Esekiel 8:1-18
8 Ken inyom i sha ataratar, ken uwer u sha ataratar, sha iyange i sha utaan i uwer shon la, m tema hen ya wam, mbatamen mba Yuda tema hen ishigh yagh, maa uwegh ku Yehova Ter u Hemban Cii sen sha a mo her.
2 Er m lu kenger yô, m nenge a kwagh, mluashe na lu er usu nahan; hii ape lu inja er ka iwenge na la sen shin inya cii lu usu,+ hii hen iwenge na kôndo sha di mondo er ka iyôgh ki engem nahan.*+
3 Maa a naregh kwagh er ka uwegh nahan a kôrom sha ice i sha ityo, nahan jijingi tôôm kôndo a mo sha ahumbe, yem a mo ken Yerusalem, ken mbampase mba sha mnenge mba Aôndo, a za a mo hen ape nyôron hen hundagar u ken atô,+ u u ver ishigh ken imbusutarimese ape eev mbu iyuhwegh mbu mbu ve a iyuhwe mbu lu la.+
4 Yô nenge, iengem i Aôndo u Iserael lu her,+ lu er kwagh u m vande nengen a mi shin pev u lun gburumaa la nahan.+
5 Tsô a kaa a mo ér: “Wan u or, kende ashe sha, nenge vegher u imbusutarimese la.” Nahan m kende ashe, m kenger vegher u imbusutarimese la, yô nenge, vegher u imbusutarimese i hundagar u atse a nan nagh la, eev mbu iyuhwegh lu her hen ape nyôron la.
6 A kaa a mo ér: “Wan u or, u nenge akaa a kpilighyol a ndôhôrshima a ya u Iserael a lu eren heen,+ a a ne m gbe ica a icighanjiir wam ne kpa?+ Kpa shi ka u u va nenge a akaa a ndôhôrshima a a hembe kpiligh iyol yô.”
7 Nahan a va a mo hen ape nyôron ken tembe la, m kenger yô, m nenge a ihula ken kpekpe.
8 Tsô a kaa a mo ér: “Wan u or, time kpekpe la pev.” M peven kpekpe la yô m nenge a hunda u nyôron.
9 Tsô a kaa a mo ér: “Nyôr ker, nenge aferakaa a ndôhôrshima a ve lu eren ker la.”
10 M nyer ker m kenger yô, m nenge a foto u hanma inja i kwagh u kpelan iyav inya man ishôso i hôngorough+ man ieev mbi ndôhôrshima* mbi hen ya u Iserael cii;+ i kpela foto ve sha kpekpe ningir tser.
11 Mbatamen 70 mba ken ya u Iserael tile sha ishigh vev, Yaasania wan u Shafan+ kpa lu a ve imôngo. Hanmô ve kôr gbande u nan u nanden insensi ken uwe, shi mnyim ma human doon ma insensi lu duen kôndon sha.+
12 Tsô a kaa a mo ér: “Wan u or, u nenge kwagh u mbatamen mba hen ya u Iserael ve lu eren ken ime, hanma or ken atô u iyou i nan ape nan ver* ieev mbi nan la kpa? Gadia mba kaan ér, ‘Yehova ngu nengen a vese ga. Yehova undu tar ne.’”+
13 Tsô shi a kaa a mo ér: “Shi ka u u nenge a akaa a ndôhôrshima a hemban kpilighyol a ve lu eren yô.”
14 Nahan a va a mo hen ape nyôron hen hunda u ken imbusutarimese u iyou i Yehova la, tsô m nenge kasev tema her lu vaan an-aôndo Tamushi.
15 Shi a kaa a mo ér: “Wan u or, u nenge a kwagh ne kpa? Ka u shi u va nenge a akaa a ndôhôrshima a a hembe vihin a angan yô.”+
16 Tsô a va a mo ken tembe u ken atô u ya u Yehova la.+ Nomso 25 tile hen ape nyôron hen tempel u Yehova, hen atô u varenda man atse a nan nagh la, ve na ijime ken tempel u Yehova, ve gema ve ver ishigh sha ityoughkitaregh; ve lu guren iyange inya sha ityoughkitaregh.+
17 A kaa a mo ér: “Wan u or, u nenge kwagh ne kpa? Er ya u Yuda ve lu eren akaa a ndôhôrshima ne, ve iv tar ne a tswam,+ shi ve lu zeren vihin mo ishima ker nahan kpa ka kwagh u kiriki? Mba zan mo gbaakon* sha ihinga je.
18 Nahan yô, me er kwagh sha ishimavihin. Kunya a kôr ishe yam ga;+ me zungwe mhôônom kpaa ga. Vea̱ vaa sha ato a am genger genger je kpaa me ungwa ve her ga.”+
