Amoshi 9:1-15
9 M nenge Yehova+ tile hen atse a nan nagh, a kaa ér: “Gbidye kwagh sha ityough ki ityôgh kira, nahan amagh a iyou la aa tenger. Gber ve mtom, nahan me wua u a mase shin ken a ve la sha sanker. Or a yevese kpa nana za mape ga, or a osough kpa nana war ga.+
2 Vea time vea yem shin Uwar* kpa,Ka shimi uwegh agh kua za due a ve ye;Man aluer vea kôndo vea yem sha aôndo kpaa,Ka sha her je me za hungwa a ve shin inya ye.
3 Man aluer ve za yer sha ityough ki Karmel kpa,Me za ker ve her me kôr.+
Aluer ve za yerem shin atô u zegemnger kpa,Me tindi iyô ia za gber ve shimi.
4 Aluer mbahyomov vev vea yem a ve uikyangen kpa,Me tindi sanker her, una za wua ve;+Me hôn ashe sha a ve u eren ve kwagh u bo, a lu kwagh u dedoo ga.+
5 Gadia un u a lu benden a tar ne la ka Yehova u akum a sha, Ter u Hemban Cii,Ngu benden a u sha er ua sough+ man mba ve tem sha u cii vea zungwe yô;+Man u cii ua mor er Nil nahan,Ua songor er Nil u Igipiti yô.+
6 ‘Un u a maa tsembe na sha aôndo,Un u a kuva haav nav mbu yisa tar;Un u ka a yila mngerem ma shin zegemnger,Sha er una haa ma sha tar la+—Yehova ka iti na.’+
7 Yehova kaa ér, ‘Ne ior i Iserael, ne mbam er ônov mba Kushi nahan gaa?’
‘Yange m due a Mbaiserael ken tar u Igipiti+ kera gaa?
Shi m due a Mbafiliti ken Kerete+ kera, shi Shiria kpa m due a na ken Kir+ kera gaa?’
8 ‘Nenge! Ashe a Yehova Ter u Hemban Cii nga sha tartor u u eren asorabo la,Shi una tim u sha tar kera.+
Kpa me tim ya u Yakob kera vindi vindi ga,’+ ka kwagh u Yehova a ôr je la.
9 ‘Gadia nenge! M ngu nan zwa,Me tsaa ya u Iserael ken akuraior,+Er ka i tsaa kwagh sha lalia nahan,Igboghol i môm kpa ia kar a gba shin inya ga.
10 Ior av mba ve eren asorabo la cii vea kpe ku u sanker,Ve mba ve kaan ér, “Kwaghtseren una kohol se ga, una va ikyua a vese kpaa ga” la.’
11 ‘Sha iyange la me hide me mough a ityumbe* i Davidi+ i yange i gba la,Me sôr ikwe i i* pav la,Shi me hide me sôr ajiir a a vihi la;Me hide me maa i er sha ayange a tsuaa la nahan,+
12 Sha er vea ngohol kwagh u Edom+ u a mase shin la,Man u akuraior agen a i yer a sha iti yam cii la yô,’ ka kwagh u Yehova, un u a lu eren kwagh ne la, a ôr je la.
13 Yehova ngu kaan ér, ‘Nenge! Ayange nga vanA orkahan nana kaha a za kohol orsundan yô,Ortanivor kpaa nana ta a za kohol or u shoghor wain.+
Wain u nyohon una lu nôndon sha iwo,+Shi una lu ndôôr sha agungu cii.*+
14 Me hide a ior av Iserael mba i yem a ve uikyangen la,+Vea hide vea maa agar a ve a yange hingir atse la, vea tema ker.+
Vea môôr ikyon i wain, shi vea ma zar u i,+Vea er ishule i ikyon, shi vea ya atam a i kpaa.’+
15 ‘Me môôr ve hen tar ve,Man mayange a kera wuhe ve keraKen tar u m ne ve la ga,’+ ka kwagh u Yehova Aôndo wou a ôr je la.”
Ngeren mba shin kpe
^ Shin “Sheol,” ka uwar u uumace je la. Nenge Ngeren u Pasen Asember.
^ Shin “tenti; iyou.”
^ Shin “ve.”
^ Zwa Heberu, “agungu cii aa sough.”
