Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TIURAI 2014

“Ei ite hoi outou no ’u”

“Ei ite hoi outou no ’u”

“Ua parau atura [Iesu] ia ratou, . . . Ei ite hoi outou no ’u . . . e tae noa ’tu i te hopea o te fenua.”—OHI. 1:7, 8.

1, 2. (a) O vai te ite rahi roa ’‘e o Iehova? (b) Eaha te auraa o te i‘oa Iesu? E eaha ta ’na i rave no te tauturu i te mau ati Iuda ia fana‘o faahou i ta Iehova farii maitai?

A HAAVAHIA ’I Iesu, ua parau o ’na ma te itoito i te tavana Roma o Ponotio Pilato: “I fanau mai ai au, e i haere mai ai hoi au i te ao nei, e faaite i te parau mau.” (A taio i te Ioane 18:33-37.) E rave rahi matahiti i muri a‘e, ua parau te aposetolo Paulo no Iesu e o ’na te ite o tei faaite i te “fa‘iraa parau maitai i te aro o Ponotio Pilato.” (Tim. 1, 6:13) Na Satani e faatere ra i teie nei ao tei î i te riri. No te tamau noa i te horoa i te faaiteraa, e mea tia ia itoito tatou mai ia Iesu, “te ite mau e te parau mau.”—Apo. 3:14.

2 I na mua ’‘e, e ite no Iehova te mau ati Iuda atoa. O Iesu râ te riro mai ei ite rahi roa ’‘e. (Isa. 43:10) Hou Iesu a fanauhia ’i, ua parau te hoê melahi i to ’na metua tane faaamu o Iosepha: “E te tamaiti ta ’na e fanau, o ta oe ïa e topa ’tu ia Iesu; e faaora hoi oia i to ’na taata i ta ratou hara.” (Mat. 1:20, 21) Na roto i te reo Hebera, o “Iehova te faaora” te auraa o te i‘oa Iesu. E faaohipa Iehova ia Iesu no te faaora i te huitaata i te hara e te pohe. Ua parau Iesu i te mau ati Iuda ia tatarahapa i ta ratou mau hara no te fana‘o faahou  i ta Iehova farii maitai. (Mat. 10:6; 15:24; Luka 19:10) Ua poro o ’na i te Basileia o te Atua. Ua papai Mareko: “Haere atura Iesu i Galilea, i te parau haerea i te parau maitai o te basileia o te Atua. Na ô atura, Ua tae i te tau, te fatata mai nei te basileia o te Atua; a tatarahapa, a faaroo mai i te evanelia nei.” (Mar. 1:14, 15) Ma te itoito rahi, ua poro Iesu. E ma te itoito, ua faahapa atoa o ’na i te mau tia haapaoraa ati Iuda puai mau. No reira atoa hoi ratou i haapohe ai ia ’na.—Mar. 11:17, 18; 15:1-15.

“OHIPA MAERE A TE ATUA”

3. Eaha tei tupu e toru mahana i muri a‘e i to Iesu poheraa?

3 E toru mahana i muri a‘e i to Iesu pohe ino mau, ua tupu te tahi mea maere mau. Ua faatia faahou mai Iehova ia Iesu eiaha e te hoê tino taata, e te hoê tino varua râ. (Pet. 1, 3:18) No te haapapu i ta ’na mau pǐpǐ e ua faaho‘ihia mai oia i te ora, ua rave o ’na i te hoê tino taata. I tera iho â mahana a faatia-faahou-hia ’i oia, e pae taime to ’na faaiteraa ia ’na i te mau pǐpǐ taa ê.—Mat. 28:8-10; Luka 24:13-16, 30-36; Ioa. 20:11-18.

4. Eaha tei tupu a faaite ai Iesu ia ’na i ta ’na mau pǐpǐ, e eaha ta ’na i faaue ia ratou ia rave?

4 A faaite ai Iesu ia ’na i te paeraa o te taime, ua putuputu ta ’na mau aposetolo e te tahi atu. I reira, ua tauturu o ’na ia ratou ia taa e ua tohuhia to ’na pohe e tia-faahou-raa i roto i te mau Papai. I te hopea o teie putuputuraa faufaa, ua parau Iesu i ta ’na mau pǐpǐ eaha te titauhia ia rave ratou. Ua faaite o ’na e e “poro-haere-hia te tatarahapa e te faaoreraa i te hara i to ’na ra i‘oa, na Ierusalema ’tu nei â, e ati noa ’‘e te mau fenua atoa e tia ’i.” Faaue a‘era Iesu ia ratou: “Ei ite outou i teie nei mau parau.”Luka 24:44-48.

