Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiurai 2014

 AAMU

Ua ere i te hoê metua e ua fana‘o i te tahi atu

Ua ere i te hoê metua e ua fana‘o i te tahi atu

UA FANAUHIA to ’u papa i Graz, Auteteria, i 1899. Mea apî ïa oia a tupu ai te Tama‘i rahi Matamua. Ua ô o ’na i roto i te nuu Heremani i muri noa ’‘e i te haamataraa te Piti o te Tama‘i rahi i 1939 e ua haapohehia i 1943 i roto i te aroraa i Rusia. E piti noa matahiti to ’u a ere ai au i to ’u papa, aita ïa vau i matau ia ’na. A ite ai e e papa to te rahiraa o te mau tamaroa i te fare haapiiraa, ua mihi au, aita hoi to ’u. I muri a‘e, ei taurearea, ua tamahanahanahia vau a haapii ai no nia i to tatou Metua i te ra‘i, te hoê Metua teitei a‘e o te ore e pohe.

TA ’U I ITE EI BOY SCOUT

Ei tamaroa apî

E hitu matahiti to ’u a apiti ai au i te hoê pǔpǔ u‘i apî parauhia Boy Scout. E faanahonahoraa na te ao nei teie tei haamauhia i 1908 i Beretane na te hoê tenerara o te nuu Beretane, Stephenson Smyth Baden-Powell. Ua haamau o ’na i 1916 i te Wolf Cubs no te mau tamaroa apî a‘e o to ’u faito matahiti.

Mea au na ’u ta matou mau puhapa na te mataeinaa i te hopea hebedoma: e taoto i raro a‘e i te fare ie, e oomo i te ahu a te mau Scout e e taahi ma te pee i ta‘i o te faatete. Mea au roa ’toa na ’u te mau taime e himene ai matou e te tahi atu mau Scout i pihai iho i te auahi i te ahiahi. Oia atoa a hauti ai matou i roto i te uru raau. Mea rahi atoa ta matou i haapii mai no nia i te natura. I reira vau i te haafaufaaraa i te mau mea ta to tatou Atua i poiete.

E faaitoitohia te mau Boy Scout ia rave i te hoê ohipa maitai i te mahana taitahi. Tera ta ratou parau tumu. E aroha matou te tahi i te tahi ma te parau “Ia vai ineine noa.” Mea au roa na ’u te reira. I roto i ta matou pǔpǔ, ua hau atu matou i te hoê hanere tamaroa. E Katolika te afaraa, e Porotetani te tahi atu afaraa e i pee na hoê tamaroa ia Bouddha.

Mai 1920, ua faanaho-tamau-hia te mau haaputuputuraa nunaa rau a te mau Boy Scout. Ua apiti au i te hituraa o tera tairururaa i Bad Ischl, i Auteteria, i Atete 1951. Oia atoa i te ivaraa i Atete 1957 i pihai iho ia Birmingham, i Beretane. I tera taime, fatata e 33 000 Scout matou no e 85 fenua. Fatata e 750 000 taata tei haere mai e hi‘o ia matou, oia atoa te arii vahine Elizabeth no Beretane. No ’u, e au te riroraa ei Boy Scout i te riroraa ei melo o te hoê fetii taeae na te ao. Aita vau i ite atura e eita e maoro, e fana‘o vau i te hoê fetii taeae maitai a‘e o te here i te Atua.

TE FAREREIRAA I TE HOÊ ITE NO IEHOVA NO TE TAIME MATAMUA

O Rudi Tschiggerl, te hoê raatira tutu faraoa monamona, te taata matamua tei poro ia ’u

I te tau uaaraa tiare i 1958, fatata vau i te faaoti i ta ’u tau haapiiraa toroa ei tuati i te Grand  Hotel Wiesler i Graz (Auteteria). I ohipa na vau e o Rudolf Tschiggerl, e raatira tutu faraoa monamona. Ua poro mai o ’na ia ’u ma te faanaho-ore-hia. Aita vau i faaroo a‘enei i te tahi mea no nia i te parau mau. Ua faahiti na mua o ’na i te Toru tahi e ua parau mai e e ere te reira i te hoê haapiiraa Bibilia. Ua turu vau i te Toru tahi e ua hinaaro vau e faaite ia ’na e ua hape o ’na. Mea au na ’u i to ’u hoa ohipa e ua hinaaro vau e turai ia ’na ia ho‘i i roto i te Ekalesia Katolika.

