Esekiel 13:1-23
13 Kwaghôron u Yehova shi va hen a mo, a kaa ér:
2 “Wan u or, ôr kwaghôron u profeti sha uprofeti mba ken Iserael,+ mba ve dughun akaaôron a profeti ken asema a ve la wer,+ ‘Ungwa nen kwaghôron u Yehova.
3 Yehova Ter u Hemban Cii ngu kaan nahan ér: “Kwagh a tser abume a uprofeti, a a dondon mbamnenge vev, zum u ve nenge a kwagh môm môm ga la!+
4 We Iserael, uprofeti ou hingir er atsôngo a hen ice nahan.
5 Ne za sha ajiir a kpekpe a hembe la, ne za maa un sha ci u ya u Iserael,+ sha er Iserael una tile dông ken utya sha iyange i Yehova la ga.”+
6 “Ve nenge mbampase mba icughugh, shi ve tsengaôron kwagh u aiegh. Ka ve mba ve kaan ér, ‘Ka kwagh u Yehova a kaa je ne,’ zum u Yehova iyol na a tindi ve ga la. Shi ve ver ishima ér kwaghôron ve una kure sha mi vough.+
7 Zum u ne kaa ner, ‘Ka kwagh u Yehova a kaa je ne,’ man m ôr ma kwagh ga yô, kera ka mpase u icughugh ne nenge, man ka kwagh u aiegh kpaa ne tsengaôron gaa?”’
8 “‘Sha nahan yô, Yehova Ter u Hemban Cii ngu kaan ér: “‘Er ne ôr kwagh u icughugh shi mbampase enev kpa ve lu mba aiev yô, m ngu hendan a ven,’ ka kwagh u Yehova Ter u Hemban Cii+ a ôr je la.”
9 Uwegh agh ku ihyom a uprofeti mba ve nengen mbampase mba icughugh,+ shi ve tsengan ôron akaa a aiegh la. Vea lu ken ior av mba kôôsôô ga; a nger ve ati ken takeda u ya u Iserael ga; shi vea hide ken tar u Iserael kpaa ga; nahan ne fa er mo m lu Yehova Ter u Hemban Cii yô.+
10 Kwagh ne cii, ka sha ci u ve tsume a ior av ve kaa ér, “Bem ngu!” man bem gema ngu ga.+ I maa kpekpe u taver ga, kpa ve gema mba shighen un ivue i pupuu.’*+
11 “Kaa ior mba ve lu shighen kpekpe ivue i pupuu la wer, una gba. Zegeura una nôô, awombo aa haa, zegeijeverahumbe una ta sha mi a yôhôr a haa inya.+
12 Nahan zum u kpekpe la una gba yô, a pine ne ér, ‘Ivue i yange ne shighe la ngi hana?’+
13 “Sha nahan yô, ka kwagh u Yehova Ter u Hemban Cii a kaa je ne: ‘Me er zegeijeverahumbe una mough sha iyugh yam, zegeura kpaa una nôô sha ishimavihin yam, awombo a vihin kwagh aa haa sha ishimanyoon yam.
14 Me yôhôr kpekpe u ne shighe un ivue i pupuu la me haa inya, imaagh nagh kia due sha. Zum u gar la una yôhôr yô, ne tim ker; nahan ne fa er mo m lu Yehova yô.’
15 “‘Zum u me songor iyugh yam sha kpekpe la, kua sha mba ve shighe un ivue i pupuu la cii yô, me kaa a ven mer: “Kpekpe la kera ngu ga, mba ve shighen un ivue la kpaa kera mba ga.+
16 Uprofeti mba ken Iserael kera mba ga, ve mba ve ôron kwaghôron u profeti sha Yerusalem, shi ve nengen mbampase mba bem sha a na kpa bem a lu ga la,”’+ kape Yehova Ter u Hemban Cii a kaa la.
17 “We yô, wan u or, ver ishigh sha ônkasev mba ior ou mba ve dughun akaaôron a profeti ken asema a ve la, ôr kwaghôron u profeti sha a ve.
18 Kaa a ve wer, ‘Yehova Ter u Hemban Cii ngu kaan ér: “Kwagh a tser kasev mba ka ve er mbaagba mba wan ken ave,* shi ve er akondo a yisan ishigh atô kposo kposo, sha er vea yar ikyôr vea wua uuma mba iorov la! Ne soo ape wuan ior av kpa geman waren uuma enevee?
19 Ne heem hen atô u ior av, sha er ne zua a sam barli ken akevaveegh kua avur a beredi,+ ne wua ior mba ma i woo ve ga la, ne gema ne undu ior mba ma ve lu uma ga la ér ve lu uma her, sha u tsughun ior av mba ve keghen ato a mbaaie enev laa?”’+
20 “Sha nahan yô, Yehova Ter u Hemban Cii ngu kaan ér: ‘M ngu ihyom a mbaagba enev mbara, ne ônkasev, mbaagba mba ne hônon ior a mi ne ker er ka inyon la. Me tôndo ve ken ave a en kera, shi me pase ior mba ne kôr ve er ka inyon la.
21 Me ande akondo a en a yisan ishigh, me war ior av sha ikyev yen, vea kera lu kwagh u ne yar ikyôr ne kôr ga; nahan ne fa er mo m lu Yehova yô.+
22 Gadia ne na orperapera ure sha mbaaie enev,+ man lu mo m va nan a mtaver* la ga, ne gema ne taver ave a iferor,+ ner nana de undun gbenda u nan u bo, nana luun uma ga.+
23 Sha nahan yô, ne kasev mban, ne kera nenge a mbampase mba sha aie ga, shi ne kera kpehe ishor+ kpaa ga; me war ior av sha ikyev yen, nahan ne fa er mo m lu Yehova yô.’”
