Jeremia 22:1-30
22 Jehova o re: “Theohela ntlong ea morena* oa Juda ’me u fetise molaetsa ona.
2 U re: ‘Utloa lentsoe la Jehova, uena morena oa Juda ea lutseng teroneng ea Davida, uena le bahlanka ba hao le batho ba hao ba kenang ka likeiti tsena.
3 Jehova o re: “Sebetsang ka toka le ho loka. Motho ea utsoetsoang le mo pholose letsohong la molotsana. Le se ke la tšoara molichaba hampe ’me le se ke la ntša khutsana* kapa mohlolohali kotsi.+ Le se ke la bolaea batho ba se nang molato sebakeng sena.+
4 Etsoe haeba le phetha lentsoe lena hantle, marena a lulang teroneng ea Davida+ a tla kena ka likeiti tsa motse ona, a palame likariki le lipere, ’ona hammoho le bahlanka ba ’ona le sechaba sa ’ona.”’+
5 Jehova o re: “Haeba le sa mamele mantsoe ana, ke hlapanya ka ’na hore ntlo ena e tla soahlamana.”+
6 “Etsoe Jehova o re ka ntlo ea morena oa Juda:
‘U joaloka Gileade ho ’na,U tšoana le tlhoro ea Lebanone.
Empa ke tla u etsa lithako,Ha ho le o mong oa metse ea hao o tla ba le baahi.+
7 Ke tla khetha batho ba tla u felisa,E mong le e mong ka libetsa tsa hae.+
Ba tla rema lifate tsa hao tsa kedare tse khethehilengBa li akhele mollong.+
8 “‘Lichaba tse ngata li tla feta haufi le motse ona ’me li buisane li re: “Ke hobane’ng ha Jehova a entse tjee ka motse oo o moholo?”+
9 Li tla re: “Ke hobane batho ba motse oo ba fetohetse selekane seo ba se entseng le Jehova Molimo oa bona, ba inametse melimo e meng ’me ba e sebelelitse.”’+
10 Le se ke la llela ea shoelengHape le se ke la mo utloela bohloko.
Ho e-na le hoo, llang haholo bakeng sa motho ea haptjoangKaha ha a sa tla hlola a khutla hore a bone naha eo a hlahetseng ho eona.
11 “Etsoe Jehova o re ka Shalume*+ mora oa Josiase, morena oa Juda ea busang sebakeng sa ntate oa hae Josiase+ le ea tlositsoeng sebakeng sena: ‘Ha a sa tla hlola a khutlela moo.
12 O tla shoella sebakeng seo ba mo isitseng kholehong ho sona ’me ha a sa tla hlola a bona naha ena.’+
13 Ho malimabe ea hahang ntlo ea hae ka bolotsana,Ea hahang likamore tsa eona tse ka holimo empa e se ka toka,Ea etsang hore oa habo a mo sebeletse mahala,Ea hanang ho mo patala.+
14 Ho malimabe ea reng: ‘Ke tl’o ikahela ntlo e kholoE nang le likamore tse kholo ka holimo.
Ke tla e kenya lifensetere,Ke e kenye mapolanka a kedare ’me ke e pente ka bofubelu.’
15 Na u tla tsoela pele ho busa hobane feela u hlolisa ba bang ka ho sebelisa kedare?
Ntate oa hao le eena o ile a ja le ho noaEmpa o ile a sebetsa ka toka le ka ho loka+Eaba lintho li mo tsamaela hantle.
16 O ile a buella nyeoe ea mofutsana le ea motho ea mahlomolengEaba lintho li tsamaea hantle.
‘Na eo ha se eona ntho e boleloang ke ho ntseba?’ ke Jehova ea chong.
17 ‘Empa u lula u nahana le ho batla mekhoa ea ho ithuisa ka bolotsana,Ho bolaea batho ba se nang molato,Ho etsa bobolu le ho nka thepa ea batho ka mahahapa.’
18 “Ka hona, Jehova o re ka Jojakime+ mora oa Josiase, morena oa Juda:
‘Ba ke ke ba mo llela ba re:
“Ao ngoan’eso! Ao ngoan’eso!”
Ba ke ke ba mo llela ba re:
“Ao mong’a ka! Ao moren’a ka!”
19 O tla patoa joaloka tonki,+A hulanngoe a be a lahloe,A lahleloe ka nģ’ane ho likeiti tsa Jerusalema.’+
20 Nyolohela* Lebanone ’me u hoeletse.
Hoeletsa u le Bashane,U hoeletse u le Abarime+Hobane bohle ba u ratang haholo ba timelitsoe.+
21 Ke buile le uena nakong eo u neng u ikutloa u sireletsehile.
Empa oa re: ‘Nke ke ka mamela.’+
Haesale u itšoere ka tsela ena ho tloha u sa le mocha,Etsoe ha oa mamela lentsoe la ka.+
22 Moea o tla khanna balisa bohle ba hao,+Ba u ratang haholo ba tla haptjoa.
Joale u tla soaba le ho tlotloloha ka lebaka la tlokotsi e tla u hlahela.
23 Uena ea lulang Lebanone,+Ea entseng sehlaha har’a likedare,+U tla lumaela ha u otloa ke mahlaba,Ha u utloa bohloko bo kang ba mosali ea belehang.”+
24 “Jehova, Molimo ea phelang o re: ‘Ke hlapanya ka ’na hore esita le haeba uena Konia*+ mora oa Jojakime,+ morena oa Juda, u ne u le reng e tempang e letsohong la ka le letona, ke ne ke tla u rola.
25 Ke tla nehelana ka uena ho ba batlang ho u bolaea, ho bao u ba tšabang, ho Nebukadnezare* morena oa Babilona le ho Bakalde.+
26 Ke tla lahlela uena le ’mè oa hao naheng esele ’me le tla shoela teng.
27 Le ke ke la hlola le khutlela naheng eo le e labalabelang.+
28 Na Konia eo ha a tšoane le nkho feela e nyatsehang, e pshatlehileng,Sejana seo ho seng motho ea se batlang?
Ke hobane’ng ha eena le bana ba hae ba lihetsoe fatše’Me ba lahletsoe naheng eo ba sa e tsebeng?’+
29 Lona batho ba lefatšeng,* mamelang lentsoe la Jehova.
30 Jehova o re:
‘Ngolang monna enoa a se na banaE le monna ea ke keng a atleha bophelong,*Etsoe ha ho le ea mong oa bana ba hae ea tla atlehaHo lula teroneng ea Davida ’me a buse Juda hape.’”+
Linaletsana
^ Kapa: “phaleising.”
^ Kapa: “ngoana ea se nang ntate.”
^ O boetse o bitsoa Joakaze.
^ Ho bonahala taelo ena e ne e fuoa Jerusalema.
^ O boetse o bitsoa Jojakine le Jekonia.
^ Ka Seheberu: “Nebukadrezare,” tsela e ’ngoe eo lebitso lena le ngoloang ka eona.
^ Ka Seheberu: “Uena lefatše, lefatše, lefatše.”
^ Ka Seheberu: “matsatsing a hae.”