Ua noaa ia Rudolf, ta tatou e pii Rudi, te hoê Bibilia na ’u. Ua onoono vau e e Bibilia Katolika noa ta ’u e hinaaro. Ua haamata vau i te taio i te reira e ua itea ia ’u e ua tuu Rudi i te hoê api parau neneihia e te taiete Watchtower i roto i te Bibilia. Ua patoi râ vau no te mea no ’u, ua papaihia te reira ia mana‘o te taata e ua tano iho â te mea ta ratou e taio ra, e ere hoi. Ua farii râ vau i te tauaparau e o Rudi no nia i te Bibilia. Ua faaite Rudi i te haroaroaraa ma te ore e pûpû faahou mai i te tahi atu papai. E toru ava‘e i te maoro, ua aparau mâua no nia i te Bibilia i te tahi taime e e pinepine te reira i te oti i te maororaa po.

I te otiraa ta ’u haapiiraa toroa i te hotera i to ’u oire tumu i Graz, ua aufau to ’u mama i te tahi atu â faaineineraa no ’u i te hoê fare haapiiraa i te pae o te hotera i Bad Hofgastein. Ua haere ïa vau i tera oire i roto i te hoê peho o te mau Alpes. Ua taaihia teie fare haapiiraa i te Grand Hotel i Bad Hofgastein e i te tahi taime i haere na vau i ǒ no te aravihi atu â.

UA HAERE MAI E PITI TUAHINE MITIONARE E HI‘O IA ’U

Ua haamata Ilse Unterdörfer raua Elfriede Löhr i te haapii ia ’u i te Bibilia i 1958

Ua faaite Rudi i to ’u vahi nohoraa apî i te amaa i Vienne e ua tono mai ratou e piti tuahine mitionare, o Ilse Unterdörfer raua Elfriede Löhr. I te hoê mahana, ua pii mai te taata haapao i te piha tomoraa o te hotera ia ’u ma te parau e e piti vahine i roto i te hoê pereoo te hinaaro ra e paraparau ia ’u. Ua maere vau no te mea aita vau i matau ia raua. Ua haere râ vau e hi‘o no te ite o vai raua. I muri a‘e, ua haapii mai au e ei Ite i raro a‘e i te faatereraa Nazi i Heremani, i afai na raua i te mau papai a opanihia ’i te ohipa pororaa hou te Piti o te Tama‘i rahi. Ua haru-atoa-hia raua e te mau mutoi huna Heremani (Gestapo) hou a haamata ’i te tama‘i e ua afaihia i te aua haavîraa i Lichtenburg. E a tupu ai te tama‘i, ua afaihia raua i te aua haavîraa i Ravensbrück, i pihai iho ia Berlin.

Ua faatura vau i teie na tuahine, hoê â hoi faito matahiti to raua i to to ’u mama. Aita ïa vau i hinaaro e haamâu‘a i to raua taime no te tauaparau a parau atu ai i muri a‘e tau hebedoma aore ra tau ava‘e e aita vau i anaanatae. Ua ani ïa vau ia raua ia horoa noa mai i te mau irava no nia i te haapiiraa Katolika o te monoraa aposetolo. Ua faaite atoa ’tu vau e e afai vau i te reira i te perepitero a aparau atu ai ia ’na. I to ’u mana‘o, mea na reira vau e ite ai i te parau mau.

