Esekiel 21:1-32
21 Kwaghôron u Yehova shi va hen a mo, ér:
2 “Wan u or, gema ver ishigh vegher u Yerusalem la, yôô kwaghtseren sha uicighanmbaajiiriv, shi ôr kwaghôron u profeti sha tar u Iserael.
3 Kaa a tar u Iserael wer, ‘Yehova ngu kaan ér: “Nenge, m ngu num a we, me tsua sanker wam ken var,+ me bee a mbaperapera man mbaaferev cii ken a we kera.
4 Er i lu u me bee a mbaperapera man mbaaferev ken a we kera yô, sanker wam una due ken var, una lu num a ior cii, hii ken imbusutariyan zan zan za ar imbusutarimese.
5 Ior cii vea fa er i lu mo Yehova iyol yam m tsough sanker wam ken var yô. Una kera hide a nyôr ker ga.”’+
6 “Nahan we wan u or, shir ishima a akarkase iyol.* Een, shir ishima, ishima i vihi u tsung sha ashe a ve.+
7 Man aluer ve pine u ér, ‘Er nan man u shirin ishima nahana?’ yô, kaa wer, ‘Ka sha ci u m ungwa ibaver.’ Gadia kwagh ne una er kpee, man hanma ishima ia sough sha ci u mciem, shi hanma uwegh kua shir livaa, iyol a kpe hanma or, shi hanma inyu yô, ia lu nôndon mngerem.*+ ‘Nenge! Kwagh ne una va keng, una kure sha mi kpee,’ ka kwagh u Yehova Ter u Hemban Cii a kaa je la.”
8 Kwaghôron u Yehova shi va hen a mo, a kaa ér:
9 “Wan u or, ôr kwaghôron u profeti, kaa wer, ‘Ka kwagh u Yehova a kaa ne: “Kaa wer, ‘Nenge sanker! I wua sanker,+ i kire un a engem.
10 I wua un ér a sôngo kwagh a mi kpishi; i kire un ér a engem er ka inyiar nahan.’”’”
“Doo u se ember gaa?”
“‘Una* venda tôgh ku wan wam+ er a vende ikyon igen nahana?
11 “‘I na sanker la sha u i kire un shi i er tom a mi. I wua un shi i kire un sha er a wa orwuanor ken uwe yô.+
12 “‘Haa vaa, gber kwelegh,+ wan u or, gadia kwagh ne va sha ior av; a va sha mbahemenev mba ken Iserael cii.+ Sanker ne una bende a ve, a ior av cii imôngo. Nahan yô, gbidye ave ken ikyooso sha mzungu.
13 Gadia i tôv sha mi tsembelee,+ man aluer sanker la venda tôgh kura yô, ka nyi ia za hemene? Kua kera lu ga,’+ ka kwagh u Yehova Ter u Hemban Cii a ôr je la.
14 “Nahan we, wan u or, ôr kwaghôron u profeti, kure ave yôô wer ‘Sanker!’ kwa tar. Ka sanker u mba i woo ve la, sanker u a woo kwagh kpishi, a kase ve a wa atô la.+
15 Mciem ma a na asema a ve aa sough,+ ior kpishi vea haa inya hen ihindagar ve; me tim kwagh sha sanker. Een, ngu mondon er ka inyiar nahan, i kire un a engem sha u wuan kwagh!
16 Vishigh ken iyan! Gese ken imese! Za hanma vegher u kurugh ku sanker wou ku gem cii!
17 Mo kpa me kure ave, iyugh yam ia mem.+ Ka mo Yehova iyol yam m ôr kwagh ne ye.”
18 Shi kwaghôron u Yehova va hen a mo, a kaa ér:
19 “Kpa we yô, wan u or, kpela igbenda ihiar i sanker u tor u Babilon una va yô. Igbenda i ihiar la cii ia mough ken tar môm. Tim ikyav* ape gbenda u pav u yem ken agar a ahar la.
20 Er ikyav sha gbenda môm u sanker la una va sha Raba+ u ken Mbaamon yô, u môm la di, una va sha Yerusalem u ken Yuda u i we un gir la.+
21 Gadia tor u Babilon va tile hen akahar a igbenda, a kpehe ishor ape igbenda i pav ihiar la. A tsongor avaan. A pine ieev nav* kwagh; shi a nenge mtemam.
22 Ishor i ken uwegh nagh ku iyanegh la gba sha Yerusalem, sha u una ver akeke a hemben ukpekpe, shi una na zwa ér i wua kwagh shi una ger amo a utya, shi una ver akeke a hemben ukpekpe sha ihindagar shi una wa igyarutya shi una maa kpekpeutya a kase un yô.+
23 Kpa hen mba ve* bum a ve* la yô,+ a lu ve er ishor la ka i mimi ga nahan. Kpa a umbur ibo ve, nahan una kôr ve.+
24 “Sha nahan yô, ka kwagh u Yehova Ter u Hemban Cii a kaa ne: ‘Ne na ér i umbur ibo yen, sha u tsenen atindi a peren a en ken igbar, shi nan ér i nenge a asorabo a en ken akaa a ne eren cii. Hegen u i umbur kwagh wen ne yô, a kôr ne sha agee.’*
25 “Kpa iyange you va, we orhemen u Iserael u wan ifer+ u i vihi u iyol kehelee ne. Shighe u mtsaha wou u masetyô kuma.
26 Yehova Ter u Hemban Cii ngu kaan ér: ‘Sagh tsar u sha ityo la, shi bugh idyer i tor kera.+ Kwagh a kera lu nahan ga.+ Mough a or u gban ijime sha,+ gema hide a or u i kende a nan sha la ijime.+
27 Mtim, mtim, me tim un kera. Una kera lu u or ga, zan zan un u i lu kwagh na jim jim sha tindi la una kar van,+ maa me na un.’+
28 “We wan u or, ôr kwaghôron u profeti kaa wer, ‘Ka kwagh u Yehova Ter u Hemban Cii a ôr sha Mbaamon man ilyahan ve ne.’ Kaa wer, ‘Sanker! I tsua sanker sha u wuan kwagh; i kire un sha u timin kwagh, man sha u a engem er ka inyiar nahan.
29 Er i lu nengen mbampase mba icughugh shi i lu kpehen ishor i aiegh sha kwagh wou nahan kpa, a kende u sha tihi u mba i woo ve la,* ka ve mbaaferev mba iyange ve i ve, ve mba shighe u mtsaha ve u masetyô a kom la.
30 Hide a mi wa ken var. Me ôr u ijir hen ijiir i yange i gba u la, hen tar u u dugh her la.
31 Me haa ishimavihin yam sha a we. Me fehe usu u iyugh yam sha a we, me gema u me na sha ikyev i ior mba vihin tu mba ve fe u timin kwagh tsembelee yô.+
32 U hingir kwagh u keer usu a mi;+ a haa awambe a ou inya ken tar la, shi a kera umbur kwagh wou ga, gadia ka mo Yehova iyol yam m ôr kwagh ne ye.
Ngeren mba shin kpe
^ Zwa Heberu, “a akooso a kunden.”
^ Inja na yô, a cier ve iyol, mnyandem ma a haa ve ken agbelan.
^ Ka sanker u Yehova je la.
^ Zwa Heberu, “uwegh.”
^ Zwa Heberu, “uterafim.”
^ Ka mba ken Yerusalem je la.
^ Ikyav tese ér ka mba ken Babilon je la.
^ Zwa Heberu, “sha uwe.”
^ Zwa Heberu, “sha mon u mba i woo ve la.”
