Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Tiurai 2014

“O outou to ’u ite”

“O outou to ’u ite”

“Te parau maira Iehova, O outou to ’u ite.”—ISA. 43:10.

1, 2. (a) Eaha te auraa e riro ei ite, e eaha ta te mau vea e ravea haapuroro e ore e parau ra i te taata? (b) No te aha aita ’i Iehova e tiai ra i te tauturu o teie mau ravea haapuroro?

EAHA te auraa e riro ei ite? Ia au i te hoê titionare, te hoê ite, o “te hoê ïa taata o tei ite i te hoê tupuraa e o te haere e faaite i tei tupu.” I Afirika Apatoa, a 160 tiahapa matahiti i teie nei te piaraahia te hoê vea o Te ite te i‘oa na roto i te reo Tahiti (The Witness). Ua tano iho â tera i‘oa no te mea te fa o te hoê vea, o te faaiteraa ïa ma te tia i te mau mea e tupu ra. Ua fafau te taata papai matamua o teie vea e faaite i te parau mau, tera ana‘e e aita ’tu.

2 Te mea peapea, aita te mau vea e ravea haapuroro a te ao i faaite ma te tia i te tupuraa e rave rahi. Aita te reira i faaite i te parau mau no nia i te Atua e i ta ’na i rave. Aita râ Iehova, te Arii mana hope o te ao taatoa, e tiai ra i te tauturu o tera mau ravea haapuroro. Ua parau te Atua na roto i te peropheta Ezekiela: “E ite hoi te mau fenua e, o Iehova vau.” (Ezk. 39:7) Na ta ’na mau Ite, fatata e vau mirioni ratou, e faaite ra o vai o ’na i te taata na te ao. Te parau nei teie nuu Ite i ta te Atua i rave no te taata i na mua ’‘e e i ta ’na e rave ra i teie nei. Oia atoa i te mau mea faahiahia ta ’na i fafau i te rave i muri a‘e. Te na ô ra te Isaia 43:10: “Te parau maira Iehova, O outou to ’u ite; e tau tavini, i maitihia e au ra.” Ma te faariro i te pororaa mai te ohipa faufaa roa ’‘e  o to tatou oraraa, e haapapu tatou e e Ite mau tatou no Iehova.

3, 4. (a) Afea te Feia haapii Bibilia i te amoraa i te i‘oa Ite no Iehova, e eaha to ratou huru? (A hi‘o i te hoho‘a matamua.) (b) Eaha na uiraa ta tatou e hi‘opoa mai?

3 E vai noa to Iehova i‘oa e a muri noa ’tu, e “Arii hau mure ore” hoi o ’na. Ua parau te Atua: “O to ’u ïa i‘oa e a muri noa ’tu, o to ’u ïa faaite e tae noa ’tu i te mau ui atoa.” (Tim. 1, 1:17; Exo. 3:15; a hi‘o i te Koheleta 2:16.) E fana‘oraa taa ê mau no tatou ia amo i to Iehova i‘oa. I 1931, ua oaoa mau te Feia haapii Bibilia a haamata ’i ratou i te faaohipa i te i‘oa Ite no Iehova. Mea rahi o ratou tei papai i te rata no te faaite i to ratou mauruuru no teie tauiraa. Ua papai te hoê amuiraa i Kanada e maoti te i‘oa apî, ua faaoti papu atu â ratou e faahanahana ia Iehova ma to ratou haerea.

4 E nafea oe e faaite ai e te oaoa nei oe i te riro ei Ite no Iehova? E e nehenehe anei ta oe e faataa no te aha Iehova i parau ai e e Ite tatou no ’na, mai ta tatou i taio i roto i te buka a Isaia?

TO TE ATUA MAU ITE I TAHITO RA

5, 6. (a) Mea nafea te mau metua Iseraela i te faaiteraa o vai o Iehova? (b) Eaha ’tu â tei titauhia ia rave te mau metua Iseraela? E no te aha e mea tia ’i ia na reira atoa te mau metua i teie mahana?