TE HAAPIIRAA MAI NO NIA I TE METUA MO‘A MAU I NIA I TE RA‘I

Te tatara ra te Ekalesia Katolika i ta Iesu mau parau i roto i te Mataio 16:18, 19 no te turu i teie  haapiiraa o te monoraa aposetolo. Te parau atoa ra te Ekalesia Katolika e eita roa ’tu te pâpa, matauhia mai te Metua Mo‘a, e hape a faataa ’i i te mau haapiiraa faaroo. Mai ia ’u, mea rahi te Katolika te tiaturi e te niu nei i to ratou faaroo i nia i te reira. Ua mana‘o vau e mai te peu e ua parau te pâpa e mea mau te Toru tahi, tera iho â ïa. Ua mana‘o atoa râ vau e mai te peu e ua hape te pâpa, mea hape ïa te Toru tahi.

I to ’u haereraa e hi‘o i te perepitero, aita o ’na i nehenehe e pahono i ta ’u mau uiraa. Ua rave mai râ o ’na i te hoê buka no nia i te haapiiraa faaroo Katolika o te faataa ra i te monoraa aposetolo. Ua parau mai o ’na ia hopoi i te reira i te fare, o ta ’u iho â i rave. Ua taio vau i tera buka e ua ho‘i atu ia ’na ra e te uiraa e rave rahi. Aita i tia i te perepitero ia pahono i ta ’u mau uiraa. Parau mai nei o ’na: “Aita vau e nehenehe e faataui i to oe mana‘o, aita atoa oe e nehenehe e faataui i to ’u. . . . Ia maitai oe!” Aita o ’na i hinaaro ia tauaparau â mâua.

I tera taime, ua ineine au i te haapii i te Bibilia e o Ilse raua Elfriede. Mea rahi ta ’u i haapii mai no nia i te Metua Mo‘a mau i nia i te ra‘i, te Atua ra o Iehova. (Ioa. 17:11) Aitâ e amuiraa i tera vahi. O na tuahine e piti ïa tei faatere na i te mau putuputuraa i te fare o te hoê utuafare tei faaite i te anaanatae. Mea iti roa ratou. I te mea e aita e taeae bapetizohia no te aratai, e tauaparauraa ïa te putuputuraa i rotopu i na tuahine e piti ma te faaohipa i te mau papai i faanahohia. I te tahi taime, e haere mai te hoê taeae no te tahi atu oire no te horoa i te hoê oreroraa parau no te taatoaraa i te hoê vahi tarahuhia.

TE HAAMATARAA I TE PORO

Ua haamata Ilse raua Elfriede i te haapii ia ’u i te Bibilia i Atopa 1958 e ua bapetizohia vau e toru ava‘e i muri iho i Tenuare 1959. Hou to ’u bapetizoraa, ua ani vau ia raua e e nehenehe anei ta ’u e apee ia raua i tera i tera fare no te hi‘o e nafea ia poro. (Ohi. 20:20) I muri iho i te apeeraa ia raua no te taime matamua, ua ani atu vau i te tahi tuhaa fenua na ’u no te poro. Ua faataa mai raua i te hoê oire iti na ’u no te haere e poro o vau ana‘e i tera i tera fare e no te ho‘i e farerei i te taata te faaite i te anaanatae. Te taeae matamua ta ’u i apee i roto i te pororaa, o te tiaau haaati ïa o tei haere mai e hi‘o ia matou i muri a‘e.

I 1960, i te otiraa ta ’u tau haapiiraa i te pae o te hotera, ua ho‘i au i to ’u oire tumu no te tamata i te haapii i te pue parau mau Bibilia i to ’u fetii. E tae roa mai i teie nei, aita hoê a‘e tei farii i te parau mau. Te faaite nei râ vetahi i te tahi anaanatae.

