Skip to content

Skip to table of contents

 LISAUN 3

Rahab tau fiar ba Jeová

Rahab tau fiar ba Jeová

Hanoin toʼok katak ita iha sidade Jerikó. Sidade neʼe mak iha rai-Kanaán, no ema iha sidade neʼe la fiar ba Jeová. Feto ida naran Rahab hela iha neʼebá.

Kuandu Rahab sei kiʼik, nia rona beibeik istória sira kona-ba oinsá Jeová ajuda Moisés haketak Tasi Mean no lori ema Izraél sai husi Ejitu. Nia mós rona kona-ba oinsá Jeová ajuda ema Izraél atu manán funu hasoru sira-nia inimigu sira. Agora nia rona katak ema Izraél harii sira-nia tenda besik sidade Jerikó!

Rahab proteje espiaun sira tanba nia fiar ba Jeová

Iha kalan ida, mane Izraél naʼin-rua bá Jerikó atu hafuhu sidade. Sira bá toʼo Rahab nia uma no nia konvida sira tama hodi hela ho nia. Durante kalan, liurai Jerikó nian rona katak espiaun rua neʼe iha sidade laran no sira iha Rahab nia uma. Tan neʼe, liurai haruka ema atu bá kaer sira. Rahab subar espiaun sira iha ninia uma nia kakuluk neʼebé tetuk, depois nia hatete ba liurai nia ema sira: ‘Ohin espiaun sira iha-neʼe, maibé sira bá tiha ona. Se imi bá lalais, imi bele toman sira!’ Tuir ó-nia hanoin, tanbasá mak Rahab proteje espiaun sira?—Tanba nia fiar ba Jeová no hatene katak Jeová sei fó rai-Kanaán ba ema Izraél.

Antes espiaun sira sai husi Rahab nia uma, sira promete katak Rahab no ninia família tomak sei la mate kuandu sidade Jerikó naksobu. Ó hatene saida mak sira haruka Rahab atu halo?— Sira hatete: ‘Tali mean neʼe tenke tabele iha Ita-nia janela nia liʼur. Se Ita halo nuneʼe, Ita-nia umakain sei hetan salvasaun.’ Rahab halo tuir buat neʼebé espiaun sira hatete ba nia. Ó hatene saida mak akontese tuirmai?—

Jeová salva Rahab no ninia família

Loron balu tuirmai, ema Izraél marxa haleʼu sidade Jerikó nonook deʼit. Ba loron neen sira haleʼu sidade, loron ida dala ida. Maibé iha loron hitu, sira haleʼu sidade ba dala hitu. Depois, sira hakilar makaʼas. Jeová halo sidade nia moru sira sai rahun. Maibé uma neʼebé tali mean tara hela, hamriik nafatin! Ó bele hatudu uma neʼe iha dezeñu ka lae?— Rahab no ninia família la mate!

 Saida mak ó bele aprende husi Rahab?— Rahab tau fiar ba Jeová tanba buat furak neʼebé nia aprende kona-ba nia. Ita mós aprende daudaun buat furak kona-ba Jeová. Ó mós tau fiar ba Jeová hanesan Rahab ka lae?— Ami fiar katak ó mós halo hanesan neʼe duni!