Amoshi 2:1-16
2 “Ka kwagh u Yehova a ôr je ne,‘“Er Moabi+ a tese ityough ki taver kwa tar, man kwa nyiin je kpaa* yô, me hide ijime ga,Sha ci u a nande akuhe a tor u Edom hia gba mtuhwem.
2 Nahan me haa usu ken Moabi,Ua hia ayou a taven a Kerioti+ a lun a ugir la;Moabi una kpe shighe u a lu eren ayôôso la,Shighe u a ger amo a utya, a tôngo korough la.+
3 Me kar a orhemen* na kera,Me wua mbatarev nav cii a orhemen na la imôngo,”+ ka kwagh u Yehova a ôr je la.’
4 Ka kwagh u Yehova a ôr je ne,‘Er Yuda+ a tese ityough ki taver kwa tar, man kwa nyiin je kpaa* yô, me hide ijime ga,Sha ci u ve venda tindi* u Yehova,Kua sha ci u ve dondo akaawan a na ga;+Kpa mbaaie mba uter vev yange ve dondo la, ve kpa ve tsume a ve.+
5 Nahan me haa usu sha Yuda,Ua hia ayou a taven a Yerusalem a lun a ugir.’+
6 Ka kwagh u Yehova a ôr je ne,‘Er Iserael+ a tese ityough ki taver kwa tar, man kwa nyiin je kpaa* yô, me hide ijime ga,Sha ci u ka ve tee orperapera sha azurufa,Man icanor kpaa, sha akôv a wan shin angahar.*+
7 Ka ve ndyar mbagbanjime sha ityo, ve kighir ve shin vuulevu,+Shi ve yisa gbenda u mbaasemaleghlegh.+
Or vea ter u nan ka ve tsaan a kwase môm,Ve hôngor a icighanti wam.
8 Ka ve samber hen kpe u hanma atse a nan nagh,+ sha ikyondo i ve ngohol or ityumbu yô;+Shi wain u ve me ken iyou i* mbaaôndo vev la kpa ka u yange ve ya ior zwajirigh* sha mi yô.’
9 ‘Kpa lu mo m tim Mbaamor sha ishigh vev kera ye,+Ka ve mba ve tav er ikyon i sedar, shi ve taver ayol er ikyon i ouki la;M vihi atam a ve sha, shi m wua amise a ve shin inya kera.+
10 M due a ven ken tar u Igipiti kera,+Shi m er ne ne zende ken taaikyôngo anyom 40,+Sha u me na ne tar u Mbaamor yô.
11 M na ônov enev mbagenev lu uprofeti,+Shi agumaior a en agen lu Mbanasari,+Shin kape i lu la ga, ne ior i Iserael?’ Ka kwagh u Yehova a ôr je la.
12 ‘Kpa ne zer nan Mbanasari wain ner ve ma,+Shi ne ta uprofeti icin ner: “De ôron nen kwaghôron u profeti ga.”+
13 Nahan me dyendegh ne hen ijiir yen la,Vough er ikyekye i i we aile a uyia shimi ka i dyendegh kwagh u i ndyar la nahan.
14 Or u lun fele fe fele nana zua a ape yevese yemen ga,+Orageegh kpaa nana kera lu a mpe iyol ga,Shi orutya môm nana war ga.*
15 Or u keren ivaan nana tile her ga,Or u lun a ayem nana war ga,Or u nan hende nyinya kpaa nana war ga.*
16 Sha iyange la, mbaageev mba ve hembe taver ishima ken mbautyaav cii la kpaa,Vea yevese a ta ikyondo kera,’+ ka kwagh u Yehova a ôr je la.”
Ngeren mba shin kpe
^ Shin “a tese ityough ki taver kwa kimbir kimbir.”
^ Zwa Heberu, “orjir.”
^ Shin “a tese ityough ki taver kwa kimbir kimbir.”
^ Shin “kwaghwan.”
^ Shin “a tese ityough ki taver kwa kimbir kimbir.”
^ Shin “sanda.”
^ Shin “tempel u.”
^ Shin “kôr ior kwar.”
^ Shin “nana war a uma u nan ga.”
^ Shin “nana war a uma u nan ga.”