5 Ua maiti Iehova i te nunaa Iseraela no te riro ei ite no ’na. Na te ati Iseraela taitahi te hopoia e faaite o vai o ’Na. (Isa. 43:10) Ei hi‘oraa, ua na reira te mau metua ma te haapii i ta ratou tamarii i ta te Atua i rave i na mua ’‘e. Ua parau Iehova i te mau metua ia haapii i ta ratou tamarii no nia i te oroa Pasa. Ua na ô atu oia: “Ia ui mai ta outou mau tamarii ia outou e, Eaha te auraa i teie nei oroa? ei reira outou e parau atu ai e, E tusia pasa teie na Iehova, o tei haere noa na nia iho i te mau fare o te tamarii a Iseraela i Aiphiti ra, a tairi ai oia i to Aiphiti, faaora ihora oia i to tatou mau fare i reira.” (Exo. 12:26, 27) I faataa na te  mau metua e ua patoi Pharao i te tuu i te mau Iseraela ia haamori ratou ia Iehova i roto i te medebara. Ua parau Pharao: “O vai Iehova, a faaroo atu ai au i to ’na reo, a tuu atu ai au ia Iseraela?” (Exo. 5:2) Ua faaite te mau metua i ta ratou tamarii mea nafea Iehova i te pahonoraa i te uiraa a Pharao e i te faaiteraa i te taatoaraa e o ’Na te Atua mana hope. Ua tairi o ’na ia Aiphiti i na ati ahuru e ua faaora i te mau Iseraela i te nuu Aiphiti i te miti Uteute. Ua ite te mau Iseraela e o Iehova te Atua mau e e rave noa o ’na i ta ’na e fafau ra.

6 E fana‘oraa taa ê no te mau Iseraela ia riro ei ite no Iehova. Ua faaite ratou i ta ratou tamarii e i te mau tavini atoa tei ohipa i roto i to ratou fare i te mau mea faahiahia ta Iehova i rave. Ua ite atoa te mau Iseraela e e mea tia ia mo‘a noa to ratou haerea. Ua parau Iehova: “Ia mo‘a outou, no te mea, te mo‘a nei au, o to outou Atua ra o Iehova.” Ua titauhia ia haapii te mau metua Iseraela i ta ratou tamarii ia mo‘a, oia hoi ia ora ia au i te mau ture aveia a Iehova. (Lev. 19:2; Deut. 6:6, 7) Ia na reira atoa te mau metua i teie mahana e tia ’i. E mea tia ia haapii ratou i ta ratou tamarii ia faahanahana i te i‘oa rahi o te Atua ma to ratou haerea.—A taio i te Maseli 1:8; Ephesia 6:4.

Ma te haapii i ta tatou tamarii no nia ia Iehova, te faahanahana nei tatou i to ’na i‘oa (A hi‘o i na paratarafa 5, 6)

7. (a) A faaroo ai te mau Iseraela ia Iehova, eaha ta te mau nunaa tapiri i ite? (b) Eaha te hopoia a te feia atoa e tia ra no Iehova?

7 Ua haamaitai te Atua i te mau Iseraela a faaroo ai ratou ia ’na. Ua tia ïa i te mau nunaa tapiri ia ite e te paruru ra Iehova i to ’na nunaa. (Deut. 28:10) Ma te peapea râ, i te rahiraa o te taime, mea faaroo ore te mau Iseraela ia Iehova. Ua haamori ratou i te idolo, te mau atua a to Kanaana. Ua riro ratou mai teie mau idolo, ei mea aroha ore. Ua pûpû ratou i ta ratou tamarii ei tusia e ua hamani ino i te feia veve. Eaha te haapii mai i to ratou hi‘oraa ino? E mea tia ia pee tatou i te hi‘oraa o Iehova e ia mo‘a no te mea e tia tatou no ’na, te Atua mo‘a roa.

“INAHA, TE RAVE NEI AU I TE MEA APΔ

8. Eaha ta Iehova i parau ia Isaia ia rave, e ua aha Isaia?

8 Ua faaohipa Iehova ia Isaia no te faaara i te mau Iseraela no nia i ta ’Na e rave: E haamou ia Ierusalema, to ratou oire pu, e e vaiiho i to ’Na nunaa ia afai-tîtî-hia. Ua tohu atoa Iehova e e rave o ’na i “te mea apî” e e faatiamâ mai o ’na i to ’na nunaa ma te maere mau. (Isa. 43:19) Noa ’tu e ua ite Iehova e eita te mau Iseraela e tatarahapa, ua parau oia ia Isaia ia faaara noa ia ratou. E faaararaa no nia i te haamouraa o Ierusalema te rahiraa o te mau parau i roto i na pene matamua e ono o te buka a Isaia. Ua hinaaro Isaia e ite ehia maororaa te nunaa e faaroo ore noa ’i ia Iehova. Ua pahono atu te Atua: “Ia pau roa te mau oire, e aore roa e taata; e te mau fare atoa, e aore roa e taata toe i roto ra, e ia ano roa te fenua.”—A taio i te Isaia 6:8-11.

9. (a) Afea te parau tohu a Isaia no nia ia Ierusalema i te tupuraa? (b) I teie mahana, e mea tia ia haapao tatou i teihea faaararaa?

