Esekiel 32:1-32
32 Tsô ken inyom i sha 12, uwer u sha 12, iyange i môm la, kwaghôron u Yehova shi va hen a mo, ér:
2 “Wan u or, wa icam i mzungu* sha kwagh u Farou tor u Igipiti, kaa a na wer,‘Yange u lu er gumbegha u akuraior u taver iyol nahan,Kpa hegen ne i cir u zwa.
Yange u lu er inyamkyume i cieryol i shin uzegembamngerev nahan,+ u gbuusu uifi ou,U lu hundun uzegembamngerev sha angahar a ou shi vihin uifi.’*
3 Yehova Ter u Hemban Cii ngu kaan ér:
‘Me cir u ken kper wam sha ikyev i akuraior kpishi a me kohol me tindi a yô,Vea urugh we a due a mi ken kper wam u kpelan a kpela.
4 Me kende u sha tar, me undu u her;Me gbihi u ken ikyôngo.
Me na inyon i sha kwavaôndo cii ia va tema sha a we,Shi me na inyamtoho i sha tar cii ia ide sha a we.+
5 Me tsenda inyam you sha iwoMe iv upev a ikyom you.+
6 Me heen tar la a awambe a ou a a lu haan la zan zan a za ar sha iwo,Aa iv iwagh.’*
7 ‘Man zum u a pir u la,* me cir usha, shi me na asan a ve aa wa ime.
Me cir abeen sha iyange,Uwer kpaa ua ta iwanger i u ga.+
8 Me na akaa a tan iwanger a sha cii aa wa ime, sha ci u ieren you,Me cir ime sha tar wou,’ ka kwagh u Yehova Ter u Hemban Cii a kaa la.
9 ‘Me na asema aa nyian akuraior kpishi,Zum u me yem a ior ou uikyangen ken ityar igen,Ken ityar i u fe i ga la.+
10 Me na a kpiligh akuraior kpishi iyol,Ator a a kpaa aa gbidye akarkase iyol sha mcie sha kwagh wou, zum u me jingir sanker wam sha ishigh vegh la.
Vea lu gbidyen akarkase iyol, hanmô yô nana lu cian sha ci u uma u nan,Sha iyange i u gba la.’
11 Gadia Yehova Ter u Hemban Cii ngu kaan ér:
‘Sanker u tor u Babilon una va sha a we.+
12 Me na ikpelaior you ia kpe sha sanker u mbautyaav mba ageev,Ve cica ka mbautyaav mba hemban vihin tu ken akuraior cii.+
Vea hungwa a ihyagh i Igipiti, shi vea tim ikpelaior na kera vindi vindi.+
13 Me tim uzendenya nav mba ve lu hen mngerem nam ma kpishim la cii,+Nguhar ku orough shin pandegh ku zendenya kua kera hundu ma ga.’+
14 ‘Hen shighe la me wanger mngerem vem,Shi me er uifi vev vea kua er ka mkurem nahan,’ ka kwagh u Yehova Ter u Hemban Cii a ôr je la.
15 ‘Zum u me gema Igipiti una hingir ice dang,Kwagh môm una kera lu ken tar shon ga,+Shi me wua mba ve tem ker la cii yô,Vea fa er mo m lu Yehova yô.+
16 Kwagh ne ka kwelegh, shi ior vea gber un;Ônkasev mba akuraior vea gber un.
Vea gber un sha Igipiti man sha ikpelaior na cii,’Ka kwagh u Yehova Ter u Hemban Cii a kaa la.”
17 Tsô ken inyom i sha 12, ayange 15 a uwer la, kwaghôron u Yehova va hen a mo, ér:
18 “Wan u or, gber kwelegh vaa ikpelaior i Igipiti, shi sen a na shin atô u inyaagh, un man ônkasev mba akuraior a ageegh, a mba ve lu senen shin ihyungwa* la imôngo.
19 “‘Ka an u hembe nan mdoomo? Sen za yav a mbaipyusuv imôngo!’
20 “‘Vea haa inya a mba sanker a woo ve la imôngo.+ I na un sha ikyev i sanker; kpela un kar a mi kera, un vea ikpelaior na cii.