5, 6. (a) E riro ta Iesu mau pǐpǐ ei ite no vai? (b) E faaite ta Iesu mau pǐpǐ i te aha?

5 Ua taa maitai ïa i te mau aposetolo i ta Iesu i faaue i to ’na faraa ’tu ia ratou no te taime hopea e 40 mahana i muri iho. Ua parau o ’na: “Ei ite hoi outou no ’u i Ierusalema nei e Iudea atoa hoi e ati noa ’‘e, e Samaria, e tae noa ’tu i te hopea o te fenua.” (Ohi. 1:8) E ati Iseraela te mau pǐpǐ e e ite no Iehova a‘ena ratou. I teie nei, e riro ratou ei ite no Iesu atoa. Eaha te auraa?

Mai te mau pǐpǐ matamua a Iesu, te faaite nei tatou ia vetahi ê i ta Iehova opuaraa no a muri a‘e (A hi‘o i na paratarafa 5, 6)

6 E haamata ratou i te faaite e te faaohipa ra Iehova i teie nei ia Iesu no te faaora i te huitaata. E ravea faaoraraa rahi a‘e teie i ta Iehova i rave na no te faaora i te mau Iseraela i tahito ra. Maoti te pohe e te tia-faahou-raa o Iesu Mesia e nehenehe ai te taata e tiamâ mai i te hara e te pohe. A faatavaihia ’i te mau pǐpǐ a Iesu i te varua mo‘a i te Penetekose 33, ua haamata ratou i te faaite haere i te mau “ohipa maere a te Atua,” ia au ïa i te huriraa Bibilia a Te Faufaa Api. Mea rahi te taata o tei faaroo i teie poroi tei tatarahapa, tei faatupu i te faaroo i te tusia o Iesu e tei bapetizohia. I nia i te ra‘i, ua fana‘o Iesu tei faatiahia mai i te hoê tiaraa apî. E te faaohipa ra Iehova ia ’na no te faaora e tausani taata i nia i te fenua.—Ohi. 2:5, 11, 37-41.

TE HOÊ “HOO NO TE TAATA E RAVE RAHI”

7. Eaha ta te mau mea i tupu i te Penetekose 33 i haapapu?

7 Ua haapapu te mau mea i tupu i te Penetekose 33 e ua farii Iehova i te tusia tia roa o Iesu ei hoo no te faatiamâ mai i te taata i te hara. (Heb. 9:11, 12, 24) Ua  faataa Iesu e ua haere mai o ’na no te “horoa i to ’na ora ei hoo no te taata e rave rahi.” (Mat. 20:28) O te mau ati Iuda noa anei te fana‘o i te mau haamaitairaa o teie hoo? E ere, e “hopoi ê atu [te hoo] i te hara o te ao.” O to te Atua hinaaro ‘ia ora te taata atoa.’—Ioa. 1:29; Tim. 1, 2:4-6.

8. Eaha tei tauturu i te mau pǐpǐ matamua a Iesu ia tamau noa i te faaite ia ’na, e eaha ta ratou i rave?

8 Ma te itoito, ua tamau noa te mau pǐpǐ matamua a Iesu i te faaite ia ’na. Eaha tei tauturu ia ratou? Aita ratou i na reira ma to ratou iho puai. Ua ani râ ratou ia Iehova i to ’na varua mo‘a ia itoitohia ratou no te horoa noa i te faaiteraa. (A taio i te Ohipa 5:30-32.) E 27 matahiti i muri a‘e i to te mau pǐpǐ a Iesu haamataraa i te horoa i te faaiteraa, ua poro ratou i “te parau mau i te evanelia” i te mau ati Iuda e te mau taata o te mau nunaa atoa “i raro a‘e i teie nei ra‘i.”—Kol. 1:5, 23.

9. Mai tei tohuhia, eaha tei tupu i te amuiraa Kerisetiano?

9 A nuu noa ’tu ai râ te tau, ua haamata te mau melo o te amuiraa i te haapii i te mea hape i te tahi atu. (Ohi. 20:29, 30; Pet. 2, 2:2, 3; Iuda 3, 4) E i muri a‘e, ua haaviivii teie mau orometua haavare i te amuiraa taatoa. Ua tohu Iesu e e ite-noa-hia teie ohipa apotata e tae roa i te ‘hopea o teie nei ao.’ (Mat. 13:37-43) I Atopa 1914, ua faaarii Iehova ia Iesu i nia i te huitaata. Ua haamata te “anotau hopea” o te ao a Satani i tera taime.—Tim. 2, 3:1.

