Numeri 11:1-35
-
U gungula zwi ita uri vha fhiswe nga mulilo u bvaho kha Mudzimu (1-3)
-
Vhathu vha lilela ṋama (4-9)
-
Mushe u ḓipfa a sa fanelei (10-15)
-
Yehova u ṋea vhahulwane vha 70 muya mukhethwa (16-25)
-
Eledada na Medada; Yoshua u vhilaelela Mushe (26-30)
-
Hu ḓiswa khwali; vhathu vha pfiswa vhuṱungu nga nṱhani ha tseḓa (31-35)
11 Vhathu vha thoma u gungulela Yehova. Musi Yehova a tshi zwi pfa a sinyuwa, mulilo u bvaho ha Yehova wa thoma u vha fhisa na u fhisa vhaṅwe vha re magumoni a madennde.
2 Musi vhathu vha tshi thoma u lilela Mushe, a vha humbelela ha Yehova,+ mulilo wa dzima.
3 Ngauralo, henefho fhethu ha vhidzwa Thabera,* ngauri mulilo wa Yehova wo vha fhisa.+
4 Vhatsinda+ vha re vhukati havho vha thoma u sa fushea nga zwiḽiwa+ na Vhaisiraele vha dovha vha lila vha ri: “Ndi nnyi ane a ḓo ri ṋea ṋama ya u ḽa?+
5 Ro ṱuvha hani khovhe dze ra vha ri tshi dzi ḽa ngei Egipita ri sa rengi, na khukhamba, mahabu, nyala na galiki!+
6 Fhedzi zwino ro no kulea miraḓo. A hu na zwine ra zwi vhona nga nnḓa ha yeneyi mana.”+
7 Mana+ yo vha i tshi nga mbeu ṱhukhu tshena,+ i tshi nga ṋonzhe ya bedeliamu.
8 Vhathu vho vha vha tshi bva vha i dobela, vha i sinḓa nga mituli kana vha i kuya. Vho vha vha tshi i vholomisa bodoni kana vha baka ḽofo,+ yo vha i tshi ḓifha sa khekhe i re na swigiri yo bakwaho nga mapfura.
9 Musi ṅwando u tshi wa madenndeni vhusiku, na mana yo vha i tshi wa henefho madenndeni.+
10 Mushe a pfa vhathu vha tshi khou lila miṱani yavho, muṅwe na muṅwe a tshi khou lila e muṋangoni wa dennde ḽawe. Yehova a sinyuwa vhukuma,+ zwenezwo zwi si takadze Mushe na luthihi.
11 Mushe a amba na Yehova a ri: “Ndi ngani u tshi tambudza mushumeli wau? Ndi ngani u sa ntakaleli lune wa vhuya wa nkhwesa muhwalo wa vhenevha vhathu vhoṱhe?+
12 Naa avha vhathu ndi vhananga? Naa avha vhathu ndo tou vha beba, lune wa mmbudza uri, ‘Ndi vha takule sa muḓinḓa* a tshi ṱhogomela ṅwana ane a kha ḓi mama,’ u swika shangoni ḽe wa ana uri u ḓo ḽi ṋea vhomakhulukuku wavho?+
13 Ṋama ya avha vhathu vhoṱhe ndi ḓo i wana ngafhi? Ngauri vha dzulela u nndilela vha tshi ri: ‘Ri ṋee ṋama ri ḽe!’
14 Ndi nga si kone u hwala vhenevha vhathu vhoṱhe ndi ndoṱhe; vha a nndemela vhukuma.+
15 Arali u tshi ḓo mpfara nga yeneyi nḓila, ndi humbela uri u mmbulaye.+ Arali u tshi ntakalela, u songo tenda ndi tshi tambudzwa.”
16 Yehova a amba na Mushe a ri: “Nkuvhanganyele vhanna vha 70 kha vhanna vhahulwane vha Isiraele vhane wa vha dzhia vhe* vhahulwane na vhaḓinḓa vha vhathu,+ u vha ise denndeni ḽa muṱangano, u ime navho henefho.
17 Ndi ḓo ḓa+ nda amba na iwe henefho,+ ndi ḓo dzhia muṅwe wa muya+ u re kha iwe nda vha ṋea wone, vha ḓo u hwalisa muhwalo wa havha vhathu uri u si u hwale u woṱhe.+
18 U vhudze vhathu u ri: ‘Matshelo ni ḓikunakise+ ngauri ni ḓo ḽa ṋama, ngauri tshililo tshaṋu tsho pfiwa nga Yehova+ musi ni tshi ri: “Ndi nnyi ane a ḓo ri ṋea ṋama ra ḽa, ngauri ngei Egipita ro vha ri tshi ḓiphiṋa?”+ Yehova u ḓo ni ṋea ṋama na ḽa.+
19 A ni nga i ḽi ḓuvha ḽithihi kana mavhili kana maṱanu kana a fumi kana a 20,
20 fhedzi ni ḓo i ḽa ṅwedzi woṱhe u swika i tshi bva nga mabuli a dziningo, u swika i tshi ni nengisa,+ ngauri no nyadza Yehova ane a vha vhukati haṋu, no vha ni tshi khou mu lilela musi ni tshi ri: “Ndi ngani ro pfuluwa Egipita?”’”+
21 Mushe a ri: “Kha tshitshavha tshine nda vha natsho hu na vhanna vha linganaho 600 000,+ ngeno iwe u tshi ri: ‘Ndi ḓo vha ṋea ṋama, vha ḓo i ḽa ṅwedzi woṱhe’!