TE HOÊ ORARAA I ROTO I TE TAVINIRAA TAIME TAATOA

E 20 tiahapa matahiti to ’u

I 1961, ua taiohia i te mau amuiraa te mau rata no ǒ mai i te amaa o te faaitoito ra ia rave i te taviniraa pionie. E taeae taa noa vau e mea maitai to ’u ea. No ’u, aita ïa to ’u e otoheraa no te riro ei pionie. Ua ani vau i te tiaau haaati o Kurt Kuhn i to ’na mana‘o ia ohipa â vau tau ava‘e no te hoo mai i te hoê pereoo, mea faufaa hoi te reira ei pionie. Ta ’na pahonoraa? “E pereoo anei to Iesu e to ta ’na mau aposetolo no te rave i te taviniraa taime taatoa?” Tera iho â hoi! Ua opua ïa vau e rave oioi i te taviniraa pionie. I te mea râ e i ohipa na vau e 72 hora i te hebedoma i te fare tamaaraa o te hoê hotera, e mea tia ia rave na mua vau i te tahi mau tauiraa.

 Ua ani au i ta ’u paoti e e nehenehe anei ta ’u e ohipa e 60 hora. Ua farii o ’na e ua aufau mai i te hoê â tino moni. Aita i maoro i muri a‘e, ua ani au ia ’na ia ohipa e 48 noa hora i te hebedoma. Ua farii atoa o ’na e ua aufau mai i te hoê â tino moni. Ua ani au i muri iho ia ohipa e 36 noa hora i te hebedoma, aore ra e 6 hora i te mahana i nia e 6 mahana. Ua farii-faahou-hia ta ’u aniraa. E te mea maere, ua aufau noa mai â o ’na i te hoê â tino moni! E au ra e aita ta ’u paoti i hinaaro e vaiiho ia ’u. Maoti teie porotarama, ua tia ia ’u ia haamata i te taviniraa pionie tamau. I tera tau, e titauhia ia naea i te pionie 100 hora i te ava‘e.

E maha ava‘e i muri a‘e, ua faatoroahia vau ei pionie taa ê. Oia atoa, mai tei parauhia i teie mahana, ei tiaau o te tino matahiapo i roto i te hoê amuiraa nainai i te mataeinaa o Carinthia i te oire o Spittal an der Drau. I tera tau, i titauhia na ia naea i te pionie taa ê 150 hora i te ava‘e. Aita to ’u e hoa pionie. Teie râ, ua oaoa mau vau i te tauturu i roto i te taviniraa a te tuahine Gertrude Lobner, o tei amo i te hopoia ravehia i teie nei e te papai parau o te amuiraa.

UA TAUI OIOI TE HOPOIA

I 1963, ua anihia mai au ia riro ei tiaau haaati. I te tahi taime, e rave au i te pereoo auahi no te haere i tera i tera amuiraa e ta ’u mau afata vairaa ahu e vairaa papai teiaha mau. Aita e pereoo to te rahiraa o te mau taeae, aita ïa ratou e nehenehe e tii mai ia ’u i te pereoo auahi. I te mea e aita vau i hinaaro ia huru ê te mau taeae ma te aufau i te hoê taata o te faahoro ia ’u i ǒ ratou, e na avae noa ïa vau e tae roa ’tu i to ratou fare.

I 1965, ua titau-manihini-hia vau i te 41raa o te piha o te Haapiiraa no Gileada. Mai ia ’u, e Kerisetiano taa noa atoa e rave rahi. I to ’u maere rahi, ua tonohia vau i to ’u fenua i Auteteria i roto i te tuhaa haaati. Hou râ a faarue ai ia Marite, ua anihia mai au ia haere na muri i te hoê tiaau haaati no e maha hebedoma. Ua au mau vau i te taviniraa e o Anthony Conte, te hoê taeae î i te here. Mea au atoa na ’na te pororaa e mea rahi te faahopearaa maitai mau ta ’na i ite i roto i tera tuhaa. Ua tavini mâua i te pae apatoerau o New York, i Cornwall.