9 Hau atu i te 45 matahiti i te maoro, ua faaara Isaia i te mau Iseraela no nia i te haamouraa e fatata maira. Ua haamata o ’na i te tohu i te matahiti hopea o te faatereraa a te arii Uzia, i 778 hou te Mesia. E ua tamau noa o ’na e tae atu i 732 hou te Mesia a faatere ai te arii Hezekia. I muri iho, ua faaara noa Iehova i to ’na nunaa e tae roa ’tu i te matahiti 607 hou te Mesia a haamouhia ’i Ierusalema. Ua faaara-a‘ena-hia ïa te mau Iseraela, e rave rahi matahiti na mua ’tu, no nia i te ohipa e tupu. I teie mahana, ua faaohipa Iehova i to ’na nunaa no te faaara i te tahi atu mau taata no nia i te tupu i muri a‘e. E rave rahi  matahiti i te maoro to Te Pare Tiaraa faaite-noa-raa e fatata te hopea o te faatereraa a Satani e e monohia te reira e te faatereraa a te Mesia.—Apo. 20:1-3, 6.

10, 11. Ua ite te mau Iseraela i Babulonia i teihea tupuraa o te parau tohu a Isaia?

10 Ua ora mai te tahi mau ati Iuda i te haamouraa o Ierusalema. Ua pee ratou i te faaueraa a Iehova e auraro i to Babulonia e ua afai-tîtî-hia ratou i Babulonia. (Ier. 27:11, 12) E 70 matahiti i muri a‘e, ua ite te tahi mau ati Iuda i te tupuraa o te tahi atu parau tohu a Isaia: “Te na ô maira Iehova, to outou ora, o Tei Mo‘a i Iseraela nei; No outou i tono ai au i te vea i Babulonia; e na ’u e tuu i te mau arai etaeta atoa no ’na i raro.”—Isa. 43:14.

11 Ua faatupu Iehova i teie parau tohu ma te faahiahia. I te hoê po i Atopa 539 hou te Mesia, ua faatupu te arii o Babulonia e to ’na feia mana i te hoê oroa no to ratou mau atua. Ua inu atoa ratou i roto i te mau au‘a eiâhia i roto i te hiero o Iehova. I tera atoa râ po, ua haru te arii Kuro e to ’na mau nuu ia Babulonia e ua upootia i nia i te Hau emepera Babulonia. I 538 aore ra 537 hou te Mesia, ua faaue o Kuro i te mau ati Iuda ia ho‘i i Ierusalema e ia patu faahou i te hiero o te Atua. E ua paruru Iehova ia ratou a ho‘i ai ratou i Ierusalema. Ua tupu iho â te reira mai ta Isaia i tohu. I to te nunaa o te Atua iteraa i te hiero i Ierusalema tei patu-faahou-hia, ua ite mata ratou e e Atua mau o Iehova e e faatupu noa o ’na i ta ’na e fafau ra. Ua parau te Atua no te mau ati Iuda tei ho‘i i Ierusalema: “Ua haapaohia e au teie nei mau taata no ’u iho; na ratou e haamaitai mai ia ’u.”—Isa. 43:21; 44:26-28.

12, 13. (a) O vai atu â tei amui i te mau Iseraela a ho‘i ai ratou e patu faahou i te hiero? (b) Eaha te titauhia ia rave te mau “mamoe ê atu” i teie nei, e eaha ta ratou e tiai ru nei?

12 I to te mau Iseraela ho‘iraa e patu faahou i te hiero, e tausani taata ěê tei amui e o ratou no te haamori ia Iehova. E ua rahi atu â i muri a‘e. (Ezr. 2:58, 64, 65; Ese. 8:17) I teie mahana, o te mau Kerisetiano faatavaihia te nunaa o te Atua, ‘te Iseraela o te Atua.’ E ua amui atu te “feia rahi roa” o te mau “mamoe ê atu” ia ratou no te haamori ia Iehova. (Gal. 6:16; Apo. 7:9, 10; Ioa. 10:16) E fana‘oraa taa ê ta te feia faatavaihia, oia atoa ta te mau mamoe ê atu, e amo i te i‘oa Ite no Iehova.

13 I roto i te ao apî, e fana‘oraa taa ê ta te mau melo o te feia rahi roa. E faaite ratou  i te feia tei faaho‘ihia mai i te ora mai te aha te huru te riroraa ei Ite no Iehova i te mau mahana hopea o te ao a Satani. No te tapae râ i reira, e mea tia ia vai mo‘a noa. Noa ’tu e te faaitoito mau nei tatou i te ora ia au i te mau ture aveia a Iehova, te hapa nei tatou i te mau mahana atoa. E mea tia ïa ia ani ia Iehova i te mau mahana atoa ia faaore mai i ta tatou mau hapa. Ma te vai mo‘a noa, e faaite tatou i to tatou mauruuru i to Iehova vaiihoraa ia tatou ia riro ei tia no ’na.—A taio i te Ioane 1, 1:8, 9.

