza madennde a Rubeni ndi 151 450, vha vhe lushaka lwa vhuvhili lune lwa takuwa.+
17 “Musi dennde ḽa muṱangano ḽi tshi pfuluswa,+ madennde a Vhalevi a fanela u vha vhukati ha maṅwe madennde.
“Vha tshimbile nga nḓila i fanaho na musi vha tshi atha madennde,+ lushaka luṅwe na luṅwe lu fhethu halwo, u ya nga madennde a tshaka tharu.
18 “Zwigwada* zwa Efuraimi zwi re na tshaka tharu zwi ḓo dzula thungo ya vhukovhela; murangaphanḓa wa vharwa vha Efuraimi ndi Elishama+ murwa wa Amihudu.
19 Vho ṅwaliswaho kha mmbi yawe ndi 40 500.+
20 Lushaka lu tevhelaho ndi lwa Manase;+ murangaphanḓa wa vharwa vha Manase ndi Gamaliele+ murwa wa Padatsuri.
21 Vho ṅwaliswaho kha mmbi yawe ndi 32 200.+
22 Lushaka lu tevhelaho ndi lwa Benyamini; murangaphanḓa wa vharwa vha Benyamini ndi Abidani+ murwa wa Gideoni.
23 Vho ṅwaliswaho kha mmbi yawe ndi 35 400.+
24 “Vhoṱhe vho ṅwaliswaho kha mmbi dza madennde a Efuraimi ndi 108 100, vha vhe lushaka lwa vhuraru lune lwa takuwa.+
25 “Zwigwada* zwa Dani zwi re na tshaka tharu zwi ḓo dzula thungo ya devhula; murangaphanḓa wa vharwa vha Dani ndi Ahiesere+ murwa wa Amisadai.
26 Vho ṅwaliswaho kha mmbi yawe ndi 62 700.+
27 Lushaka lwa Ashere ndi lwone lune lwa ḓo dzula tsini nae; murangaphanḓa wa vharwa vha Ashere ndi Phagiele+ murwa wa Ohorani.
28 Vho ṅwaliswaho kha mmbi ndi 41 500.+
29 Lushaka lu tevhelaho ndi lwa Nafutali; murangaphanḓa wa vharwa vha Nafutali ndi Ahira+ murwa wa Enani.
30 Vho ṅwaliswaho kha mmbi yawe ndi 53 400.+
31 “Vhoṱhe vho ṅwaliswaho kha madennde a Dani ndi 157 600. Vha vhe lushaka lwa u fhedzisela u takuwa,+ u ya nga madennde avho a tshaka tharu.”
32 Vhenevho vho vha vhe Vhaisiraele vhe vha ṅwaliswa u ya nga miṱa ya vhokhotsi avho; vhoṱhe vho ṅwaliswaho vha re madenndeni u itela uri vha ye u lwa vho vha vhe 603 550.+
33 Fhedzi Vhalevi a vho ngo ṅwaliswa+ khathihi na vhaṅwe Vhaisiraele,+ sa zwe Yehova a laedza Mushe.
34 Vhaisiraele vho ita zwoṱhe zwe Yehova a laedza Mushe. Ndi yone nḓila ye vha dzula ngayo nga tshaka dzavho tharu+ na nḓila ye vha takuwa ngayo,+ muṅwe na muṅwe u ya nga muṱa wa hawe na u ya nga miṱa ya vhokhotsi avho.
