Skip to content

Skip to table of contents

 LISAUN 11

Sira hakerek kona-ba Jesus

Sira hakerek kona-ba Jesus

Ó bele haree mane sira iha dezeñu neʼe ka lae?— Sira mak Mateus, Marcos, Lucas, João, Pedro, Tiago, Judas, no Paulo. Mane sira-neʼe hotu moris iha Jesus nia tempu. No sira hakerek kona-ba Jesus. Mai ita aprende tan kona-ba sira.

Ó hatene saida kona-ba mane sira-neʼe?

Husi mane sira neʼebé hakerek kona-ba Jesus, naʼin-tolu mak apóstolu sira neʼebé haklaken hamutuk ho Jesus. Ó hatene naʼin-tolu neʼe mak sé?— Mateus, João, no Pedro. Mateus no João, koñese didiʼak Jesus, no  sira ida-idak hakerek livru kona-ba Jesus nia moris. Apóstolu João mós hakerek livru ida naran Apokalipse no karta tolu naran Primeiru João, Segundu João, no Terseiru João. Apóstolu Pedro hakerek karta rua iha Bíblia laran. Karta sira-neʼe mak Primeiru Pedro no Segundu Pedro. Iha Pedro nia karta segundu, Pedro hakerek kona-ba tempu neʼebé Jeová koʼalia husi lalehan kona-ba Jesus hodi dehan: ‘Neʼe mak haʼu-nia oan-mane. Haʼu hadomi nia, no nia halo haʼu kontente.’

Mane sira seluk iha dezeñu neʼe mós hanorin ita kona-ba Jesus iha livru sira neʼebé sira mak hakerek. Mane ida husi sira naran Marcos. Kuandu soldadu sira mai atu kaer Jesus, karik Marcos mós iha neʼebá no nia haree buat hotu neʼebé akontese. Mane ida seluk tan naran Lucas. Nia mak doutór ida no karik sai ema kristaun depois Jesus mate.

Hakerek-naʼin rua tan neʼebé ita bele haree iha dezeñu mak Jesus nia alin-mane naʼin-rua. Ó hatene sira-nia naran ka lae?— Sira-nia naran mak Tiago no Judas. Foufoun, sira la fiar Jesus. Sira mós hanoin Jesus mak bulak uitoan. Maibé liutiha tempu balu sira tau fiar ba Jesus no sai ema kristaun.

Bíblia nia hakerek-naʼin ikus neʼebé ita haree iha dezeñu neʼe mak Paulo. Antes nia sai ema kristaun, ninia naran mak Saul. Nia odi loos no trata aat ema kristaun sira. Ó hatene ka lae, saida mak book Paulo atu sai ema kristaun ida?— Loron ida Paulo laʼo iha dalan no derrepente deʼit nia rona ema ida koʼalia ba nia husi lalehan. Ida-neʼe mak Jesus! Nia husu Paulo: ‘Tanbasá ó trata aat ema neʼebé fiar iha haʼu?’ Depois ida-neʼe Paulo halo mudansa no sai ema kristaun. Paulo hakerek livru 14 iha Bíblia laran, livru sira-neʼe mak Roma toʼo Ebreu.

Ita lee Bíblia loron-loron, loos ka lae?— Hodi lee Bíblia, ita bele aprende buat barak kona-ba Jesus. Ó hakarak atu aprende liután kona-ba Jesus ka lae?—