EAHA TE AURAA O TE I‘OA O TE ATUA?

14. Eaha te auraa o te i‘oa Iehova?

14 No te taa ’tu â i te fana‘oraa taa ê e amo i to Iehova i‘oa, mea faufaa ia ite tatou eaha te auraa o to ’na i‘oa. No roto mai te i‘oa Iehova i te hoê ta‘o Hebera te nehenehe e hurihia ei “e riro” e o te nehenehe e faataa i te hoê ohipa e ravehia ra. Te mana‘ohia ra ïa e o “Na ’na e faariro” te auraa o te i‘oa o te Atua. Te tauturu maira te i‘oa o Iehova ia taa o vai oia. O ’na tei poiete i te mau mea atoa. Hau atu â, ia parau Iehova e e rave o ’na i te tahi mea, aita e taata e nehenehe e tapea ia ’na ia na reira. Aita atoa ta Satani e nehenehe.

15. Eaha te haapii mai no nia i te i‘oa o Iehova ia au i ta ’na i parau ia Mose? (A hi‘o i te tumu parau tarenihia “ Iehova: te hoê i‘oa e auraa faufaa to ’na.”)

15 Ua faataa ’tu â Iehova i te auraa o to ’na i‘oa ia Mose. A tono ai Iehova ia ’na no te faatiamâ i to ’Na nunaa mai Aiphiti mai, ua parau o ’na ia Mose: “E riro vau mai ia ’u e riro mai.” E ua na ô â: “Teie ta oe e parau atu i te tamarii a Iseraela, Na E riro vau i tono mai ia ’u ia outou nei.” (Exo. 3:14, Traduction du monde nouveau) E riro ïa Iehova i tei titauhia no te faatupu i ta ’na opuaraa. No te mau Iseraela, ua rave Iehova i tei titauhia no te riro ei Faaora, ei Paruru, ei Aratai e ei Atua o tei horoa ’tu i ta ratou i hinaaro mau.

E NAFEA E FAAITE AI I TO TATOU MAURUURU?

16, 17. (a) E nafea e faaite ai i to tatou mauruuru no te fana‘oraa taa ê e amo i to te Atua i‘oa? (b) Eaha te hi‘opoahia i to muri nei tumu parau?

16 I teie mahana, aita Iehova i taui. Te haamana‘o maira to ’na i‘oa e e riro mai o ’na i tei titauhia no te aupuru i to ’na nunaa. Ei hi‘oraa, ua horoa mai o ’na i tei titauhia no te ora i te mau mahana atoa e ia puai noa to tatou faaroo. Eaha ’tu â ta to ’na i‘oa e haapii maira? E nehenehe o ’na e faaohipa i te taata no te rave i tei titauhia no te faatupu i ta ’na opuaraa. Ei hi‘oraa, te faaohipa ra o ’na i to ’na mau Ite no te rave i ta ’na ohipa. E turai mai teie mana‘o ia tatou ia riro ei tia maitai no ’na. E Ite no Iehova itoito rahi o Kåre no Norevetia a 70 matahiti i te maoro i teie nei. Te parau ra o ’na: “E fana‘oraa taa ê mau no ’u ia tavini ia Iehova, te Arii hau mure ore, e ia riro ei melo o te nunaa e amo ra i to ’na i‘oa mo‘a. E fana‘oraa taa ê noa ia faataa i te parau mau Bibilia e ia ite i te mata o te taata ia anaana mai no te mea ua oaoa e ua maramarama ratou. Ei hi‘oraa, te mauruuru mau nei au i te haapii i te taata i te mau maitai o te tusia taraehara o te Mesia. Oia atoa i te faaite atu e nafea ratou e nehenehe ai e fana‘o i te ora mure ore i roto i te ao apî parau-tia e te hau maoti teie tusia.”

17 I te tahi mau fenua, mea fifi ia ite mai i te taata o te hinaaro e haapii no nia ia Iehova. Mai ia Kåre râ, te oaoa mau nei tatou a ite ai hoê noa ’‘e taata o te hinaaro e haapii no nia i to Iehova i‘oa. E nafea râ e riro ai ei Ite no Iehova e i te hoê â taime e riro ei ite no Iesu? O ta tatou ïa e hi‘opoa mai i to muri nei tumu parau.