10. (a) Eaha te taio mahana ta te mau Kerisetiano faatavaihia i poro noa na? (b) Eaha tei tupu i Atopa 1914, e mea nafea tatou i te iteraa?

10 Hau atu e 30 matahiti hou te ava‘e no Atopa 1914, ua haamata te mau Kerisetiano faatavaihia i te poro e e haamata te Basileia o te Atua i te faatere i tera taio mahana faufaa. O ta ratou ïa i maramarama maoti te parau tohu a Daniela no nia i te hoê tumu raau teitei mau o tei tâpûhia e o tei tupu faahou i muri a‘e i te hoê area tau. (Dan. 4:16) Ua faataa Iesu i te hoê tapao o te tauturu i ta ’na mau pǐpǐ ia ite e ua riro mai o ’na ei Arii e ua haamata te anotau hopea. Te haapapu  ra te mau tupuraa mai 1914 mai â e e Arii Iesu. (Mat. 24:3, 7, 14; Luka 21:24) I teie mahana, i roto i te mau “ohipa maere a te Atua” ta tatou e poro nei, te vai atoa ra te parau e ua faariro Iehova ia Iesu ei Arii o te Basileia i 1914.

11, 12. (a) Eaha tei tupu i 1919? (b) Eaha tei ite-maitai-hia i 1935? (A hi‘o i te hoho‘a matamua.)

11 I 1914, a riro mai ai Iesu Mesia ei Arii, ua haamata o ’na i te faatiamâ mai i ta ’na mau pǐpǐ faatavaihia ia “Babulonia rahi,” oia hoi i te haapaoraa hape. (Apo. 18:2, 4) I 1919, i muri iti noa ’‘e i te hopea o te Tama‘i rahi Matamua, e tiamâraa rahi a‘e to te feia faatavaihia no te poro na te ao atoa. Ua faaite haere ratou i te mana faaora o te hoo e i te parau apî oaoa o te Basileia o te Atua. Ei faahopearaa, e tausani atu â taata tei haapii i te parau mau e tei faatavaihia no te riro ei arii apiti a te Mesia i nia i te ra‘i.

12 I 1935, ua ite-maitai-hia e ua haamata a‘ena te Mesia i te haaputu i ta ’na mau “mamoe ê atu.” I teie mahana, e mirioni mamoe ê atu na te ao atoa. Te pee nei ratou e te feia faatavaihia i te hi‘oraa itoito o te Mesia e te horoa nei i te faaiteraa i te tahi atu. Te tiaturi atoa nei te mau mamoe ê atu e o te tusia o Iesu te ravea otahi e ora ’i ratou. Ua ite ratou e ma te tamau noa i te poro e te faaohipa i to ratou ora no te faaoaoa ia Iehova e nehenehe ratou e ora ’tu i “te ati rahi” e e ora i roto i te ao apî a te Atua.—Ioa. 10:16; Apo. 7:9, 10, 14.

E PORO TATOU I TE PARAU APÎ OAOA MA TE ITOITO

13. Ei Ite no Iehova, eaha ta tatou e faaoti papu i te rave? E e nafea e pee ai i te hi‘oraa o te mau Kerisetiano matamua?

13 E fana‘oraa taa ê mau ia faaite ia vetahi ê i te mau “ohipa maere” ta Iehova i rave e i ta ’na i fafau no a muri a‘e. E ere iho â i te mea ohie ia rave noa i teie ohipa. E patoi mai paha te taata i ta tatou poroi aore ra e hamani ino atoa mai. E nehenehe ïa tatou e pee i te hi‘oraa o te aposetolo Paulo e to ’na mau hoa. Ua parau Paulo: “I itoito â matou i to matou Atua, i te parauraa ’tu ia outou i te evanelia a te Atua, i roto â i te mârô rahi.” (Tes. 1, 2:2) E mea tia ia tapea i ta tatou i euhe a pûpû ai ia tatou ia Iehova. E hinaaro tatou e vai taiva ore ia Iehova a ‘pau roa ’i’ te ao a Satani. (Isa. 6:11) Eita e haere ma to tatou iho puai. Mai te mau Kerisetiano matamua, e mea tia ia ani tatou ia Iehova i to ’na varua mo‘a no te fana‘o i te “mana rahi maitai.”—A taio i te Korinetia 2, 4:1, 7; Luka 11:13.