22 Arali nngu dzoṱhe na kholomo dzoṱhe zwa ṱhavhiwa, naa zwi ḓo vha lingana? Kana arali khovhe dzoṱhe dza lwanzheni dza fashwa, naa dzi ḓo vha lingana?”
23 Yehova a amba na Mushe a ri: “Naa tshanḓa tsha Yehova ndi tshipfufhi?+ Zwino ndi hone u tshi ḓo vhona arali zwe nda amba zwi tshi ḓo itea kana zwi sa ḓo itea.”
24 Nga murahu ha zwenezwo, Mushe a bvela nnḓa, a vhudza vhathu zwe Yehova a zwi amba. A kuvhanganya vhanna vha 70 vha bvaho kha vhahulwane vha vhathu, a ita uri vha ime u mona na dennde.+
25 Yehova a tsa e kha gole+ a amba nae,+ a dzhia muṅwe wa muya+ u re khae a u ṋea muṅwe na muṅwe wa vhahulwane vha 70. Musi vha tshi tou wana wonoyo muya, vha thoma u porofita,+ fhedzi a vho ngo tsha dovha vha zwi ita.
26 Ho vha hu na vhaṅwe vhanna vhavhili vho salaho madenndeni. Madzina avho ho vha hu Eledada na Medada. Muya wa thoma u ḓa khavho, vho vha vhe vhaṅwe vha vhe madzina avho a vha o ṅwaliwa fhasi, fhedzi vho vha vha songo ya denndeni. Ngauralo, vha thoma u porofita henefho madenndeni.
27 Muṅwe muṱhannga a gidima a ya a vhudza Mushe a ri: “Eledada na Medada vha khou porofita madenndeni!”
28 Ngauralo, Yoshua+ murwa wa Nunu, we a vha e muḓinḓa wa Mushe u bva a kha ḓi vha muswa a ri: “Muṋe wanga Mushe, vha kaidze!”+
29 Fhedzi Mushe a ri: “Kani u khou vhilaela nga ha uri zwenezwi zwi ḓo nkwama hani? Ndi tama arali vhathu vhoṱhe vha Yehova vho vha vhe vhaporofita, ngauri Yehova o vha a tshi ḓo vha ṋea muya wawe!”
30 Nga murahu Mushe a vhuyelela madenndeni khathihi na vhahulwane vha Isiraele.
31 Muya u bvaho kha Yehova wa vhudzula khwali dzi tshi bva lwanzheni dza kavha madenndeni,+ dza ḓala hu ṱoḓaho u vha tshikhala tsha lwendo lwa ḓuvha ḽoṱhe thungo dzoṱhe, u mona na madennde, dzo ṱhophana khubithi* dzi ṱoḓaho u vha mbili.
32 Vhathu vho fhedza ḽeneḽo ḓuvha na vhusiku haḽo na ḓuvha ḽoṱhe ḽi tevhelaho vha tshi khou dobela khwali. A hu na muthu we a doba a si ḓadze homere* dza fumi, vha dzi anea u mona na madennde.
33 Musi ṋama i tshi kha ḓi vha milomoni yavho i sa athu u shengiwa, Yehova a vha sinyutshela, Yehova a vhulaya vhathu vhanzhi.+
34 Vha ri henefho fhethu hu pfi Kibirotho-hatava,*+ ngauri henefho ndi he vha vhulunga vhathu vha sa fushei nga zwiḽiwa.+
35 Vhathu vha ṱuwa Kibirotho-hatava vha ya Hazerote, vha dzula henefho Hazerote.+
Ṱhaluso dzi re magumoni a siaṱari
^ Zwine zwa amba uri “U Fhisa,” ndi mulilo une wa fhisa hoṱhe.
^ Kana “muongi wa munna.”
^ Kana “vhane wa ḓivha uri ndi; vhane wa vha ḓivha sa.”
^ Khubithi nthihi i lingana na senthimithara dza 44,5. Sedzani Ṱhume. B14.
^ Homere i lingana na ḽithara dza 220. Sedzani Ṱhume. B14.
^ Zwine zwa amba uri “Mavhiḓa A Vha Sa Fushei.”
