Esekiel 7:1-27
7 Kwaghôron u Yehova shi va hen a mo, a kaa ér:
2 “We wan u or, ka kwagh u Yehova Ter u Hemban Cii a lu ôron a tar u Iserael je ne, ér: ‘Mkur! Mkur va sha azongo a anyiin a tar ne.
3 Mkur va sha a we ve, me haa ishimavihin yam sha a we, me ôr u ijir sha igbenda you, shi me pine u kwagh sha kwagh u aeren a ou a ndôhôrshima la cii.
4 Kunya a kôr ishe yam a we ga; me zungwe u mhôônom kpaa ga,+ gadia me kimbi u injar sha aeren a ou, u ya ican sha ci u akaa a ndôhôrshima a u er la.+ Nahan u fa er mo m lu Yehova yô.’+
5 “Yehova Ter u Hemban Cii ngu kaan ér: ‘Nenge! Kwaghtseren ngu van, kwaghtseren u vesen u lun inja kposo.+
6 Mkur ngu van; mkur una va; una va sha a we gagher.* Nenge! Ngu van.
7 Shighe wou kuma,* we u u tem ken tar ne la. Shighe ngu van, iyange kpa i zurum.+ Amo a iemberegh nga sha iwo ga, gema ka anzughul.
8 “‘M sôôn haan iyugh yam sha a we,+ me pase ishimavihin yam cii sha a we,+ me ôr u ijir sha igbenda you, shi me pine u kwagh sha kwagh u aeren a ou a ndôhôrshima la cii.
9 Kunya a kôr ishe yam ga; me zungwe mhôônom kpaa ga.+ Gadia me kimbi u injar sha aeren a ou, u ya ican sha ci u akaa a ndôhôrshima a u er la. Nahan ne fa er i lu mo Yehova m lu tsahan ne yô.+
10 “‘Nenge, iyange la! Nenge, ngi van!+ Shighe wou kuma;* gbough kpar, iyolgengese kpaa ta tombo.
11 Tswam vese hingir gbough ku ifer.+ Kwagh môm una war ga. Ve shin inyaregh vev shin ikpelaior ve shin itizan ve kpaa ga.
12 Shighe ngu van, iyange la ia va. Or u yamen nana de ember ga, or u teen kpaa nana de zungwen ga, gadia iyugh ngi sha ikpelaior ve cii.*+
13 Orteen nana hide hen kwagh u yange nan tee la ga, aluer i de nan, nan ngu uma her je kpaa, gadia mpase u sha mnenge la ngu van sha ikpelaior cii. Or môm nana hide ga, shi sha ci u isholibo i nan yô, or môm nana war uma u nan ga.*
14 “‘I tôngo ibusa,+ hanma or wa iyol, kpa or môm ngu zan ityav ga, sha ci u iyugh yam ngi sha ikpelaior la cii.+
15 Sanker ngu ken won,+ bouange man ijen di mba kimi. Or u nan lu ken toho yô sanker a wua nan, ijen man angev di vea bee a mba ken gar.+
16 Ior vev mba ve nôngo ve war la vea yem sha iwo, hanmô ve nana lu zungwen kwaghbo u nan,+ er ka mkungum ma shin upev nahan.
17 Ave a ve aa shir livaa, shi anu a ve aa lu nôndon mngerem.*+
18 Ve hua ikyondo i zungwen,+ mba gbidyen akarkase iyol.* A hee hanma or, shi hanma ityough kia kpur.*+
19 “‘Vea haa azurufa ve sha igbenda, zanaria ve kpaa una hingir ve kwagh u hôngorough. Azurufa ve shin zanaria ve kpaa una fatyô u yiman ve sha iyange i iyugh i Yehova ga.+ Vea ide ga, iyav vev kpa mbua iv ga, gadia akaa ne* hingir ve kwagh u nan gbeev mbu nôngon mbu van a isholibo.
20 Ve ta ihyagh a mdoom ma akaa a hweegh a ve, ve gema a* ve er akaa a ndôhôrshima a mi, ka ieev vev mbi hôngorough je la.+ Ka nahan man me gema a aa hingir ve kwagh u ndôhôrshima ye.
21 Me gema a* me na atôatyev aa kura a yem a mi, aferaior a shin tar kpaa aa ya ishar sha mi, aa hôngor a mi.
22 “‘Me gema ishigh yagh hen a ve kera,+ nahan a hôngor a ijiir yam i ken myer,* mbaiv vea nyôr ker vea hôngor a i.+
23 “‘Er ishiligh,*+ gadia tar la iv a iboawambe i ijirigh,+ shi gar la iv a tswam.+
24 Me va a ikyurior i hemban vihin tu ken akuraior cii,+ ia ngohol uya vev,+ ia bee a ihyagh i mbaageev, shi ia hôngor a ajiir a ve a tseghan kpaa.+
25 Zum u ican ve ia va yô, vea ker bem, kpa vea zua a mi ga.+
26 Kwaghbo a va, tsô shi kwaghbo ugen a va, ibaver ia cir sha ibaver, ior vea ker mpase u sha mnenge hen profeti,+ kpa tindi* una saa ishe hen pristi, kwaghwan kpaa a zua a mi hen mbatamen ga.+
27 Tor una yem zungwen,+ iuren ia* cir ortaregh iyol er ka ikyondo nahan, shi ave a ior mba hen tar la aa kunde sha mcie. Me kimbi ve injar sha igbenda ve, shi me ôr ve ijir er ve ôron ijir la. Nahan vea fa er mo m lu Yehova yô.’”+
Ngeren mba shin kpe
^ Zwa Heberu, “una nder sha a we.”
^ Shin a fatyô u kaan ér, “Idyer you va.”
^ Shin a fatyô u kaan ér, “Idyer you va.”
^ Inja na yô, or u yamen kwagh man or u teen cii vea zua a iwasen ga, sha ci u mtim una va sha a ve cii.
^ Shin a fatyô u kaan ér, “or môm nana war uma u nan sha ifer i nan ga.”
^ Inja na yô a cier ve iyol, mnyanden ma a haa ve ken agberan.
^ Inja na yô, vea torough mtom u tesen ijungwen.
^ Zwa Heberu, “akarkase cir ve iyol.”
^ Ka azurufa man zanaria ve je la.
^ Ka azurufa man zanaria ve je la.
^ Ka azurufa man zanaria u i er ieev a mi la je la.
^ A̱ shi nan kpa ka vegher u icighanjiir u Yehova u hemban lun ken atô la.
^ Ka ishiligh ku uikyangen je la.
^ Shin “kwaghwan.”
^ Shin “mtswenem ma a.”