14, 15. (a) Mai te aha te huru o te taata i nia i te mau Kerisetiano matamua? Eaha te faaitoitoraa a Petero? (b) Eaha te haamana‘o a hamani-ino-hia ’i tatou no te mea e Ite no Iehova tatou?

 14 I teie mahana, e mirioni taata te parau nei e e Kerisetiano ratou. Te rave nei râ ratou i ta te Atua e riri ra e aita o ’na e farii ra ia ratou. (Tito 1:16) I te senekele matamua, aita te rahiraa o te taata i haamori i te Atua mai ta ’na i hinaaro. Inaha, i ririhia na te mau Kerisetiano mau i taua tau ra e te taata e rave rahi. No te faaitoito i taua mau Kerisetiano ra, ua parau atu te aposetolo Petero: “E ia faainohia outou i te i‘oa o te Mesia ra, e ao to outou.” No te aha ratou e oaoa ’i? No te mea te fana‘o ra ratou i ta te Atua farii maitai e i to ’na varua mo‘a.—Pet. 1, 4:14.

15 I teie mahana, ‘te faainohia ra anei te mau Ite no Iehova i te i‘oa o te Mesia’? E, eiaha noa no te mea te faaite nei tatou ia Iehova. No te mea atoa râ e te paraparau nei tatou no nia ia Iesu e te poro nei e e Arii o ’na o te Basileia o te Atua. Ua hamani-ino-atoa-hia Iesu no te mea e ite no Iehova o ’na. Ua parau o ’na i te feia i patoi ia ’na: “I haere mai nei au ma te i‘oa o tau Metua, e aore outou i ite mai ia ’u.” (Ioa. 5:43) No reira, a hamani ino ai te taata ia oe no ta oe pororaa, a haamana‘o e te fana‘o nei oe i ta te Atua farii maitai e i to ’na varua mo‘a.

16, 17. (a) Eaha te mana‘o o te nunaa o Iehova na te ao nei i te ohipa pororaa? (b) Eaha ta oe e faaoti papu i te rave?

16 A haamana‘o atoa e na te ao atoa nei, mea rahi te taata te haere maira i roto i te parau mau. Noa ’tu ihea tatou e ora ’i, i te mau tuhaa fenua atoa e poro-pinepine-hia ra, te vai ra te taata o te farii i te horoa i te tari‘a faaroo i ta tatou poroi nehenehe mau. E ho‘i ana‘e ïa e farerei i te feia tei faaite i te anaanatae e e tamata ana‘e i te haapii ia ratou i te Bibilia. I muri iho, e tauturu ana‘e ia ratou ia ite o vai Iehova ia nehenehe ratou e pûpû i to ratou ora i te Atua a bapetizo atu ai. Eaha to oe mana‘o i teie ohipa? A 60 tiahapa matahiti i teie nei to Sarie, i Afirika Apatoa, riroraa ei Ite no Iehova. Te na ô ra o ’na: “Ua mauruuru roa vau i te tusia taraehara o Iesu, ua nehenehe hoi au e fana‘o i te taairaa piri roa e o Iehova, te Arii o te ao taatoa, e e faaite i to ’na i‘oa hanahana.” Ua tauturu raua ta ’na tane ra o Martinus i ta raua na tamarii e toru e i te taata e rave rahi ia riro ei tavini a Iehova. Te na ô nei â o ’na: “Aita ’tu ohipa te horoa mai nei i te oaoa rahi. E maoti to ’na varua mo‘a, te horoa nei Iehova ia tatou paatoa te puai hinaarohia no te tamau â i teie ohipa e ora ’i te taata.”

17 Ua bapetizohia anei tatou aore ra aita, e mea tia ia mauruuru tatou i te fana‘oraa taa ê e putuputu e te mau Ite no Iehova. A tamau ïa i te horoa i te faaiteraa ma te itoito rahi e to Iehova nunaa na te ao nei e i te vai viivii ore noa i te ao a Satani. Ma te na reira, e faahanahana oe i to tatou Metua î i te here i te ra‘i ra o Iehova. E tia hoi tatou no ’na.