Kʼalal oy buchʼu tsaʼ smul ti mu x˗akʼe ta perton yuʼun Diose, jaʼ skʼan xal ti yolbaj tspas smul xchiʼuk ti muʼyuk chopol chaʼi sbae. ¿Kʼuxi xuʼ xkʼot ta pasel taje?

 Li Diose chchʼaybe smul li jun jpasmulil mi la sutes yoʼontone, ti tspas li kʼusitik tskʼan Diose xchiʼuk mi chakʼ xchʼunel yoʼonton ta stojolal Jesuse (Echos 3:19, 20). Akʼo mi jech, li jun jpasmulile xuʼ me stsatsub li yoʼontone xchiʼuk ti muʼyuk xa oy ta yoʼonton ta sjel li stalelale xchiʼuk li kʼusi tspase. Li Vivliae chal ti chopol kʼusi oy ta yoʼonton li krixchano taje xchiʼuk ti «stsatsub [yoʼonton] yuʼun li sjuʼel mulil ti chloʼlavane» (Ebreos 3:12, 13). Li yoʼontone xkoʼolaj xa kʼuchaʼal ta sjepelul lumal pʼin ti mu xa stakʼ patel yan veltae, kontra xa chil li Diose (Isaias 45:9). Muʼyuk xa me srasonal sventa xichʼ akʼel ta perton li krixchano taje, yuʼun laj xa spas li mulil ti muʼyuk chichʼ akʼel ta pertone (Ebreos 10:26, 27).

 Junantik jnitvanejetik ta relijion yuʼun judaetik li ta skʼakʼalil Jesuse la saʼ smulik ti muʼyuk tstaik pertone. Yuʼun snaʼojik lek ti skʼelobil juʼelal la spas Jesuse jaʼ koliyal li xchʼul espiritu Diose. Pe ta skoj ti chopol kʼusi oy ta yoʼontonike, laj yalik ti jaʼ pukuj li buchʼu ch-akʼbat sjuʼel li Jesuse (Markos 3:22, 28-30).

Junantik muliletik ti xuʼ xichʼ akʼel ta pertone

•  Li chopol kʼoptavanej ta skoj ti mu xijtojob snopele. Li jtakbol Pablo eke jaʼ to toʼox jchopolkʼoptavanej, pe xi laj yal ta tsʼakale: «Laj kichʼ kʼuxubinel, yuʼun mu toʼox jnaʼ li kʼusi la jpase xchiʼuk chʼabal toʼox xchʼunel koʼonton» (1 Timoteo 1:13).

•  Li sloʼlael jnup jchiʼiltike. Li Vivliae chalbe skʼoplal krixchanoetik ti la sloʼla snup xchiʼilike, pe la sjel li stalelalike, vaʼun akʼatik ta perton yuʼun li Diose (1 Korintios 6:9-11).

«¿Mi jaʼ jpasoj van li mulil ti muʼyuk chichʼ akʼel ta pertone?»

 Mi ta melel chopol chavaʼi aba ta skoj li amul apasoje xchiʼuk ti oy ta avoʼonton chakʼan chajel akuxlejale, maʼuk me apasoj li mulil ti muʼyuk chichʼ akʼel ta pertone. Xuʼ me xata perton akʼo mi latsʼuj yan velta li ta mulile. Li Diose jaʼ tstsak ta venta mi yuʼun ta melel chopol chavaʼi abae (Isaias 1:18).

 Junantik krixchanoetike tsnopik ti jaʼ la spasik li mulil ti muʼyuk chichʼ akʼel ta pertone, yuʼun te xvulvun˗o sjol yoʼontonik ta skoj li kʼusi chopol la spasike. Li Vivliae xi chchanubtasvane: «Li koʼontontike jaʼ noʼox stuk ti toj echʼ xa noʼox xloʼlavane». Jaʼ yuʼun, mu skotoluk velta lek ti jech chkaʼi jbatike (Jeremias 17:9). Li Diose muʼyuk yakʼoj ta jbatik ta xchapanel li yantike mi jaʼuk ta xchapanel li jmultik eke (Romanos 14:4, 12). Li Diose xuʼ me xakʼutik ta perton akʼo mi oy˗o jmul chkaʼi jbatik (1 Juan 3:19, 20).

¿Mi jaʼ jun mulil ti mu stakʼ akʼel ta perton li kʼusi la spas li Judase Iskariotee?

 Jaʼ, yuʼun jaʼ jun vinik ti jaʼ no‘ox batem ta yoʼonton saʼel li kʼusi tskʼan stuke, ta xelkʼan li matanal takʼin chichʼ akʼele xchiʼuk oy xa tajek ta yoʼonton yilel li buchʼutik abolik sbae. Pe li kʼusi oy ta yoʼonton ta melele ja‘ ti xelkʼan mas takʼine (Juan 12:4-8). Kʼalal ep xa ox ta velta la saʼ smule, ta slajebe laj yakʼ ta kʼabal Jesus ta 30 ta sep plata. Snaʼoj lek Jesus ti muʼyuk tsutes yoʼonton li Judase, jaʼ yuʼun laj yal ti jaʼ ‹xnichʼon lajelale› (Juan 17:12). Kʼalal jech laj yal li Jesuse, laj yakʼ ta aʼiel ti kʼalal mi cham li Judase te xa laj˗o skʼoplal, muʼyuk xa spatobil yoʼonton ta sventa li chaʼkuxesele (Markos 14:21).

 Li Judase muʼyuk la sutes yoʼonton ta melel. Yuʼun muʼyuk laj yalbe smul li Diose, jaʼ laj yalbe li jnitvanejetik ta relijion ti koʼol la xchap skʼopike (Mateo 27:3-5; 2 Korintios 7:10).