21 “‘Mbautyaav mba ageev vea lam a na kua mbawasen un shin atô u Uwaregh.* Vea sen vea za yav er ka mbaipyusuv nahan kpee je, vea kpe ku u sanker.
22 Ashiria ngu her a ikpelaior na cii. Iwar ve kase un, ve cii ve kpe sha sanker.+
23 Iwar na ngi shin atô ihyungwa,* ikpelaior na kase uwar na, ve cii i wua ve sha sanker, sha ci u ve er akaa a cieryol ken tar u mbaumav.
24 “‘Elam+ ngu her vea ikpelaior na cii, i kase uwar na, ve cii ve kpe ku u sanker. Ve sen shin inya ipyusu, ve mba ve er akaa a cieryol ken tar u mbaumav la. Hegen vea ya kunya a mba ve senen shin ihyungwa la imôngo.*
25 Ve tar un gambe a mba i woo ve la imôngo, un vea ikpelaior na i i kase iwar na la cii. Ve cii ka mbaipyusuv mba i woo ve sha sanker yô, sha ci u yange ve er akaa a cieryol ken tar u mbaumav. Nahan vea ya ihyeen a mba ve lu senen shin ihyungwa la imôngo.* I gbihi un hen atô u mba i woo ve la.
26 “‘Ka her Mesheki man Tubal+ man ikpelaior ve cii* i lu ye. Iwar ve* kase un tser. Ve cii ka mbaipyusuv mba i kum ve sanker i woo yô, sha ci u ve er akaa a cieryol ken tar u mbaumav.
27 Vea kera yav imôngo vea mbautyaav mba ageev mba ipyusuv mba i woo ve, ve yem shin Uwar* a ikyav vev mbi utyaav la gaa? Vea ver ityough sha usanker vev,* isholibo ve ia lu sha akuhe a ve, sha ci u mbautyaav mba ageev mban yange ve ta ior mciem iyol ken tar u mbaumav.
28 Kpa we yô, a njighe u a mbaipyusuv imôngo, u yav vea mba i woo ve sha sanker la.
29 “‘Edom+ ngu her a ator a na man mbahemenev nav cii, i ver ve imôngo a mba i woo ve sha sanker la, shin er yange ve lu mbaageev nahan kpaa; ve kpa vea yav a mbaipyusuv imôngo,+ kua mba ve lu senen shin ihyungwa la.*
30 “‘Mbahemenev mba ken imbusutarimese cii mba her, ve kua Mbashidon cii,+ ve mba ve sen shin inya a ihyeen iyol, a mba i woo ve imôngo la, shin er yange ve er akaa a cieryol a tahav vev mbura nahan kpaa. Vea yav ipyusu a mba i woo ve sha sanker la imôngo, shi vea ya kunya a mba ve senen shin ihyungwa la.*
31 “‘Farou una nenge a ve cii, nahan ishima ia gba un shimi sha kwagh u a er ikpelaior na la;+ Farou kua ikyumutya na cii vea kpe ku u sanker,’ ka kwagh u Yehova Ter u Hemban Cii a kaa la.
32 “‘Er Farou yange er akaa a cieryol ken tar u mbaumav yô, un kua ikpelaior na cii a gbir ve a mbaipyusuv imôngo, ve mba i woo ve sha sanker la,’ ka kwagh u Yehova Ter u Hemban Cii a kaa la.”
Ngeren mba shin kpe
^ Zwa Heberu, “uifi vev.”
^ Shin “gber kwelegh.”
^ Zwa Heberu, “Iwagh ia iv a we.”
^ Shin “a bee a we kera la.”
^ Shin “shin uwar la.”
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “shin atô u uwaregh.”
^ Shin “shin uwar la imôngo.”
^ Shin “shin uwar la imôngo.”
^ Zwa Heberu, “Iwar na.”
^ Zwa Heberu, “ikpelaior na cii.”
^ Shin “Sheol,” ka uwar u uumace je la. Nenge Ngeren u Pasen Asember.
^ Alaghga mba ôron ka kwagh u mbautyaav mba i ii ve a usanker vev sha u nan ve icivir yô.
^ Shin “shin uwar la.”
^ Shin “shin uwar la.”
