Esekiel 39:1-29
39 “Yô we wan u or, ôr kwaghôron u profeti sha Gogi,+ kaa a na wer, ‘Yehova Ter u Hemban Cii ngu kaan ér: “M ngu num a we, we Gogi orhemen u vesen* u Mesheki man Tubal.+
2 Me goom a we, me hemen we, me na u due ken ajiir a a hembe gban ica ken imbusutarimese la,+ me va a we sha iwo i Iserael.
3 Me gbidye ada una osough ken uwegh ough ku imesegh una gba, shi me er avaan a ou aa osough we ken uwegh ku iyanegh aa haa.
4 Ka sha iwo i Iserael u gba ye,+ we a akumautya a ou cii man akuraior a aa lu a we imôngo la. Me gema u u hingir kwaghyan u hanma inja inyon i yaren ikyôr cii man u inyamkyume i ken toho.”’+
5 “‘U gba ken ikyôngo,+ gadia ka mo iyol yam m ôr kwagh ne ye,’ ka kwagh u Yehova Ter u Hemban Cii a kaa la.
6 “‘Me haa usu sha Magogi kua mba ve tem ken uicile bem bem la,+ nahan vea fa er mo m lu Yehova yô.
7 Me pase icighanti wam hen ior av Iserael shi me de mer i za hemen u hôngor a icighanti wam kpaa ga. Nahan akuraior aa fa er mo m lu Yehova,+ Icighan u ken Iserael yô.’+
8 “‘Een, kwagh ne ngu van, una er kpaa,’ ka kwagh u Yehova Ter u Hemban Cii a ôr je ne. ‘Ka iyange i m er kwagh u i ne je ne.
9 Mba ve tem ken agar a Iserael la vea due vea za keer usu a ikyav mbi tswamev mbira—ka ipyerutya i kiriki* man i vesen man mbaada man avaan man igbough mbi nôngon ityav a mi* man udagi. Vea keer usu+ a mi anyom ataankarahar.
10 A kera gba u vea za tav ikyon ken toho shin vea za gber ikyon ken ikyô ga, sha ci u vea keer usu a ikyav mbi tswamev mbira.’
“‘Vea ya mba yange ve yaan ve ishar la ishar shi vea kura akaa a mba yange ve kuran ve akaa la,’ ka kwagh u Yehova Ter u Hemban Cii a kaa la.
11 “‘Sha iyange la, me na Gogi+ ijiir i uwaregh ken Iserael shin pev u mba zan zende mba ve karen zegemnger vegher u sha ityoughkitaregh la, ia yisa gbenda u mba ve karen her la. Ka ape a ii Gogi kua ikpelaior na la cii je la, nahan a yilan i ér Pev u Hamon-Gogi.*+
12 Ya u Iserael una ii ve iwer itiankarihiar sha er a wanger tar la yô.+
13 Ior mba ken tar u Iserael cii vea er tom u iin ve, nahan kwagh ne una na vea za gwa sha iyange i me tsegha iyol yam la,’+ ka kwagh u Yehova Ter u Hemban Cii a kaa la.
14 “‘A ver ior ér ve zenden ken tar la hanma shighe ve iin akom a a shi hen inya la sha er a wanger u yô. Vea zer keren zan zan iwer itiankarihiar.
15 Zum u mbazenden ken tar la vea za nenge a kuhe u or yô, ve tim ikyav her. Nahan mba i ver ve ér ve iin ior la ve za ii u shin Pev u Hamon-Gogi.+
16 Shi gar una lu her, a ii un iti ér Hamona.* Nahan vea wanger tar la.’+
17 “Man we yô, wan u or, Yehova Ter u Hemban Cii ngu kaan ér: ‘Kaa a hanma inja inyon man inyamkyume i ken toho cii wer, “Kohol nen, va nen. Va kohol nen hen nagh agh ku m senge sha ci wen ne, nagh ku vesen ku sha iwo i Iserael.+ Ne ya inyam shi ne ma awambe.+
18 Ne ya inyam i mbaageev shi ne ma awambe a utor mba sha tar—ka anomaiyôngo man agumaiyôngo man ivo man anomabua—ilev mbi dindim dindim mbi ken Bashan cii.
19 Ne ya ahôm ne ide shi ne ma awambe je ne hunde sha ci u nagh ku m sôngo sha ci wen la.”’
20 “‘Ne ya inyam i anyinya man mba hendan akekeautya man mbaageev man mbautyaav anza kposo kposo+ sha tebul wam ne ide,’ ka kwagh u Yehova Ter u Hemban Cii a kaa la.
21 “‘Me tese icivir yam ken akuraior, nahan akuraior cii aa nenge a ijir i m kur man tahav mbu* m tese hen atô ve la.+
22 Hii sha iyange la je, ya u Iserael una fa er mo m lu Yehova Aôndo ve yô.
23 Shi akuraior aa fa er lu sha ci u asorabo a ya u Iserael iyol ve i yem a ve uikyangen yô, gadia ve er kwagh a mo sha mimi ga.+ Nahan m yer ve ishigh yagh,+ m gema ve m na sha ikyev i mbahyomov vev,+ ve cii ve kpe ku u sanker.
24 M er kwagh a ve sha hôngor ve man atindi a ve a peren la vough, shi m yer ve ishigh yagh.’
25 “Sha nahan yô, Yehova Ter u Hemban Cii ngu kaan ér: ‘Me hide a ior mba Yakob mba i yem a ve uikyangen la,+ shi me zungwe ya u Iserael+ cii mhôônom. Me paase icighanti wam iyol sha gbashima.*+
26 Vea yaan kunya sha ci u akaa a ve er a mo sha mimi ga la kera cii yô,+ vea tema ken tar ve bem bem a or u tan ve mciem iyol shio.+
27 Zum u me hide a ve ken akuraior shi me kohol ve ken ityar i mbahyomov vev me hide a ve la,+ me shi me tsegha iyol yam hen atô ve sha ashe a akuraior kpishi.’+
28 “‘Vea fa er mo m lu Yehova Aôndo ve yô, zum u me yem a ve uikyangen ken akuraior shi me va kohol ve me hide a ve ken tar ve, me undu or ve môm ken ijime ga la.+
29 Me kera yer ve ishigh yagh ga,+ gadia me haa jijingi wam sha ya u Iserael,’+ ka kwagh u Yehova Ter u Hemban Cii a kaa la.”
Ngeren mba shin kpe
^ Shin “ortaregh u vesen.”
^ Ka mbakerenavaan hemban lun a perutya ne ye.
^ Shin a fatyô u kaan ér, “igbough mbi horon zwa.”
^ Shin “Pev u Ikpelaior i Gogi.”
^ Inja na yô ér, “Ikpelaior.”
^ Zwa Heberu, “uwegh ku.”
^ Zwa Heberu, “Me tese er i lu icighanti wam tseegh i gbe u a civir un yô.”