I to mâua faaipoiporaa

I to ’u ho‘iraa i Auteteria, ua tonohia vau i roto i te hoê tuhaa haaati i reira vau i te farereiraa ia Tove Merete, te hoê tuahine haviti mau. Ua paari o ’na i roto i te parau mau mai te paeraa o to ’na matahiti. A ani mai ai te mau taeae mea nafea mâua i te farereiraa, e parau atu mâua ma te hoata, “Na te amaa i faanaho i te reira.” Ua faaipoipo mâua i te matahiti i muri iho, i Eperera 1967, e ua tamau mâua i roto i te taviniraa haaati.

I te matahiti i muri iho, ua taa ia ’u e ma te aroha hamani maitai o Iehova, ua faaamu o ’na ia ’u ei tamaiti pae varua na ’na. I reira te haamataraa te hoê taairaa taa ê e to ’u Metua i te ra‘i e tae noa ’tu e te mau Kerisetiano atoa o te parau ra, mai ta te Roma 8:15 e faahiti ra, “E Aba, e tau Metua.”

Ua tamau mâua Merete i te tavini amui i roto i te tuhaa haaati e tuhaa mataeinaa e tae roa i 1976. I te tahi taime i te tau toetoe, i taoto na mâua i roto i te piha toetoe mau aita e matini haaveavea. I te hoê taime, ua ara mai mâua e ua ite e ua paari  roa te ahu taoto i pihai iho i to mâua ihu! Ua faaoti mâua i muri iho i te rave mai i te hoê matini haaveavea nainai no te ore e toetoe roa i te po. I te tahi mau vahi, no te haere i te haumitiraa i te po, e mea tia ia haere i rapae na roto i te hiona i te hoê fare e ô noa mai ai te mata‘i. Aita atoa to mâua e nohoraa. I te Monire, e pinepine ïa mâua i te faaea i te fare i reira mâua i te taviniraa i te hebedoma na mua ’tu. E i te Mahana piti poipoi, e haere mâua i te tahi atu amuiraa.

Te oaoa nei au i te parau e i te roaraa o te mau matahiti, ua turu rahi noa mai ta ’u vahine here. Mea au na ’na te pororaa e aita roa ’tu vau i faaitoito a‘enei ia ’na ia haere e poro. Te here e te haapao maite atoa nei o ’na i te mau taeae e tuahine o te amuiraa. E tauturu rahi mau te reira.

I 1976, ua anihia mai mâua ia tavini i te amaa no Auteteria e ua faatoroahia vau ei melo o te Tomite amaa. I tera tau, na te amaa no Auteteria i haapao i te ohipa i te fenua e rave rahi i Europa Hitia o te râ. Na te amaa atoa i faanaho ia tapae te mau papai i tera mau fenua ma te huna. Na te taeae Jürgen Rundel i aratai i te reira ma te imi i te ravea. E fana‘oraa taa ê ia ohipa e o ’na. I muri a‘e, ua anihia mai au ia tiaau i te ohipa huriraa na roto ahuru reo no Europa Hitia o te râ. Ua tamau Jürgen raua ta ’na vahine o Gertrude i te tavini ma te taiva ore ei pionie taa ê i Heremani. Mai 1978, ua haamata te amaa no Auteteria i te faaineine i te mau vea i nia i te roro uira e i te nenei i te reira na roto e ono reo i nia i te hoê matini neneiraa nainai. Ua hapono atoa matou i te mau vea pauroa te ava‘e i te mau fenua tei ani mai. Na Otto Kuglitsch, o te tavini ra i teie nei i te amaa i Heremani e ta ’na vahine o Ingrid, i haapao i tera tuhaa.

I Auteteria, ua tia ia ’u ia apiti i te mau ravea pororaa rau, oia atoa te pororaa na te aroâ

I pia atoa na te mau taeae i Europa Hitia o te râ i te papai i to ratou fenua ma te faaohipa i te mau matini nenei-faahou-raa aore ra ma te nenei maoti te mau hoho‘a i patahia. Ua hinaaro râ ratou i te tauturu no rapaeau mai i to ratou fenua. Ua paruru Iehova i teie ohipa. E i te amaa, ua here matou i teie mau taeae tei tavini i roto i te mau tupuraa fifi e i raro a‘e i te opaniraa e rave rahi matahiti i te maoro.

