Skip to content

Skip to table of contents

 LISAUN 1

Segredu neʼebé ita hakarak atu hatene

Segredu neʼebé ita hakarak atu hatene

Dala ruma ema ida fó-hatene ba ó segredu ka lae?— * Bíblia koʼalia kona-ba segredu espesiál, ita bolu ida-neʼe “segredu santu”. Neʼe santu tanba mai husi Maromak. No ita bolu ida-neʼe segredu tanba uluk ema la hatene kona-ba segredu neʼe. Anju sira mós hakarak hatene kona-ba neʼe. Ó bele siʼik, segredu neʼe kona-ba saida?—

Saida mak anju sira hakarak atu hatene? Ó hatene ka lae?

Iha tempu uluk liubá, Maromak kria mane no feto primeiru. Sira-nia naran mak Adão ho Eva. Maromak fó ba sira fatin furak atu hela, naran jardín Eden. Se karik Adão ho Eva halo tuir Maromak, sira hamutuk ho sira-nia oan hotu bele halo mundu tomak sai hanesan jardín Eden. No sira sei moris iha jardín neʼe ba nafatin. Maibé ó hanoin-hetan ka lae, saida mak Adão ho Eva halo?—

Adão ho Eva la halo tuir Maromak, tan neʼe ohin loron ita la hela iha fatin neʼebé hanesan jardín Eden. Maibé Maromak hatete katak nia sei halo mundu tomak sai furak no ema hotu sei haksolok no moris ba nafatin. Oinsá mak nia sei halo nuneʼe? Ba tempu kleur ema la hatene. Ida-neʼe mak segredu.

Kuandu Jesus mai toʼo rai, nia hanorin ema kona-ba segredu ida-neʼe. Nia hatete katak segredu neʼe mak kona-ba Maromak nia Ukun. Jesus hanorin ema atu halo orasaun hodi Ukun neʼe toʼo mai ita. Ida-neʼe sei halo mundu sai hanesan jardín neʼebé furak.

Ó sente kontente tanba hatene ona segredu ida-neʼe ka lae?— La haluha katak ema neʼebé halo tuir Jeová deʼit mak sei hela iha jardín furak neʼe. Bíblia konta istória barak kona-ba mane no feto sira neʼebé halo tuir Jeová. Ó hakarak aprende kona-ba sira ka lae?— Mai ita haree kona-ba sira balu no oinsá mak ita bele banati-tuir sira-nia ezemplu.

^ par. 3 Iha istória sira-neʼe, depois pergunta balu Ita sei haree sinál neʼe (—). Neʼe fó-hanoin Ita atu para uitoan atu husik labarik fó resposta.