Skip to content

Skip to table of contents

 LISAUN 8

Josias iha belun sira neʼebé diʼak

Josias iha belun sira neʼebé diʼak

Susar ba ó atu halo buat neʼebé loos ka lae?— Ema barak hatán sin, susar. Bíblia hatete katak susar atu halo ida-neʼe liuliu ba labarik-mane naran Josias. Maibé nia iha belun sira neʼebé diʼak atu ajuda nia. Mai ita aprende tan kona-ba Josias no ninia belun sira.

Josias nia aman naran Amon, liurai husi rai-Judá. Liurai Amon mak ema aat no nia adora lulik no estátua. Kuandu Josias nia aman mate ona, Josias sai liurai ba rai-Judá. Maibé Josias mak tinan ualu deʼit! Tuir ó nia hanoin, Josias hanesan ho ninia aman neʼebé aat ka lae?— Lae, nia la hanesan!

Sofonias fó avizu ba povu atu labele adora lulik no estátua

Maski Josias sei labarik kiʼik, maibé nia hakarak halo tuir Jeová. Tan neʼe nia hili deʼit belun sira neʼebé hadomi Jeová. No sira ajuda Josias atu halo buat neʼebé loos. Josias nia belun sira mak sé?

Josias nia belun ida naran Sofonias. Sofonias mak profeta ida neʼebé fó avizu ba ema Judá katak sira sei hetan susar se  sira adora lulik no estátua. Josias rona ba Sofonias hodi adora Jeová deʼit, laʼós ba lulik no estátua.

Josias iha belun ida tan naran Jeremias. Sira-nia idade hanesan no nuʼudar sira sai boot, sira hela besik malu. No tanba sira sai belun diʼak, Jeremias hakerek knananuk kona-ba oinsá nia hanoin tebes Josias kuandu Josias mate. Jeremias ho Josias ajuda malu atu halo buat neʼebé loos no atu halo tuir Jeová.

Josias ho Jeremias ajuda malu atu halo buat neʼebé loos

Saida mak ó bele aprende husi Josias nia ezemplu?— Maski Josias mak labarik kiʼik, maibé nia hakarak halo buat neʼebé loos. Nia hatene katak nia presiza habelun ho ema neʼebé hadomi Jeová. Ó mós presiza hili belun sira neʼebé hadomi Jeová no ajuda ó atu halo buat neʼebé loos!