UA HAERE I RUMANIA NO TE HOÊ TUMU TAA Ê

I 1989, ua oaoa vau i te haere i Rumania e te taeae Theodore Jaracz, te hoê melo o te Tino aratai.  Te fa? E tauturu i te hoê pǔpǔ taeae rahi ia amui faahou mai i te faanahonahoraa. Mai 1949, no te tumu rau, ua faataa ê mai ratou i te faanahonahoraa e ua haamau i ta ratou iho mau amuiraa. Teie râ, ua tamau noa ratou i te poro e i te bapetizo. Ua tuu-atoa-hia ratou i te fare auri no to ratou tiaraa amui ore Kerisetiano mai te mau taeae i roto i te faanahonahoraa fariihia e te pu rahi. I te mea e mea opani noâ te ohipa i Rumania, ua haere mâua i te fare o te taeae Pamfil Albu no te farerei huna e maha matahiapo e tuhaa faufaa ta ratou. Oia atoa i te mau tia o te Tomite fenua no Rumania ta te pu rahi e farii ra. Ua rave atoa mâua i te hoê taata huri no Auteteria mai, o Rolf Kellner.

I te pitiraa o te po tauaparauraa, ua turai te taeae Albu i ta ’na na matahiapo e maha ia amui ia matou a parau ai, “Ia ore tatou e na reira i teie nei, aita e ravea faahou ta tatou i muri a‘e.” I muri iho, fatata e 5 000 taeae tei ho‘i mai i roto i te faanahonahoraa. Ua upootia mau o Iehova e ua pau Satani!

I te pae hopea o te matahiti 1989, ma te maere rahi, ua ani mai te Tino aratai ia haere mâua ta ’u vahine e ohipa i te pu rahi i New York. Ua haamata mâua i ta mâua taviniraa i te Betela i Brooklyn i Tiurai 1990. I 1992, ua faatoroahia vau ei tauturu o te Tomite taviniraa o te Tino aratai. E mai Tiurai 1994 atu, ua oaoa vau i te tavini i roto i te Tino aratai.

TE FERURIRAA I NIA I TE TAU TAHITO E TE HI‘ORAA I TE TAU A MURI A‘E

E ta ’u vahine i Brooklyn, New York

Mea maoro i teie nei te tau a ohipa ’i au ei tuati i roto i te hoê hotera. I teie mahana, te oaoa nei au i te apiti i te faaineineraa e te opereraa i te maa pae varua i to tatou fetii taeae na te ao. (Mat. 24:45-47) A hi‘o ai i na 50 tiahapa matahiti i roto i te taviniraa taime taatoa taa ê, hoê noa mea ta ’u e nehenehe e faaite: to ’u mauruuru e oaoa rahi no te haamaitairaa a Iehova i nia i to tatou fetii taeae na te ao. Mea au na ’u e haere i te mau tairururaa mataeinaa nunaa rau i reira tatou e haapii mai ai no nia i to tatou Metua i te ra‘i ra o Iehova e i te parau mau Bibilia.

Te pure nei au ia haapii e mirioni atu â taata i te Bibilia, ia farii i te parau mau e ia tavini ia Iehova ma te auhoê e to tatou fetii taeae Kerisetiano na te ao. (Pet. 1, 2:17) Te tiai ru atoa nei au i te ite, mai te ra‘i mai, i te faatia-faahou-raa i nia i te fenua e i te ite i to ’u papa pae tino. Te hinaaro nei au ia farii o ’na i te haamori ia Iehova i roto i te paradaiso. Hoê â atoa hinaaro to ’u no to ’u mama e te tahi atu fetii here.

Te tiai ru nei au i te ite, mai te ra‘i mai, i te faatia-faahou-raa i nia i te fenua e i te ite i to ’u papa pae tino