Amoshi 5:1-27
5 “Ungwa nen mkaanem ma m lu wan ne icam i mzungu a mi ne,* ne mba ken ya u Iserael:
2 ‘Iniuunkwase Iserael gba;A kera fatyô u moughon ga.
I undu un hen inya na;Or môm ngu u moughon a na sha ga.’
3 “Gadia Yehova Ter u Hemban Cii ngu kaan ér:
‘Gar u a ze ityav a iorov dubu yô, a lu iorov deri tseegh vea shi ye;U a ze ityav a iorov deri kpaa a lu iorov pue tseegh vea shi ye; ka kwagh u una er ya u Iserael je la.’+
4 “Gadia Yehova ngu kaan a ya u Iserael ér:
‘Kerem nen nahan ne lu uma her.+
5 De keren nen Betel+ ga,De ze nen ken Gilgal+ shin karen yemen nen Bersheba+ ga.
Gadia a yem a Gilgal uikyangen kpee je,+Man Betel kpa kwagh na una bee.*
6 Ker nen Yehova, nahan lu nen uma.+
Sha er una kera bughur sha ya u Yosev er usu nahan,Una hia Betel kera, a or u pirin un shio ga yô.
7 Ka ne gema ijirôron i mimi i hingir kon u yuan,*Shi ne gema perapera ne kende hen inya.+
8 Un u a er ijukuasan i Kima* man ijukuasan i Kesil* la,+Un u ka a gema angôghime a hingir sev la,Un u ka a er sev mbu wa ime er ka tugh la,+Un u ka a yila mngerem ma shin zegemngerSha er una haa ma sha tar la+—Yehova ka iti na.
9 Una va a mtim sha orageegh fese,Una vihi ajiir a lun a ugir kera.
10 Ve kôr mba ve we ior kwagh sha hundagar la ihyom,Shi ve soo ior mba ve ôron kwagh sha mimi la ga.+
11 Er ka ne ngohol icanor inyaregh sha inya,*Shi ne ngohol nan samuyia ner ka kpandegh yô,+Ne za hemen u teman ken ayou a ne maa sha awen a kuan la ga,+Shi ne ma wain u ken ishule i wain i dedoo i ne er la kpaa ga.+
12 Gadia m fa iyenge i akaabo a ne er yô,*Man er asorabo a en a vihi kpishi yô
—Ka ne za orperapera iyol tsung,Shi ne ngohol inyaregh ki yamen ishô,*Shi ka ne kure kwagh u* icanor hen hundagar sha mimi ga.+
13 Sha nahan yô, mbafankwagh vea lu ving sha shighe la,Gadia a lu shighe u ican.+
14 Ker nen kwagh u dedoo, i de lun u bo ga,+Sha er ne lu uma her yô.+
Nahan Yehova Aôndo u akum a sha una lu a ven,Vough er ne kaan ner ngu nahan.+
15 Kôr nen kwaghbo ihyom, kwagh u dedoo a doo ne ishima,+Ôron nen ajir hen hundagar sha mimi.+
Nahan alaghga Yehova Aôndo u akum a shaUna zungwe asande a Yosev a a shi her la mhôônom.’+
16 “Sha nahan yô, ka kwagh u Yehova Aôndo u akum a sha a lu ôron ne, Yehova kaa ér:
‘Sha ityembegar cii ior vea gber kwelegh,Vea lu vaan genger genger sha ugodobi kaan ér, “Aye, aye!”
Vea yila mbasulev ér ve vaa,Kua mbavaanku kpaa ér ve gber kwelegh.’
17 ‘A ungwa kwelegh hen hanma sule u wain;+Gadia me kar hen atô wen,’ ka kwagh u Yehova a ôr je la.
18 ‘Kwagh a tser mba ve tômon ér iyange i Yehova i va la!+
Ka nyi iyange i Yehova ia va ne a mi?+
A lu ime, a lu iwanger ga.+
19 A lu inja er ka or u nan lu yevese begha maa nan za ande sha biya* nahan,Man nan va nyer ken iyou i nan, nan suur uwegh ken kpekpe yô, iyô gber nan.
20 Iyange i Yehova ia lu ime, a lu iwanger ga;Ia va a angôghime, a lu iwanger ga.
21 M kôr uiniongo enev ihyom, ve vihim ishima gande,+Shi ihyuma i hen uicighanmbamkohol enev kpaa i doom ga.
22 Aluer ne nam iniav mbi nanden kua iniav mbigen je kpa,A saan mo iyol a mbi ga;+Shi iniav yenev mbi bem mbi ne ne sha uzendenya mba kehen* la kpaa a doom a mbi ga.+
23 De nen u zan mo ato a atsam a en la;Shi m soo u ungwan amo a ityogholov yenev kpaa ga.+
24 De nen ijirôron i mimi i kua inya er ka mngerem nahan,+Man perapera kpaa er ka uwagh u u tôndon ga yô.
25 Ne mba ken ya u Iserael, yange ne vam a iniav kua uiyuaKen anyom 40 a ne lu ken taaikyôngo laa?+
26 Hegen ne, a gba u ne tôô Sakuti tor wen, man Kaiwan* kera,Ka ieev yenev, ishan i aôndo wen u ne er sha ci wen la,
27 Shi me yem a ven uikyangen, a kar Damaseku,’+ ka kwagh u un u iti na i lu Yehova Aôndo u akum a sha la a kaa je la.”+
Ngeren mba shin kpe
^ Shin “kwelegh u m lu gberen sha kwagh wen ne.”
^ Shin a fatyô u kaan ér, “una hingir ijiir i eren tsav her.”
^ Shin “kwagh u yuan.”
^ A fatyô u lun ijukuasan i i yer ér Orion la.
^ A fayô u lun asan a i yer ér Pleiades, a a lu ken ijukuasan i Taurus la.
^ Shin “kpandegh ku inyaagh.”
^ Shin “ne ôr ijir i.”
^ Shin “inyaregh ki cirin or zwa; ingyatu.”
^ Shin “ityough ki taver yenegh.”
^ Ka inyamkyume i i yer ken zwa Buter ér bear la.
^ Shin “mba wan ahôm.”
^ Alaghga mbaaôndo mban cii ka Saturn, aôndo u yange i civir yô.
