Esekiel 3:1-27
3 Tsô a kaa a mo ér: “Wan u or, ya kwagh u a lu sha ishigh you ne.* Ya ihyurenruamabera ne, nahan za za lam a ya u Iserael.”+
2 Tsô m aver zwa, nahan a nam ihyurenruamabera shon m ya.
3 A kaa a mo ér: “Wan u or, ya ihyurenruamabera i m lu nan we ne, iv gbor wou a mi.” Tsô m gba yan, nahan i nyohom ken zwa er ka iyough nahan.+
4 A kaa a mo ér: “Wan u or, za hen ya u Iserael za ôr ve mkaanem am.
5 Gadia i tindi u ka hen ior mba ve lamen zwa ugen kposo shin zwa u u fe u ga la ga. Kpa ka hen ya u Iserael.
6 I tindi u ka hen ior kpishi mba ve lamen zwa ugen kposo shin zwa u u fe u ga, asember a u kpa u kav ga la ga. Mea tindi u hen ve yô ma ve kegh ato a we.+
7 Kpa ya u Iserael una lumun u keghen ato a we ga, sha ci u ve soo u keghen ato a mo ga.+ Ior mba hen ya u Iserael cii ka mba taver ityough man mba cighir asema.+
8 Nenge! M er ishigh you taver vough er mshim vem nahan, icul you kpaa taver vough er atsul a ve yô.+
9 M er icul you ngi er iwen i daimondi nahan, taver hemba vande.+ De cian ve ga, mshim vem kpa ma de cier we iyol ga,+ gadia ve ka ya u hemban ato.”
10 Shi a kaa a mo ér: “Wan u or, lu a akaaôron ne ken ishima, shi kegh ato a hanma kwagh u m lu ôron we cii.
11 Za hen ior ou* mba i yem a ve uikyangen la,+ za lam a ve. Kaa a ve wer, ‘Ka kwagh u Yehova Ter u Hemban Cii a kaa je ne,’ vea kegh ato shin vea kegh ato ga kpaa.”+
12 Tsô jijingi tôôm yem a mo,+ maa m ungwa zegeimo u kumen ken ijime yam kaa ér: “I̱ wuese iengem i Yehova hen ijiir na.”
13 M ungwa iov i akper a akaauma la er lu zuan iyol yô,+ kua ihyuran i akaver a a dondo a a la,+ man ihyuran i kume u vesen.
14 Tsô jijingi tôôm yem a mo, m yem a ishimavihin man iyugh tsung, uwegh ku Yehova lu sha a mo taveraa.
15 Nahan m za hen ior mba i yem a ve uikyangen hen Tel-abiba, mba ve tema hen kpe u ifi u Cebar la,+ m lu hen ape ve tema la; m lu vea ve ayange ataankarahar, kundam iyol.+
16 Ayange ataankarahar la nga been yô, kwaghôron u Yehova va hen a mo, a kaa ér:
17 “Wan u or, m ver u orkuran sha ya u Iserael;+ zum u u ungwa kwaghôron u a dugh ken zwa wam yô, ta ve icin sha ci wam.+
18 Aluer m kaa a iferor mer, ‘U kpe kpee je,’ kpa u ta nan icin ga, shi u ôr kwagh sha er u ta iferor la icin wer nana undu gbenda u nan u ifer sha er nana lu uma ga yô,+ nana kpe sha ci u isholibo i nan la,+ gadia nan ngu iferor, kpa me pine awambe a nan hen a we.*+
19 Kpa aluer u ta iferor icin, kpa nan gema nan undu ifer i nan man gbenda u nan u ifer la ga yô, nana kpe sha ci u isholibo i nan, kpa we yô u war uma wou.+
20 Kpa aluer orperapera nan undu perapera u nan, nan za er kwaghbo* yô, me ver nan kwagh u nôngon gbeev sha ishi, nahan nana kpe.+ Aluer u ta nan icin ga yô, nana kpe sha ci u isholibo i nan la, a kera umbur perapera u nan ga, kpa me pine awambe a nan hen a we.*+
21 Kpa aluer u ta orperapera la icin wer nana de eren isholibo ga, man nan kera er isholibo ga yô, nana lu uma sha ci u i ta nan icin,+ shi we kpaa u war uma wou.”
22 Tsô uwegh ku Yehova sen sha a mo her, a kaa a mo ér: “Mough sha, yem shin pev u lun gburumaa, ka shimi me za ôr kwagh a we ye.”
23 Nahan m mough m yem shin pev u lun gburumaa la, yô nenge! iengem i Yehova lu her,+ lu er iengem i m vande nengen a mi hen kpe u ifi u Cebar la nahan,+ maa m gba m cir ishigh inya.
24 Tsô jijingi nyôr ken a mo, a erem m mough m tile sha,+ maa a ôr kwagh a mo a kaa ér:
“Za, za wuhe iyol you ken iyou you.
25 Man we yô, wan u or, nenge, vea ta u ikyor shi vea kange u a mi, sha er u fatyô u duen zan hen ape ve lu ga yô.
26 Me er nombor wou ua var u sha ikughô, nahan u kera fatyô u lamen ga, u fatyô u tan ve icin ga, sha ci u ve ka ya u hendan kwagh.
27 Kpa zum u m lam a we yô, me bugh zwa wou, nahan u kaa a ve wer,+ ‘Ka kwagh u Yehova Ter u Hemban Cii a kaa je ne.’ Or u nan soo u ungwan yô nana̱ ungwa,+ or u nan vende u ungwan yô nana̱ venda, sha ci u ve ka ya u hendan kwagh.+
