Numeri 27:1-23
27 Ha ḓa vhananyana vha Tselopahada,+ murwa wa Hefere, murwa wa Giḽiada, murwa wa Maxiri, murwa wa Manase wa miṱa ya Manase murwa wa Yosefa. Vhenevho vhananyana vho vha vhe Mahala, Noaxe, Hogola, Milika na Thiritsa.
2 Vha ima muṋangoni wa dennde ḽa muṱangano phanḓa ha Mushe, tshifhe Eliasara, vharangaphanḓa+ na tshitshavha tshoṱhe vha ri:
3 “Khotsi ashu o fela sogani, fhedzi o vha e si muṅwe wa tshigwada tshe tsha shandukela Yehova tsha vhatikedzi vha Kora,+ fhedzi o fa nga nṱhani ha vhutshinyi hawe, o vha a si na ṅwana wa mutukana.
4 Ndi ngani dzina ḽa khotsi ashu ḽi tshi fanela u fa muṱani wawe ngauri ho ngo beba vhana vha vhatukana? Ri kovhele ifa khathihi na vharathu na vhakomana vha khotsi ashu.”
5 Mushe a swikisa mafhungo avho kha Yehova.+
6 Yehova a amba na Mushe a ri:
7 “Vhananyana vha Tselopahada vha khou amba zwone. U vha ṋee ifa khathihi na vharathu na vhakomana vha khotsi avho, u vha ṋee ifa ḽa khotsi avho.+
8 U vhudze Vhaisiraele u ri: ‘Arali munna a fa a si na murwa, ifa ḽawe ḽi ṋewe ṅwananyana wawe.
9 Arali a si na ṅwananyana, ifa ḽawe ḽi ṋewe vharathu kana vhakomana vhawe.
10 Arali a si na vharathu na vhakomana, ifa ḽawe ḽi ṋewe khotsimunene kana khotsimuhulu wawe.
11 Arali khotsi awe a si na vharathu kana vhakomana, ifa ḽawe ḽi ṋewe shaka ḽawe ḽa tsini-tsini ḽa malofhani, ḽi ḓo dzhia ḽeneḽo ifa. Hezwi zwi ḓo shuma sa maitele a khaṱhulo kha Vhaisiraele, sa zwe Yehova a laya Mushe.’”
12 Yehova a amba na Mushe a ri: “Gonya thavhani ya Abarimi+ u vhone shango ḽine nda ḓo ḽi ṋea Vhaisiraele.+
13 Musi wo no ḽi vhona, ndi hone u tshi ḓo vhulungwa na vhathu vha hau,+ u fana na zwe zwa itwa Aroni mukomana wau,+
14 ngauri ngei sogani ḽa Zini, musi tshitshavha tshi tshi khou lwa na nṋe a no ngo thetshelesa ndaela yanga ya uri ni nnyite mukhethwa musi ni tshi bveledza maḓi,+ vha tshi zwi vhona. Eneo ndi maḓi a Meriba+ ngei Kadese+ sogani ḽa Zini.”+
15 Mushe a amba na Yehova a ri:
16 “Yehova Mudzimu wa vhutshilo ha vhathu vhoṱhe, nga a nange muthu tshitshavhani
17 ane a ḓo vha ranga phanḓa musi vha tshi dzhena na musi vha tshi bva, uri tshitshavha tsha Yehova tshi si nge nngu dzi si na mulisa.”
18 Ngauralo, Yehova a amba na Mushe a ri: “Dzhia Yoshua murwa wa Nunu, munna a re na muya wo raloho, u vhee tshanḓa tshau khae.+
19 U mu imise phanḓa ha tshifhe Eliasara na phanḓa ha tshitshavha tshoṱhe, u mu vhee vha tshi zwi vhona.+
20 U mu ṋee maṅwe a maanḓa* au+ uri tshitshavha tshoṱhe tsha Vhaisiraele tshi mu thetshelese.+
21 A ime phanḓa ha tshifhe Eliasara, ane a ḓo mu vhudzisela ha Yehova a tshi shumisa Urimi,+ u itela u ḓivha phetho yawe. Vha ḓo pfa ene musi vha tshi bva na musi vha tshi dzhena, ene na Vhaisiraele vhoṱhe vhane a vha navho na tshitshavha tshoṱhe.”
22 Mushe a ita zwoṱhe zwe Yehova a mu laya. A dzhia Yoshua a mu imisa phanḓa ha tshifhe Eliasara na phanḓa ha tshitshavha tshoṱhe,
23 a vhea zwanḓa zwawe khae,+ a mu vhea sa zwe Yehova a amba a tshi shumisa Mushe.+
Ṱhaluso dzi re magumoni a siaṱari
^ Kana “tshirunzi.”
